ރައީސް މުއިއްޒު ގެންދަވަނީ ހައްގުތައް ނިގުޅައިގަންނަމުން: ހިއުމަން ރައިޓްސް ވޮޗް

މިނިވަން މީޑިއާ ނެތިކޮށްލަން ރައްޔިތުންގެ މަޖިލީހަށް މިހާރު ހުށަހަޅައި ފާސްކުރުމުގެ މަސައްކަތް ކުރަމުންދާ ބިލަކީ ހިޔާލުފާޅު ކުރުމުގެ މިނިވަންކަން ހަނި ކުރުމަށް ރައީސުލްޖުމްހޫރިއްޔާ މުހައްމަދު މުއިއްޒުގެ ސަރުކާރުން ކުރަމުން ގެންދާ މަސައްކަތުގެ ބައެއް ކަމަށް ހިއުމަން ރައިޓްސް ވޮޗުން ބުނެފި އެވެ.ހިއުމަން ރައިޓްސް ވޮޗުން މިއަދު ނެރުނު ބަޔާނެއްގައި ވަނީ، މީޑިއާތައް ކޮންޓްރޯލްކުރުމަށް ސަރުކާރަށް މަގުފަހިވާ ގޮތަށް ރައްޔިތުންގެ މަޖިލީހަށް ހުށަހަޅާފައިވާ ބިލާއި، ލޯކަލް ކައުންސިލްތަކުގެ ބައެއް ބާރުތައް ހަނިވާގޮތަށް އިދާރީ ދާއިރާތައް ހިންގުމުގެ ގާނޫނަށް ގެނައި އިސްލާހުތައް އަނބުރާ ގެންދަން ގޮވާލައިފައެވެ.އެ ޖަމިއްޔާއިން ބުނީ، މީޑިއާ ކޮންޓްރޯލްކުރުމަށް ހުށަހެޅި ބިލާއި ކައުންސިލްތަކުގެ ބާރުތައް ހަނިވާ ގޮތަށް ސަރުކާރުން ގާނޫނު އިސްލާހުކުރުމުގެ ސަބަބުން، 2008ވަނަ އަހަރު ފާސްކުރި ފެހި ޤާނޫނުއަސާސީގެ ކުރިން އޮތް ހާލަތަށް ރާއްޖެ ސޮއްސާލުމުގެ ބިރު އެބައޮތް ކަމަށެވެ."ހިޔާލު ފާޅުކުރުމުގެ މިނިވަންކަން ހަނިކުރުމަށް ކުރާ ނުސީދާ މަސައްކަތްތައް ދޫކޮށްލައި، އަސާސީ ހައްގުތަކަށް އިހުތިރާމުކުރުން އިތުރުކުރަން މަސައްކަތް ކުރަންޖެހޭ."ހިއުމަން ރައިޓްސް ވޮޗުން ވަނީ މަސްތުވާތަކެތި ޓްރެފިކް ކުރާ މީހުންނަށް މަރުގެ އަދަބު ދޭން ސަރުކާރުން ކުރަމުން ގެންދާ މަސައްކަތާއި ލޯކަލް ކައުންސިލްތަކުގެ އިދާރީ ބާރުތައް ހަނިކުރަން ފާސްކުރި ގާނޫނާ ގުޅިގެން ވެސް ކަންބޮޑުވުން ފާޅުކޮށްފަ އެވެ.ތުޅާދޫ ދާއިރާގެ މެންބަރު އަބްދުލްހަންނާނު މުހައްމަދު (އެންޓްރެކް ހަންނާނު) ހުށަހެޅުއްވި މީޑިއާ ނެތިކޮށްލާ ބިލު ފަރުމާކޮށްފައި އޮތީ މިނިވަންކަމާއެކު ނޫސްވެރިކަން ކުރެވޭނެ މަގު ބަންދު ކުރެވޭނެ ގޮތަށެވެ. އެ ބިލުގެ ދަށުން ކޮމިޝަނެއް އުފައްދައި، އެ ކޮމިޝަނުގެ ބާރު ރައީސް މުހައްމަދު މުއިއްޒަށް ނެގޭނެ މަގު ވެސް ބިލުން ފަހިވެ އެވެ.އެ ބިލު މިހާރު އޮތް ގޮތަށް ފާސްވެއްޖެ ނަމަ، ނޫސްވެރިންނާއި ނޫސްތައް ޖޫޫރިމަނާކޮށް، ހުއްޓުވައި، މައްސަލައެއް ބަލައި ނިމުމުގެ ކުރިން މީޑިއާތަކުގެ ރެޖިސްޓްރޭޝަން ވެސް ހިފެހެއްޓެ އެވެ.އެ ބިލު ބޭރުކޮށްލުމަށް ރާއްޖޭގެ ނޫސްވެރިންނާއި ހައްގުތަކަށް ވަކާލާތު ކުރާ ބޭރުގެ ވަރަށް ގިނަ ޖަމިއްޔާތަކުން ވެސް ދަނީ ގޮވާލަމުންނެވެ. އެކަމަކު ސަރުކާރުން ނިންމާފައި ވަނީ އެ ބިލަށް ތާއީދުކޮށް އެ ބިލު ފާސްކުރުމުގެ މަސައްކަތް ކުރިއަށް ގެންދިޔުމަށެވެ.ރައްޔިތުންގެ މަޖިލީހަށް އެ ބިލު ހުށަހެޅި ފަހުން، މުއިއްޒު ގެންދަވަނީ މީޑިއާއާ ގުޅޭ ގޮތުން ދޮގު ފަތުރައި، ހަގީގަތް އޮޅޭ ގޮތަށް ވާހަކަ ދައްކަވަމުންނެވެ. ގައުމީ ދުވަހުގެ މުނާސަބަތުގައި މިއަދު ބޭއްވި ޖަލްސާގައި މުއިއްޒު ވަނީ އެމަނިކުފާނުގެ ރުޅިވެރިކަން މީޑިއާތަކަށް އަމާޒުކޮށްފަ އެވެ
އަރުޝީފަށް ނެގީ
އެންމެފަހުން އަޕްޑޭޓްކުރީ