ދިވެހިރާއްޖޭގެ ތާރީޚާއި ސަގާފަތް ޑިޖިޓަލް ޓެކްނޮލޮޖީގެ އެހީގައި ދެމެހެއްޓުމަށް އަމާޒުކޮށް، ޤައުމީ ޑިޖިޓަލް އާކައިވް ޕްރޮޖެކްޓްގެ ޕްރޮޓޯޓައިޕް މިއަދު ރަސްމީކޮށް ތަޢާރަފުކޮށްފިއެވެ. މި އިންޤިލާބީ މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެއް ޙަޤީޤަތަކަށް ހެއްދެވުމުގެ ގޮތުން ކުރިއަށްގެންދަވާ މަސައްކަތެކެވެ.ޒުވާނުންގެ ބާރުވެރިކަމާއި، މަޢުލޫމާތާއި ޓެކްނޮލޮޖީއާބެހޭ ވަޒީރު އިބްރާހީމް ވަޙީދު އަދި ނެޝަނަލް އާކައިވްސް އޮފް މޯލްޑިވްސްގެ ޑިރެކްޓަރ ޖެނެރަލް މުޙައްމަދު ޢާމިރު އަޙްމަދު ވަނީ މިއަދު ބޭއްވުނު ޚާއްޞަ ރަސްމިއްޔާތެއްގައި މި ޕްރޮޖެކްޓްގެ ޕްރޮޓޯޓައިޕް ރަސްމީކޮށް އިފްތިތާޙުކޮށްދެއްވާފައެވެ.މި މަޝްރޫޢުގެ މައިގަނޑު މަޤްޞަދަކީ ދިވެހިރާއްޖޭގެ މުހިންމު ތާރީޚީ، ސަގާފީ އަދި ޒަމާނީ މަޢުލޫމާތުތތައް ޑިޖިޓަލް ވަސީލަތްތަކުގެ އެހީގައި ރައްކާތެރިކޮށް، އަންނަން އޮތް ޖީލުތަކަށް ފަސޭހައިން ލިބޭނެ މަގު ތަނަވަސްކޮށްދިނުމެވެ. މި ޕްރޮޖެކްޓަކީ އޯއޭއައިއެސް ކްލައުޑް، ޖިއާރެޓާ އެސޯސިއޭޓްސް އަދި ދިވެހިރާއްޖޭގެ ޤައުމީ އަރުޝީފުގެ މެދުގައި ޤާއިމުކުރެވިފައިވާ ބައިނަލްއަޤްވާމީ ޕާޓްނަރޝިޕެކެވެ.ރަސްމިއްޔާތުގައި ވާހަކަފުޅު ދައްކަވަމުން، ވަޒީރު އިބްރާހީމް ވަޙީދު ވިދާޅުވީ މި ނިޒާމުގެ ސަބަބުން މަޢުލޫމާތު ރައްކާކުރުމުގެ ދާއިރާއަށް ފާހަގަކޮށްލެވޭ ކުރިއެރުންތަކެއް ލިބިގެންދާނެ ކަމަށެވެ. "މިއީ ހަމައެކަނި ދިވެހިރާއްޖޭގެ ތާރީޚު ބަޔާންކޮށްދޭ ވެބްސައިޓެއް ނޫން. މިއީ ދުނިޔެއަށް ދިވެހިރާއްޖެ ތަޢާރަފުކޮށްދޭނެ މުހިންމު ވަސީލަތަކަށް ވެގެންދާނެ," ވަޒީރު ވިދާޅުވިއެވެ.
މީގެ އިތުރުން، މި މަޝްރޫޢުގެ ސަބަބުން ޤައުމީ އަރުޝީފުގެ ޑިޖިޓަލް ރެކޯޑުތައް ރައްކާތެރިކުރުމުގެ ޤާބިލުކަން އިތުރުވެގެންދާނެ ކަމަށާއި، ކުދި ޖަޒީރާ ތަރައްޤީވަމުންދާ ޤައުމުތަކަށް ޑިޖިޓަލް ޕްރިޒަވޭޝަންގެ ދާއިރާއިން ފުޅާ ޢިލްމާއި ތަޖުރިބާ ލިބިގެންދާނެ ކަމަށް ވަޒީރު ފާހަގަކުރެއްވިއެވެ. އަދި މި މަޝްރޫޢަކީ ދިވެހިރާއްޖޭގެ ދެމެހެއްޓެނިވި ތަރައްޤީއަށްވެސް އެހީތެރިވެދޭނެ މުހިންމު މަސައްކަތެއްކަން ވަޒީރު ފާހަގަކުރެއްވިއެވެ.
