އެމެރިކާއާއި ވެނެޒުއޭލާއާ ދެމެދު ކެނޑިފައިވާ ޑިޕްލޮމެޓިކް ގުޅުން އަލުން ގާއިމުކުރުމަށް ދެ ގައުމުން އެއްބަސްވެއްޖެއެވެ. މިއީ އެތައް އަހަރެއް ވަންދެން ދެ ގައުމުގެ ދެމެދުގައި އުފެދިފައިވާ ނުތަނަވަސްކަމަށްފަހު، ގުޅުން ބަދަހިކުރުމަށް އެޅުނު ތާރީޚީ ފިޔަވަޅެކެވެ. އެމެރިކާގެ ސްޓޭޓް ޑިޕާޓްމަންޓުން ނެރުނު ބަޔާނެއްގައި ބުނެފައިވަނީ، އެމެރިކާ އާއި ވެނެޒުއޭލާގެ ވަގުތީ ސަރުކާރާ ދެމެދު ޑިޕްލޮމެޓިކް އަދި ކޮންސިއުލާ ގުޅުން އަލުން ގާއިމުކުރުމަށް އެއްބަސްވެފައިވާ ކަމަށެވެ. މި ފިޔަވަޅުގެ މަގުސަދަކީ ވެނެޒުއޭލާގައި ހަމަޖެހުން ގާއިމުކުރުމާއި، އިގުތިސާދީ ގޮތުން އަރައިގަތުމަށް އެހީތެރިވުމުގެ އިތުރުން، ސިޔާސީ ގޮތުން ސުލްހަވެރިކަން ގެނައުމަށް ގުޅިގެން މަސައްކަތްކުރުން ކަމަށް އެ ބަޔާނުގައި ވެއެވެ. https://www.sun.mv/216228 ސްޓޭޓް ޑިޕާޓްމަންޓުން އިތުރަށް ފާހަގަކޮށްފައިވާ ގޮތުގައި، އަލުން ގުޅުން ބަދަހިކުރުމުގެ މައިގަނޑު އަމާޒަކީ ވެނެޒުއޭލާގެ ރައްޔިތުންނަށް އެހީތެރިކަން ފޯރުކޮށްދިނުމެވެ. އަދި ޑިމޮކްރެޓިކް އުސޫލުން އިންތިޚާބުކުރެވޭ ސަރުކާރަކަށް ސުލްހަވެރިކަމާއެކު ބާރުތައް ބަދަލުކުރުމަށް މަގުފަހިކުރުމަށްޓަކައި، މަރުހަލާތަކަކަށް ބަހާލައިގެން މަސައްކަތްތަކެއް ކުރިއަށް ގެންދާނެ ކަމަށްވެސް އެމެރިކާއިން ވަނީ ބުނެފައެވެ. މީގެ އިތުރުން، ވެނެޒުއޭލާގެ ރައްޔިތުންނަށް އެހީތެރިވުމަށާއި، ސަރަހައްދީ ހަމަޖެހުމާއި ތަރައްގީއަށްޓަކައި ސަރަހައްދުގެ އެހެން ގައުމުތަކާ ގުޅިގެން މަސައްކަތްކުރުމަށް އެމެރިކާއިން އޮތީ ތައްޔާރަށް ކަމަށްވެސް އެ ބަޔާނުގައި ވެއެވެ. މިކަމުގެ ސަބަބުން، ފާއިތުވި އަހަރުތަކުގައި އެމެރިކާއިން ވެނެޒުއޭލާއާ މެދު ގެންގުޅުނު ހަރުކަށި ސިޔާސަތުތަކަށް ބޮޑު ލުޔެއް ލިބިގެންދާނެ ކަމަށް މުރާސިލުން ލަފާކުރެއެވެ. ދެ ގައުމުގެ ގުޅުން އަލުން ގާއިމުކުރުމަށް މި ނިންމީ، ވެނެޒުއޭލާގެ ސިޔާސީ މަސްރަހަށް ބޮޑެތި ބަދަލުތަކެއް އައިސްފައިވާ ދަނޑިވަޅެއްގައެވެ. މިއަހަރުގެ ޖަނަވަރީ މަހުގެ ތިން ވަނަ ދުވަހު އެމެރިކާގެ އަސްކަރިއްޔާއިން ހިންގި “އޮޕަރޭޝަން އެބްސޮލިއުޓް