ފުލުހުންނަށް ޚާއްސަކޮށްގެން ހައުސިން ޔުނިޓުތަކެއް އަޅަން 2013 ވަނަ އަހަރު ޕޮލިސް ކޯޕަރޭޓިވް ސޮސައިޓީ (ޕޮލްކޯ)އާ ހާވަލުކުރުމުން އެ މަޝްރޫއަށް އެއް ބިލިއަނަށް ވުރެ ގިނަ ރުފިޔާ ޚަރަދުވެ، އެ ކުންފުނީގެ ކޮރަޕްޝަނާއި ނާގާބިލުކަމުގެ ސަބަބުން ދައުލަތަށް 354.7 މިލިއަން ރުފިޔާ ގެއްލުނު މައްސަލައިގައި ފިޔަވަޅު އަޅަން އޮޑިޓް އޮފީހުން އަންގައިފިއެވެ. މަޝްރޫއު އޮޑިޓްކުރި ތާރީޚުގެ ނިޔަލަށް ޖުމުލަ 1.06 ބިލިއަން ރުފިޔާ ވަނީ ޚަރަދުކޮށްފައެވެ. އެއީ، އަކަފޫޓަކަށް 1،851 ރުފިޔާއެވެ. އޮޑިޓް ރިޕޯޓުގައި ބުނީ، މާލީ ވުޒާރާގެ ޓެންޑާ އިވެލުއޭޝަން ބޯޑުން ހޯދި މައުލޫމާތުތަކަށް ބަލާއިރު އާންމު ގޮތެއްގައި ކޮންސްޓްރަކްޝަން މަސައްކަތް ކޮށްދޭ އަމިއްލަ ކުންފުނިތަކުން އަކަފޫޓަކަށް 1،300 ރުފިޔާއާއި 1،500 ރުފިޔާއާ ދެމެދުގެ އަގެއްގައި އެ ފަދަ ކޮންސްޓްރަކްޝަން މަސައްކަތް ކޮށްދޭ ކަމަށެވެ. އެހެންވެ، އެ މައްސަލައިގައި، އޭރު ޕޮލްކޯގެ ބޯޑް އޮފް ޑިރެކްޓަރުންގެ ގޮތުގައާއި އިސްވެރިންގެ ގޮތުގައި ތިއްބެވި ބޭފުޅުންނަށް ފިޔަވަޅު އަޅަން އޮޑިޓް ރިޕޯޓުގައި ވަނީ ލަފާދީފައެވެ. ހުޅުމާލޭގައި ހުންނަ ފުލުހުންގެ ފުލެޓުތައް: އެ ތަން އިމާރާތްކުރުމުގައި ދައުލަތަށް ވަނީ ބޮޑު ގެއްލުމެއްވެފައި -- މި މައްސަލައިގައި ޝާމިލުވާ އެންމެން ހޯދައި ފިޔަވަޅު އެޅުމަށްޓަކައި އެންޓި ކޮރަޕްޝަން ކޮމިޝަނާއި އެހެނިހެން ތަހުގީގީ އިދާރާތަކަށް ފިޔަވަޅު އަޅަން ވެސް އޮޑިޓް އޮފީހުން ވަނީ ލަފާދީފައެވެ. މީގެ އިތުރުން، އައިލެންޑް އެކްސްޕާޓާ އެކު މި މަޝްރޫއަށް ހެދި އެއްބަސްވުން ބާތިލުކުރިއިރު އެ ކުންފުންޏަށް އިތުރަށް ދޫކުރި ފައިސާ ވީހާ ވެސް އަވަހަކަށް ހޯދަން ވަނީ ލަފާ ދީފައެވެ. އަދި، އެ ފައިސާ އަނބުރާ ހޯދަން އައިލެންޑް އެކްސްޕާޓާއި އެންސިސްއާއި ތަނބުރުމާ އަދި ޕޮލްކޯއާ ދެމެދު ވެފައިވާ އެއްބަސްވުމަކީ ދައުލަތަށް ގެއްލުންވާ ގޮތަށް ހަދާފައިވާ އެއްބަސްވުމެއްކަމުން އެ މައްސަލައިގައި ވެސް ފިޔަވަޅު އަޅަން ވަނީ ލަފާދީފައެވެ. މި މަޝްރޫއުގެ މަސައްކަތާ ހަވާލުވެ، މަސައްކަތް ނުނިންމުމުގެ ސަބަބުން އެއްބަސްވުން ބާތިލުކުރަން ޖެހުނު ކުންފުނިތަކާ މެދުގައި ފިޔަވަޅު އަޅަން މާލީ ވުޒާރާއަށް ހުށަހަޅަން ވެސް ވަނީ ލަފާދީފައެވެ. ދައުލަތުން ކުރިއަށް ގެންދާ އިމާރާތްކުރުމުގެ މަޝްރޫއުތަކުގައި އެ މަސައްކަތްތައް އިއުލާނުކުރާއިރު އެ މަސައްކަތާ ގުޅުވައި ރާއްޖެ އެތެރެކުރާ މުދަލުން އިމްޕޯޓު ޑިއުޓީ މާފުކުރާނަމަ، އެކަން ވެސް އިއުލާނުން ސާފުކޮށް އެނގޭ ގޮތް ހަދަން އޮޑިޓް ރިޕޯޓުގައި ވަނީ ލަފާދީފައެވެ. އެ ރިޕޯޓުގައި ވަނީ، ޕޮލްކޯ ފަދަ ކޯޕަރޭޓިވް ސޮސައިޓީތަކުގެ ބަދަލުގައި ކަމާ ގުޅުންހުރި މިނިސްޓްރީއެއް މެދުވެރިކޮށް މި ފަދަ މަޝްރޫއުތައް ކުރިއަށް ގެންދަން ލަފާދީފައެވެ. https://sun.mv/201758 އެ މަޝްރޫއަށް 240.1 މިލިއަން ރުފިޔާއާއި 354.7 މިލިއަން ރުފިޔާއާ ދެމެދުގެ އަދަދެއް އިތުރަށް ޚަރަދުވެފައިވާކަން އޮޑިޓް ރިޕޯޓުގައި ވަނީ ފާހަގަކޮށްފައެވެ. އެއީ، އެ ޕޮލްކޯގެ ނާގާބިލުކަމާއި ކޮރަޕްޝަނަށް ޝައްކުކުރެވޭ ކަންތައްތަކެއްގެ ސަބަބުން ގެއްލުނު ފައިސާ ކަމަށް އޮޑިޓް ރިޕޯޓުގައި ވަނީ ފާހަގަކޮށްފައެވެ. "ގާތްގަނޑަކަށް ދެގުނަ ޚަރަދުކޮށްފައިވުމުން ދައްކައިދެނީ މި ފަދަ ބޮޑެތި ޕްރޮޖެކްޓްތައް ހިންގުމުގެ ފަންނީ ގާބިލުކަން ޕޮލްކޯގައި ނެތްކަމާއި، ކޮންޓްރެކްޓަރުންނަށް ފައިދާވާ ގޮތަށް އެއްބަސްވުމަށް ބަދަލު ގެނެސްފައިވުމާއި، ފްރޯޑާއި ކޮރަޕްޝަންގެ އަމަލުތަކަށް ޝައްކުކުރެވޭ ކަންކަން މި މަޝްރޫއުގެ ތެރޭގައި ހިނގާފައިވާ ކަމެވެ،" އޮޑިޓް ރިޕޯޓުގައިވެއެވެ. އޮޑިޓް ރިޕޯޓުގައި ބުނީ، އެ މަޝްރޫއު ހިންގާފައިވަނީ ކަނޑައެޅިގެން ނޫމަޑީގެ ރެޕްރެޒެންޓޭޓިވަށް ފައިދާވާ ގޮތަށް ކަމަށެވެ. އެކަމަކު، އެއީ ކާކު ކަމެއް އޮޑިޓް ރިޕޯޓުގައި ބުނެފައެއް ނުވެއެވެ. އެ މީހާއަކީ އޮޑިޓް ރިޕޯޓުގައި ފާހަގަކުރި ގޮތުގައި ނޫމަޑީގެ ރެޕްރެޒެންޓޭޓިވެވެ. އެ މީހާއަކީ މަޝްރޫއުގައި ހިމެނޭ އައިލެންޑް އެކްސްޕާޓްގެ މެނޭޖިން ޑިރެކްޓަރެވެ. އަދި، މި މަޝްރޫއުގައި ހިމެނޭ ދެކޯމަސްގެ މެނޭޖިން ޑިރެކްޓަރާ އެ މީހާއާ ވެސް އާއިލީ ގުޅުން އޮންނަ ކަމަށް އޮޑިޓް ރިޕޯޓުގައި ވަނީ ފާހަގަކޮށްފައެވެ. އެ މީހާއަށް ސީދާ ގޮތުންނާއި ނުސީދާ ގޮތުން 682 މިލިއަން ރުފިޔާ ދައްކާފައިވާ ކަމަށް އޮޑިޓް ރިޕޯޓުގައި ބުންޏެވެ.