ރައްޔިތުންގެ މަޖިލީހުގެ ތަޅުމުގައި ވާހަކަ ދައްކަވަމުން، ނޫސްވެރިން އުލުބައިންދަން ނުވަތަ އަނިޔާވެރި ގޮތަކަށް މަރުގެ އަދަބު ދޭން މަޖިލީހުގެ މެޖޯރިޓީ ލީޑަރު އިބްރާހީމް ފަލާހު ގޮވާލެއްވި މައްސަލަ ތަހުގީގު ކުރުމާ މެދު ޕްރޮސެކިއުޓާ ޖެނެރަލް (ޕީޖީ)ގެ ލަފަޔަކަށް އެދިފައިވާ ކަމަށް ފުލުހުން ބުނެފި އެވެ.
ވީ ކިހިނެއް؟ - ފަލާހު ނޫސްވެރިންނަށް މި ހަރުކަށި އިންޒާރު ދެއްވީ މިދިޔަ ބުދަ ދުވަހު ބޭއްވި މަޖިލީހުގެ ޖަލްސާގައި، ސަރުކާރުގެ ބާރު ފޯރުވޭ ކޮމިޝަނަކުން މީޑިއާތަކާއި ނޫސްވެރިން ރެގިއުލޭޓްކުރުމުގެ ނަމުގައި ބޮޑެތި އަދަދުތަކުން ޖޫރިމަނާކޮށް ހަރުކަށި ފިޔަވަޅުތަކެއް އެޅޭ ގޮތަށް މަޖިލީހަށް ހުށަހަޅާފައިވާ ބިލަށް ބަހުސް ކުރައްވަމުންނެވެ.
މި މައްސަލައިގައި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ވަނީ ފަލާހަށް ފިޔަވަޅު އެޅުމަށް ގޮވާލާފަ އެވެ. އަދި މައްސަލަ ތަހުގީގު ކުރުމަށް އެދި ފުލުހަށް ވެސް ހުށަހެޅި އެވެ.
ތަފްސީލް - ފުލުހުން ވަކި މައްސަލައެއް ބަޔާން ނުކޮށް މިރޭ ބުނީ، މަޖިލީހުގެ ތަޅުމުގައި މެމްބަރަކު ދެއްކި ވާހަކައަކާ ގުޅިގެން ފިޔަވަޅު އެޅުމަަށް، އެމްޖޭއޭއިން ހުށަހަޅާފައިވުމުން، އެ މައްސަލަ ތަހުގީގު ކުރުމާ މެދު ގާނޫނީ ލަފަޔަކަށް އެދި އިއްޔެ ޕީޖީ އޮފީހަށް ހުށަހަޅާފައިވާ ކަމަށެވެ.
އޭގެ އިތުރު ތަފްސީލެއް ނުދެ އެވެ.
އެނގުން މުހިއްމު - ބިލުގެ ބަހުސްގައި ފަލާހު ނޫސްވެރިން އުލުބައިންދަން ގޮވާލީ އޭނާ ފެންނަ ވީޑިއޯއެއް ކަމަށް ބުނެ މީގެ ކުރިން ސޯޝަލް މީޑިއާގައި، ކާކުކަން ނޭނގޭ އެކައުންޓަކުން އާންމުކުރި ވީޑިއޯއަކާ ގުުޅުވައިގެންނެވެ.
"މިއަދު ވަރަށް އަސަރާ އެކު މި ވާހަކަ މި ދަންނަވަނީ. އަޅުގަނޑަކީ ވެސް މީޑިއާގައި މަސައްކަތް ކުރާ ބޭފުޅުން ނުހައްގުން ލިޔާ އެކިއެކި މަޖައްލާތަކުގެ ސަބަބުން ވަރަށް ނިކަމެތިކަމެއް ދިމާވެފައި ހުރި މީހެއް. އެއް ޖިންސުން ގުޅުން ހިންގާ މީހަކަށް ހަދާފައި ހުރި މީހެއް އަޅުގަނޑަކީ،" ފަލާހު ވިދާޅުވި އެވެ.
"މި ލެވެލްގައި މަސައްކަތް ކުރީމަ މީޑިއާތައް ގެންގޮސް ޖަލަކަށް ނޫން، އުލުބައިންދަންވީ. އުލު، ސީދާ ބައިންދަންވީ. އެގޮތަށް މަސައްކަތް ކުރާ ބޭފުޅުން."
ފަލާހުގެ މި ވާހަކަ ކުށްވެރިކޮށް އެމްޖޭއޭން ނެރުނު ބަޔާނުގައި ގޮވާލީ:
މަޖިލީހުގެ ތަޅުމުގައި ފާޅުކަން ބޮޑު ގޮތެއްގައި ބައެއްގެ މައްޗަށް އަނިޔާވެރިވުމަށް އޭނާ ގޮވާލައްވާފައި ވާތީ ވެރިކަންކުރާ ޕީއެންސީން ފަލާހުއާ މެދު އަހުލާގީ ފިޔަވަޅު އެޅުމަށް
އާންމުކޮށް އެނގޭނެހެން އެ ވާހަކަތަކާ މެދު ފަލާހު މައާފަށް އެދުމަށް