ރިޒޯލްވް” ގެ ދަށުން، ވެނެޒުއޭލާގެ އޭރުގެ ރައީސް ނިކޮލަސް މަޑޫރޯ އާއި އޭނާގެ އަނބިކަނބަލުން ސީލިއާ ފްލޯރެސް ވަނީ ކަރާކަސްއިން ހައްޔަރުކޮށްފައެވެ. އެމެރިކާގެ ޚާއްސަ ފައުޖުތަކުން ހިންގި މި އޮޕަރޭޝަނަށްފަހު، މަޑޫރޯ ވަނީ އެމެރިކާއަށް ގެންގޮސްފައެވެ. އޭނާގެ މައްޗަށް ވަނީ މަސްތުވާތަކެތީގެ ވިޔަފާރިއާއި ނާކޯ-ޓެރަރިޒަމްގެ ބޮޑެތި ދައުވާތަކެއް އުފުލާފައެވެ. އެމެރިކާއިން ހައްޔަރުކޮށްފައިވާ ވެނަޒުއޭލާގެ ކުރީގެ ރައީސް މަޑޫރޯ -- ފޮޓޯ: އޭއެފްޕީ މިދިޔަ ޖަނަވަރީ ފަސް ވަނަ ދުވަހު ނިއުޔޯކްގެ ކޯޓެއްގައި ކުރިއަށްދިޔަ އަޑުއެހުމުގައި މަޑޫރޯ ވަނީ އެ ދައުވާތަކަށް އިންކާރުކުރައްވާފައެވެ. މި ހާދިސާއަށްފަހު، ވެނެޒުއޭލާގެ ވަގުތީ ރައީސެއްގެ ގޮތުގައި ހުވާކުރެއްވީ އޭރުގެ ނައިބު ރައީސް ޑެލްސީ ރޮޑްރިގޭޒްއެވެ. އޭގެ ފަހުން، ކަރާކަސްގައި ގާއިމުވެފައިވާ ވަގުތީ ސަރުކާރާއި ވޮޝިންޓަނާ ދެމެދު މަޑުމަޑުން ދިޔައީ ގުޅުންތައް ބަދަހިކުރަމުންނެވެ. އަދި ވެނެޒުއޭލާގައި ހައްޔަރުކޮށްފައި ތިބި އެތައް ސަތޭކަ ސިޔާސީ ކުށްވެރިންނެއްވެސް ވަނީ ދާދި ފަހުން މިނިވަންކޮށްފައެވެ. ފާއިތުވި ދިހަވަރަކަށް އަހަރު ތެރޭގައި އެމެރިކާއާއި ވެނެޒުއޭލާއާ ދެމެދު އޮތް ޑިޕްލޮމެޓިކް ގުޅުން އޮތީ ވަރަށް ބޮޑަށް ހީނަރުވެފައެވެ. ދެ ގައުމުގެ އެމްބަސީތައް ބަންދުކޮށް، ރަސްމީ މުއާމަލާތްތައް އޮތީ ގާތްގަނޑަކަށް ހުއްޓިފައެވެ. މީގެ އިތުރުން، އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ވެނެޒުއޭލާގެ ތެލުގެ ސިނާއަތަށާއި މުޅި އިގުތިސާދަށް އޮތީ ބޮޑެތި ގެއްލުންތަކެއް ލިބިފައެވެ. ނަމަވެސް، އަލުން ޑިޕްލޮމެޓިކް އަދި ކޮންސިއުލާ ގުޅުން ގާއިމުކުރުމަކީ، ވެނެޒުއޭލާގެ އިގުތިސާދު ކޮޅަށްޖެހުމަށާއި ސިޔާސީ ހަމަޖެހުން ގެނައުމަށް އެމެރިކާއިން ގެންގުޅޭ ސިޔާސަތަށް އައި ބޮޑު ބަދަލެއްކަން ފާހަގަކުރެވެއެވެ. ރަސްމީ ފަރާތްތަކުން ބުނާ ގޮތުގައި، މި ގުޅުމުގެ ސަބަބުން ވެނެޒުއޭލާގެ ތެލުގެ ސިނާއަތަށް އަޅާފައިވާ ފިޔަވަޅުތަކަށް ލުޔެއް ލިބި، އެ ގައުމުގެ އިގުތިސާދީ ހާލަތު ރަނގަޅުވުމުގެ މަގު ތަނަވަސްވެގެންދާނެއެވެ.