ސަރުކާރުން ފަސް އަޅައި ފޮރުވަން ޖެހޭ ކަންކަން ގިނަ ނޫން ނަމަ، މީޑިއާ ކޮންޓްރޯލްކޮށް ސަރުކާރުގެ މުށުތެރެއަށް މީޑިއާ ގެނައުމަށް އެއްވެސް މަސައްކަތެއް ނުކުރާނެ ކަމަށް، ކުރީގެ ރައީސް އަބްދުالله ޔާމީން އަބްދުލްގައްޔޫމް ރޭ ވިދާޅުވެއްޖެ އެވެ.ޔާމީން މިފަދައިން ވިދާޅުވީ ޕީއެންއެފްގެ އޮފީހުގައި ބުރާސްފަތި ދުވަހުގެ ރޭ ބޭއްވި ޖަލްސާގައި، ސަރުކާރާ ގުޅުން ބޮޑު، ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު ހުށަހެޅުއްވި މީޑިއާ ކޮންޓްރޯލް ބިލާ ގުޅޭގޮތުން ވާހަކަފުޅު ދައްކަވަމުންނެވެ.ޔާމީން ވިދާޅުވީ، ނޫސްވެރިންނާ ބައްދަލުކުރެއްވުމަށް ފަހު، ރައީސް ނޫސްވެރިންގެ ކަންބޮޑުވުންތައް ފުރިހަމައަށް ބައްލަވައި އެކަންކަން ހައްލުކުރައްވަން ޖެހޭ ކަމަށެވެ.އެއާއެކު، މީޑިއާތައް ކޮންޓްރޯލްކުރުމާއި، ކޮންޓްރޯލް ބިލުގެ ދަށުން އުފައްދާ ކޮމިޝަންގެ ބާރު ބޭނުންފުޅުނުވާ ކަން ރައީސް ވިދާޅުވި ވިދާޅުވުން ޔާމީން ފާހަގަކުރެއްވިއެވެ.މީޑިއާތައް ކޮންޓްރޯލްކުރަން ބޭނުންފުޅުނުވާ ކަމަށް ރައީސް ވިދާޅުވަމުން ގެންދެވި ނަމަވެސް، މުހިންމު މިނިވަން މުއައްސަސާތަކުގެ ވެރިން އައްޔަންކުރައްވަނީ ރައީސް ކަމަށާއި، އެ މުއައްސަސާތައް ހިންގުމުގެ ޒިންމާ އުފުލަނީ ވެސް އެ ބޭފުޅުން ކަމަށް ޔާމީން ވިދާޅުވިއެވެ. އެހެންކަމުން ރައީސްގެ އިޚުލާސްތެރިކަމެއް ނެތް ކަމަށް ޔާމީން ވިދާޅުވިއެވެ.ޔާމީން ވިދާޅުވީ، ސަރުކާރު ޖަވާބުދާރީކުރުވޭނެ ފަދަ މުއައްސަސާއެއް މިވަގުތު މި ގައުމުގައި ނެތްއިރު، ސަރުކާރު ޖަވާބުދާރީކުރުވަން މީޑިއާ އޮންނަން ޖެހޭ ކަމަށެވެ.ތުޅާދޫ ދާއިރާގެ މެންބަރު އަބްދުލްހަންނާނު މުހައްމަދު (އެންޓްރެކް ހަންނާނު) ހުށަހެޅުއްވި މީޑިއާ ނެތިކޮށްލާ ބިލު ފަރުމާކޮށްފައި އޮތީ މިނިވަންކަމާއެކު ނޫސްވެރިކަން ކުރެވޭނެ މަގު ބަންދު ކުރެވޭނެ ގޮތަށެވެ. އެ ބިލުގެ ދަށުން ކޮމިޝަނެއް އުފައްދައި، އެ ކޮމިޝަނުގެ ބާރު ރައީސް މުހައްމަދު މުއިއްޒަށް ނެގޭނެ މަގު ވެސް ބިލުން ފަހިވެ އެވެ.އެ ބިލު މިހާރު އޮތް ގޮތަށް ފާސްވެއްޖެ ނަމަ، ނޫސްވެރިންނާއި ނޫސްތައް ޖޫޫރިމަނާކޮށް، ހުއްޓުވައި، މައްސަލައެއް ބަލައި ނިމުމުގެ ކުރިން މީޑިއާތަކުގެ ރެޖިސްޓްރޭޝަން ވެސް ހިފެހެއްޓެ އެވެ.އެ ބިލު ބޭރުކޮށްލުމަށް ރާއްޖޭގެ ނޫސްވެރިންނާއި ހައްގުތަކަށް ވަކާލާތު ކުރާ ބޭރުގެ ވަރަށް ގިނަ ޖަމިއްޔާތަކުން ވެސް ދަނީ ގޮވާލަމުންނެވެ. އެކަމަކު ސަރުކާރުން ނިންމާފައި ވަނީ އެ ބިލަށް ތާއީދުކޮށް އެ ބިލު ފާސްކުރުމުގެ މަސައްކަތް ކުރިއަށް ގެންދިޔުމަށެވެ.ރައްޔިތުންގެ މަޖިލީހަށް އެ ބިލު ހުށަހެޅި ފަހުން، މުއިއްޒު ގެންދަވަނީ މީޑިއާއާ ގުޅޭ ގޮތުން ދޮގު ފަތުރައި، ހަގީގަތް އޮޅޭ ގޮތަށް ވާހަކަ ދައްކަވަމުންނެވެ. ގައުމީ ދުވަހުގެ މުނާސަބަތުގައި މިއަދު ބޭއްވި ޖަލްސާގައި މުއިއްޒު ވަނީ އެމަނިކުފާނުގެ ރުޅިވެރިކަން މީޑިއާތަކަށް އަމާޒުކޮށްފަ އެވެ