ހޯމް މިނިސްޓަރު އުމަރު ނަސީރުގެ މައްޗަށް ކުރާ ޖިނާއީ ދައުވާގެ މައްސަލަ ބައްލަވާ ގާޒީ އަބްދުﷲ ދީދީ (ޑީޑީ) ގެ ބަދަލުގައި އެހެން ގާޒީއަކު ހަމަޖައްސަން އުމަރު އެދިވަޑައިގަތް ނަމަވެސް ގާޒީ ޑީޑީގެ ސެކްޝަންގައި އޭނާގެ ޝަރީއަތް މާދަމާ ބާއްވަން ތާވަލްކޮށްފި އެވެ. އެކަމަކު އެގޮތަށް ތާވަލްކޮށްފައި އޮތަސް ގާޒީ ޑީޑީ ނޫން އެހެން ގާޒީއަކު ވެސް އެ ޝަރީއަތް ކުރިއަށް ގެންދަވާފާނެ އެވެ. މީގެ ކުރިން ވެސް ވަކި ގާޒީއެއްގެ ސެކްޝަންގައި ތާވަލްކުރާ މައްސަލަތައް އެހެން ގާޒީން ކުރިއަށް ގެންދަވާފައި އެބަ ހުއްޓެވެ. ރާއްޖޭގެ އަމާންކަމަށް ގެއްލުން ލިބިދާނެ ފަދަ ވާހަކައެއް ދެއްކެވި ކަމަށް ބުނެ އުމަރުގެ މައްޗަށް ކުރާ ދައުވާގެ މައްސަލަ ބައްލަވާ ގާޒީ ޑީޑީގެ ބަދަލުގައި އެހެން ގާޒީއަކު ހަމަޖައްސައި ދިނުމަށް އެދިވަޑައިގެން އުމަރު ވަނީ އުއްތަމަ ފަނޑިޔާރާއި ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދަށް ވެސް ސިޓީ ފޮނުއްވައިފަ އެވެ. އެގޮތަށް ސިޓީ ފޮނުއްވާފައި ވަނިކޮށް ގާޒީ ޑީޑީގެ ސެކްޝަންގައި މާދަމާ މެންދުރު 12:00 އަށް އެ ޝަރީއަތް ތާވަލްކުރީ ގާޒީ ބަދަލުކޮށްފައި ކަމެއް ނުވަތަ ނޫން ކަމެއް "ހަވީރަ"ށް އެނގިފައެއް ނުވެ އެވެ. އެންމެ ފަހުން އޮތް އަޑުއެހުމުގައި ގާޒީ ޑީޑީ ވިދާޅުވެފައި ވަނީ ދެން އޮންނާނީ އެންމެ ފަހުގެ އަޑުއެހުން ކަމަށެވެ. އެ ޝަރީއަތުގައި އުމަރުގެ ފަރާތުން ނެގި އިޖްރާއީ ނުކުތާތައް ބަލައިނުގަންނަވަން ގާޒީ ޑީޑީ ވަނީ ނިންމަވައިފަ އެވެ. އެ ނިންމުން ލިޔުމުން ދިނުމަށް އުމަރުގެ ފަރާތުން އެދުނު ނަމަވެސް ގާޒީ އެކަމަށް ދެކޮޅުހެއްދެވުމުން ޝަރީއަތުގައި ވާހަކަ ދައްކަން އުމަރުގެ ފަރާތުން ވެސް ވަނީ ދެކޮޅުހަދައިފަ އެވެ. މިއީ ރާއްޖޭގެ ތާރީޚުގައި ދައުލަތުގެ ވަޒީރެއްގެ މައްޗަށް ޖިނާއީ ޝަރީއަތެއް ހިންގާ ފުރަތަމަ ފަހަރެވެ. ގާޒީ ބަދަލުކޮށްދޭން އުމަރު އެދިވަޑައިގަތްއިރު، ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަދި އެމްޑީއޭގެ ލީޑަރު އަހުމަދު ސިޔާމް މުހައްމަދުގެ މައްޗަށް ކުރާ ޖިނާއީ ދައުވާގެ މައްސަލަ އެންމެ ފުރަތަމަ ބެއްލެވި ގާޒީ ބަދަލުކޮށްދޭން އޭނާ އެދިވަޑައިގަތުމުން އެކަން ވަނީ ކޮށްފަ އެވެ. ގާޒީ އަހުމަދު ސަމީރު އަބްދުލްއަޒީޒް ބައްލަވަމުން ގެންދެވި އެ ޝަރީއަތް މިހާރު ކުރިއަށް ގެންދަވަނީ އިސް ގާޒީ އަބްދުﷲ މުހައްމަދެވެ.