ރައިޒް އީސްޓް އެންޓަޓެއިންމަންޓުން އުފައްދައި އާރް. ކާތިކް ލިޔެ ޑައިރެކްޓްކޮށްފައިވާ ފިލްމު "މޭޑް އިން ކޮރެއާ" މި މަހު ނެޓްފްލިކްސްގައި ޕްރީމިއާ ކުރާނެކަން އިއުލާނުކޮށްފިއެވެ. މި ފިލްމަކީ އިންޑިއާގެ ތަމަޅަ އަދި ތެލުގޫ ފިލްމުތައް ކުޅޭ ބަތަލާ ޕްރިޔަންކާ އަރުލް މޯހަން ލީޑް ރޯލްއިން ފެންނާނެ ފިލްމެކެވެ. މި މަހުގެ 12 ވަނަ ދުވަހު "މޭޑް އިން ކޮރެއާ" ނެޓްފްލިކްސްގައި ޕްރީމިއާ ކުރާނެއިރު ފިލްމުގައި ފެނިގެންދާނީ، ތަމަޅަ ނާޑޫއިން ދެކުނު ކޮރެއާއަށް އަންހެން ކުއްޖަކު ކުރާ ހިތްގައިމު އަދި ދިރިއުޅުން ބަދަލުކޮށްލާފަދަ ދަތުރެކެވެ. ނުވިސްނާ ހުއްޓާ ކޮރެއާގެ ސޯލްއަށް ދިއުމުގެ ފުރުސަތު ލިބުމުން، ހަގީގީ ދިރިއުޅުމުގެ ގޮންޖެހުންތައް ދަސްވެ އެކަންކަމުން އަރައިގަންނަން އަންހެންކުއްޖަކު ކުރާ މަސައްކަތްތައް ފިލްމުގައި ދައްކުވައިދޭނެއެވެ. ފިލްމު "މޭޑް އިން ކޮރެއާ"ގެ މަންޒަރެއް--ފޮޓޯ/ބޮލީވުޑްހަންގާމާ މި ފިލްމާ ގުޅޭގޮތުން ވާހަކަ ދައްކަމުން ޑައިރެކްޓަރު ކާތިކް ބުނީ، ކޮރެއާ އަދި ތަމަޅަ ސަގާފަތާއި ތާރީހުގައި ހުރި ގާތް ގުޅުންތަކަކީ އޭނާ ވަރަށް ބޮޑަށް ޝައުގުވެރިވި ކަންކަން ކަމަށެވެ. އެގޮތުން "މޭޑް އިން ކޮރެއާ" އަކީ މި ދެ ސަގާފަތުގެ މެދުގައިވާ ހާއްސަ ގުޅުން ފާހަގަކޮށްދޭނެ، ހިތްހަމަޖެހުން ގެނެސްދޭނެ ފިލްމެއް ކަމަށާއި ބަހުގެ ހުރަސްތަކުން ބޭރުވެ، ދެ ޤައުމުގެ ސަގާފަތްތަކަށް ވެސް ބެލުންތެރިންގެ ހިތްޖައްސުވައިދޭނެ ފިލްމަށް މި ފިލްމުވާނެ ކަމަށް ޑައިރެކްޓަރު ކާތިކް ވަނީ ބުނެފައެވެ. ހަމައެއާއެކު މިފަދަ ވާހަކަތަށް ބެލުންތެރިންނަށް ގެނެސްދިނުމަށްޓަކައި ނެޓްފްލިކްސްއިން ދޭ އެއްބާރުލުމަށް ޝުކުރުވެރިވާ ކަމަށް ވެސް އޭނާ ބުންޏެވެ. ނެޓްފްލިކްސް އިންޑިއާގެ ކޮންޓެންޓް ވައިސް ޕްރެޒިޑެންޓް މޯނިކާ ޝަރުގިލް ވިދާޅުވީ، ދެކުނު އިންޑިއާގެ ފިލްމުތަކަށް ދޭ ސަމާލުކަން އެ ޕްލެޓްފޯމްއިން އިތުރު ކުރަމުންދާއިރު، މަގްސަދަކީ އަމިއްލަ ސަގާފަތަށް ބިނާވެފައިވާ، އެހެންނަމަވެސް ބޭރު ދުނިޔޭގެ ގިނަ ބަޔަކަށް ކަމުދާނެ ކޮންޓެންޓްތަކާއި ވާހަކަތައް ގެނެސްދިނުން ކަމަށެވެ. "މޭޑް އިން ކޮރެއާ" އަކީ މި ތަސައްވުރުގެ ވަރަށް ފުރިހަމަ މިސާލެއް ކަމަށާއި، މިއީ ތަމަޅަ ނާޑޫގެ ކުޑަ އަވަށެއްގެ އަންހެން ކުއްޖެއްގެ ހުވަފެންތަކާއި، އޭނާގެ ވަކިވުމާއި، އަމިއްލަ ވަންތަކަން ހޯދުމުގެ މައްޗަށް ބިނާވެފައިވާ ވަރަށް 'ޔުނީކް' ވާހަކައެއް ކަމަށް އޭނާ ވިދާޅުވިއެވެ. މި ފިލްމުގެ ބަތަލާ ޕްރިޔަންކާ މޯހަންއާ އެކު ފިލްމުން ދެން ފެންނާނީ ދެކުނު ކޮރެއާގެ މަޝްހޫރު އެކްޓަރުން ކަމަށްވާ، "ސްކުއިޑް ގޭމް"ގެ ތަރިން ޕާކް ހައި-ޖިން އަދި ނޯ ހޯ-ޖިންއެވެ.