ނެޝަނަލް އާކައިވްސް އޮފް މޯލްޑިވްސްގެ ޑިރެކްޓަރ ޖެނެރަލް މުޙައްމަދު ޢާމިރު އަޙްމަދު ވިދާޅުވީ މި ޕްރޮޖެކްޓަކީ ދިވެހިރާއްޖޭގެ ތާރީޚާއި ސަގާފަތް ޑިޖިޓަލް ޓެކްނޮލޮޖީގެ އެހީގައި ދެމެހެއްޓުމަށް އެޅޭ މުހިންމު ފިޔަވަޅެއް ކަމަށެވެ. "މި ޕްރޮޖެޮޖެކްޓުގެ ސަބަބުން އަޅުގަނޑުމެންގެ ޤައުމީ ތަރިކަ ރައްކާތެރިކަމާއެކު ޑިޖިޓަލް ފޯމެޓަށް ބަދަލުކޮށް، އަންނަން އޮތް ޖީލުތަކަށް ފަސޭހައިން ލިބޭނެ މަގު ތަނަވަސްވެގެންދާނެ," އޭނާ ވިދާޅުވިއެވެ.މި ޕްރޮޖެކްޓްގެ ފުރަތަމަ މަރުޙަލާގައި، ޤައުމީ އަރުޝީފުގައި ހުރި މުހިންމު ލިޔެކިޔުންތަކާއި ފޮޓޯތައް ޑިޖިޓަލައިޒްކޮށް، އޮންލައިން ޕްލެޓްފޯމެއްގައި ޝާއިޢުކުރެވޭނެއެވެ. މީގެ އިތުރުން، ދިވެހިރާއްޖޭގެ ތާރީޚާއި ސަގާފަތާ ގުޅޭ އޯޑިއޯ އަދި ވީޑިއޯ ރެކޯޑިންގތައްވެސް މި ޕްލެޓްފޯމްގައި ހިމެނޭނެއެވެ.މި ޕްރޮޖެކްޓްގެ ދެވަނަ މަރުޙަލާގައި، އާންމު ރައްޔިތުންނަށް އެމީހުންގެ އަމިއްލަ ތާރީޚީ ލިޔެކިޔުންތަކާއި ފޮޓޯތައް މި ޕްލެޓްފޯމަށް އަޕްލޯޑްކުރުމުގެ ފުރުޞަތު ލިބިގެންދާނެއެވެ. މިއީ ދިވެހި މުޖުތަމަޢުގެ ތާރީޚާއި ސަގާފަތް އިތުރަށް ފުރިހަމަކޮށް، ރައްކާތެރިކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.ޤައުމީ ޑިޖިޓަލް އާކައިވް ޕްރޮޖެކްޓްގެ ޕްރޮޓޯޓައިޕް ތަޢާރަފުކުރުމާއެކު، ދިވެހިރާއްޖޭގެ ތާރީޚާއި ސަގާފަތް ޑިޖިޓަލް ޓެކްނޮލޮޖީގެ އެހީގައި ދެމެހެއްޓުމަށް އެޅުނު މުހިންމު ފިޔަވަޅެއްގެ ގޮތުގައި ގިނަ ފަރާތްތަކުން މި މަޝްރޫޢު ފާހަގަކޮށްފައިވެއެވެ. މި ޕްރޮޖެކްޓްގެ ސަބަބުން ދިވެހިރާއްޖޭގެ މާޒީއާއި މުސްތަޤުބަލު ގުޅުވައިދިދޭ މުހިންމު ފާލަމަކަށް ވެގެންދާނެ ކަމަށް ބެލެވެއެވެ.