ކޮވިޑް 19 އިން ރައްކާތެރިވުމަށް އަވަށްޓެރި ސްރީލަންކާ ލޮކްޑައުން ކުރުމާ ގުޅިގެން ރާއްޖޭގެ ކޮވިޑް ފިޔަވަޅުތައް ހަރުދަނާކުރަން ކުރީގެ ރައީސް މައިމޫން އަބްދުލްގައްޔޫމު ގޮވާލައްވައިފި އެވެ.
ކޮވިޑް ކޮންޓްރޯލް ކުރުމަށް ލަންކާ ސަރުކާރުން އެ ގައުމު ލޮކްޑައުން ކުރީ ރެއިން ފެށިގެން މިމަހުގެ 30 ވަނަ ދުވަހުގެ ނިޔަލަށެވެ.
މިކަމާ ގުޅިގެން ރައީސް މައުމޫން މިއަދު ކުރެއްވި ޓްވީޓެއްގައި ވިދާޅުވީ ރާއްޖޭގައި އަޅާފައިވާ ފިޔަވަޅުތައްވެސް އިތުރަށް ހަރުދަނާކުރަން ޖެހޭ ކަމަށެވެ.
ރައީސް މައުމޫން މީގެކުރިން ވެސް ވަނީ ކޮވިޑް ފިޔަވަޅުތައް ވަރުގަދަ ކުރުމަށް ކަމާ ގުޅޭ އިދާރާތަކަށް ދެ ފަހަރެއްގެ މަތިން ގޮވާލައްވާފަ އެވެ.
ރައީސް މައުމޫނަށް ކޮވިޑް ޖެހި އެމަނިކުފާނު މީގެ ކުރިން ވަނީ އެ ބައްޔަށް ފަރުވާ ވެސް ހޯއްދަވާފަ އެވެ.
ރާއްޖެއިން އިއްޔެ ކޮވިޑް ބައްޔަށް ޕޮޒިޓިވްވީ 95 މީހެކެވެ. އެހެންކަމުން ރާއްޖޭގެ ކޮވިޑް ނަންބަރު މިހާރު ވަނީ 79،754 އަށް އަރާފަ އެވެ.
މިވަގުތު ރާއްޖޭގައި ކޮވިޑުން ރަނގަޅު ނުވެ ތިބީ 1،750 މީހުންނެވެ. މިހާތަނަށް 77،770 މީހުން ވަނީ ކޮވިޑުން ރަނގަޅުވެފަ އެވެ. މިވަގުތު ވެސް ހޮސްޕިޓަލްގައި އެޑްމިޓްކޮށް 16 މީހަކަށް ދަނީ ފަރުވާ ދެމުންނެވެ. މިއަދާ ހަމައަށް 222 މީހަކު ވަނީ ކޮވިޑް ބަލީގައި މަރުވެފަ އެވެ.