އިންޑިއާ ކަނޑުގެ އީރާންގެ މަނަވަރެއް ފައްތާލީ އެމެރިކާގެ ސަބްމެރިންއަކުން ދިން ޓޯޕިޑޯ ހަމަލާއެއްގައި ކަމަށް އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވުމަށް ފަހު އެ ހަމަލާގެ ވީޑިއޯ އާންމުކޮށްފި އެވެ. ޖުމުލަ 180 ފަޅުވެރިން ދަތުރުކުރަމުންދިޔަ މި މަނަވަރުން އެހީއަށް އެދުނީ މިއަދު ފަތިހުގެ ވަގުތެއްގައި ކަމަށް ލަންކާގެ އިދާރާތަކުން ބުނެ އެވެ. އޭގެ ތެރެއިން ވަރަށް ބޮޑަށް ޒަހަމްވެފައި ތިބި 32 ސިފައިން ވަނީ ސަލާމަތްކޮށްފަ އެވެ.މަނަވަރު އަޑިއަށް ދިޔައީ ލަންކާގެ ދެކުނުން 40 ކިލޯމީޓަރު ބޭރުންނެވެ. ބާކީ ތިބި ފަޅުވެރިން ހޯދުމުގެ މަސައްކަތް ލަންކާގެ އަސްކަރިއްޔާއިން އަންނަނީ ކުރަމުންނެވެ."އީރާންގެ މަނަވަރު ފައްތާލީ، ރައްކާތެރިކަން ލިބޭނެ ކަމަށް ހީކޮށް ބައިނަލްއަގުވާމީ ކަނޑުގެ ސަރަހައްދުގައި އޮއްވައި، އެމެރިކާގެ ޓޯޕިޑޯއަކުން،" ހެގްސެތު ނޫސްވެރިންގެ ބައްދަލުވުމެއްގައި ވިދާޅުވި އެވެ. ޕެންޓަގަން އިން ބުނީ އެމެރިކާ އާއި އިޒްރޭލުން އީރާނަށް ދޭ ހަމަލާތަކުގެ އެއް މަގްސަދަކީ އީރާންގެ ކަނޑުގެ ސިފައިންގެ ބާރު ނައްތާލުން ކަމަށެވެ. އެ ހާދިސާ ހިނގީ ލަންކާ ސަރަހައްދުގެ ކަނޑުގައި ކަމުން ލަންކާ ކަނޑުގެ ސިފައިންނާއި ވައިގެ ސިފައިންގެ ފަރާތުން ވަގުތުން އެކަމަށް އިޖާބަދީފައިވާ ކަމަށް ކަނޑުގެ ސިފައިންގެ އޮފިޝަލަކާ ހަވާލާދީ ލަންކާގެ ނޫހެއް ކަމަށްވާ ޑެއިލީ މިރާއިން ރިޕޯޓުކޮށްފައިވެއެވެ.ލަންކާގެ ދިފާއީ ވުޒާރާއިން ބުނީ މަނަވަރުގައި ދެން ތިބި ފަޅުވެރިން ހޯދުމުގެ މަސައްކަތް ކުރަމުން އަންނަ ކަމަށާއި އެ އުޅަނދު އަޑިއަށް ދިޔައީ ލަންކާގެ ދެކުނުން 40 ކިލޯމީޓަރު (25 މޭލު) ބޭރަށް ކަމަށެވެ.މި ހަމަލާއާ ގުޅޭގޮތުން އިރާނުން އަދި ވަކި އެއްޗެއް ބުނެފައެއް ނުވެ އެވެ.