އެޕަލް ޓީވީއިން ގެނެސްދެމުން އަންނަ މަގުބޫލު ޓީވީ ޑްރާމާ ސީރީޒް "ދަ މޯނިންގް ޝޯ" އަންނަ އަހަރު ދައްކާ ފަސް ވަނަ ސީޒަނާ އެކު، ނިންމާލާނެ ކަމަށް ރިޕޯޓުތަކުން ބުނެފިއެވެ. ދެހާސްނަވާރަ ވަނަ އަހަރު ދައްކަން ފެށި މި ސީރީޒްގެ މައިގަނޑު ރޯލުތައް ކުޅެފައިވަނީ މަޝްހޫރު ދެ ބަތަލާ ކަމަށްވާ ޖެނިފާ އެނިސްޓަން އާއި ރީސް ވިދަސްޕޫން އެވެ. މިއީ އެޕަލްގެ ސްޓްރީމިންގް ޕްލެޓްފޯމް ފެށިއިރު ނެރުނު އެންމެ ފާހަގަކޮށްލެވޭ އެއް އުފެއްދުމެވެ. މިހާތަނަށް މި ސީރީޒް ވަނީ އެމީ އެވޯޑާއި، އެސްއޭޖީ އެވޯޑްގެ އިތުރުން ކްރިޓިކްސް ޗޮއިސް އެވޯޑް ފަދަ ޝަރަފުވެރި އެތައް ކާމިޔާބީތަކެއް ހޯދާފައެވެ. މި ސީރީޒްގެ އެގްޒެކެޓިވް ޕްރޮޑިއުސަރެއްގެ ޒިންމާވެސް އުފުލާ އެނިސްޓަން ބުނި ގޮތުގައި، މި ސީރީޒް ނިންމާލުމަށް ކްރިއޭޓިވް ޓީމަށް ފުރިހަމަ ފުރުސަތު ލިބިފައިވާ ކަމަށެވެ. ޖެނިފަ އެނިސްޓަން އަދި ރީސް ވިދަސްޕޫން ޑްރާމާ ސީރީޒް "ދަ މޯނިންގް ޝޯ"ގެ މަންޒަރެއްގައި--ފޮޓޯ/ވެރައިޓީ "މި ސީރީޒް ފެށުނީއްސުރެ އެޕަލްއިން ވަނީ އަޅުގަނޑުމެންގެ ތަސައްވުރަށް ފުރިހަމަ އެއްބާރުލުން ދީފައި. އަޅުގަނޑުމެން މިހާރު މިތިބީ އެއް އާއިލާއެއްގެ ގޮތުގައި. މިއީ ފަހު ސީޒަންކަން އެނގި ތިބެ، މި ވާހަކަ އެންމެ ފުރިހަމަ ގޮތުގައި ނިންމާލުމުގެ ފުރުސަތު ލިބުމަކީ އަޅުގަނޑުމެންނަށް ލިބުނު އުފަލެއް،"ޖެނިފަ ނެރުނު ބަޔާނެއްގައި ބުނެފައިވެއެވެ. ވިދަސްޕޫން ބުނި ގޮތުގައި މި ސީރީޒްގައި މަސައްކަތް ކުރުމަކީ އޭނާގެ ހަޔާތުގައި ލިބުނު ވަރަށް ބޮޑު ޝަރަފެކެވެ. އޭނާ ފާހަގަކުރި ގޮތުގައި މިއީ ހަމައެކަނި ނިއުސްރޫމެއްގެ ވާހަކައެއް ނޫނެވެ. މިއީ ނިއުސްރޫމްތަކުގެ މުހިންމުކަމާއި، ނޫސްވެރިކަމުގެ މިނިވަންކަމާއި، ޑިމޮކްރަސީގެ ހަތަރުވަނަ ބާރު ހިމާޔަތްކުރުމަށް ނޫސްވެރިން އުފުލާ ބުރަ އާއި ކުރާ ގުރުބާނީގެ މައްޗަށް ބިނާވެފައިވާ ސީރީޒެކެވެ. އެމެރިކާގެ މަޝްހޫރު ހެނދުނުގެ ޕްރޮގްރާމެއްގެ ފަހަތުގައި ހިނގާ ކަންތައްތަކުގެ މައްޗަށް ބިނާކޮށްފައިވާ މި ސީރީޒްގައި، މީޑިއާގެ ދާއިރާ ބަދަލުވަމުންދާ ގޮތާއި، ބާރުގެ ހައިބަތާއި، އޮފީސް ސިޔާސަތު އަދި އަހްލާގީ މިންގަނޑުތަކާ ގުޅޭގޮތުން ކުރިމަތިވާ ގޮންޖެހުންތައް ދައްކުވައިދެއެވެ. މި ސީރީޒްގައި އެނިސްޓަން ކުޅެނީ ތަޖުރިބާކާރު ޕްރެޒެންޓަރު އެލެކްސް ލެވީގެ ރޯލެވެ. ވިދަސްޕޫން ފެނިގެންދަނީ އުންމީދީ ނޫސްވެރިޔާ ބްރެޑްލީ ޖެކްސަންގެ ރޯލުންނެވެ. މިހާތަނަށް ދެއްކި ހަތަރު ސީޒަނުގައި 'މީޓޫ' ހަރަކާތާއި، ކޮވިޑް-19ގެ ބަލިމަޑުކަމާއި، ނިއުސްރޫމްތަކުގެ ސިޔާސަތާއި، ކުންފުނިތައް އެއްކޮށްލުމާއި، ދޮގު މައުލޫމާތު ފެތުރުމުގެ އިތުރުން ނޫސްވެރިކަމަށް ޓެކްނޮލޮޖީގެ ސަބަބުން ކުރާ އަސަރުތައް ވަނީ ދައްކުވައިދީފައެވެ. މިހާރު ދައްކަމުންދާ ހަތަރުވަނަ ސީޒަނުގައި ފެނިގެންދަނީ މީޑިއާގެ ދެ ބޮޑު ކުންފުންޏެއް އެއްކޮށްލުމަށްފަހު، 'ޑީޕްފޭކް' އާއި ކުންފުނިތަކުގެ ސިއްރުތައް ފޮރުވުމަށް ކުރާ މަސައްކަތްތަކެވެ. ޝޯރަނަ ޗާލޮޓް ސްޓައުޓް ބުނި ގޮތުގައި، އެންމެ ފަހު ސީޒަން ހާއްސަވާނީ މި ސީރީޒްގެ މައިގަނޑު ކެރެކްޓާތަކުގެ ދިރިއުޅުން ނިމިގެންދާ ގޮތަށެވެ. މި ސީރީޒްގެ މުހިންމު ރޯލުތަކުން ބިލީ ކްރޫޑަޕް، މާކް ޑުޕްލާސް، ނެސްޓަ ކާބޮނެލް އަދި ޖޯން ހޭމް ފަދަ ތަރިން ފެނިގެންދެއެވެ. ފަސްވަނަ ސީޒަނުގައި ޖެފް ޑެނިއަލްސް އާއި ރެނޭ ރެޕް ފަދަ އާ ތަރިންތަކެއްވެސް ފެނިގެންދާނެއެވެ. މީޑިއާ ރެސްއިން އުފައްދާ "ދަ މޯނިންގް ޝޯ"ގެ އެގްޒެކެޓިވް ޕްރޮޑިއުސަރުންގެ ތެރޭގައި ސްޓައުޓް، މިމީ ލެޑާ، މައިކަލް އެލެންބާގް، ލޯރެން ނިއުސްޓެޑްޓާ، ކްރިސްޓިން ހާން، ޖެނިފާ އެނިސްޓަން އަދި ރީސް ވިދަސްޕޫން ހިމެނެއެވެ.