ހަނގުރާމައިގެ ސަބަބުން މެދުއިރުމަތީގެ މަޝްރަހު ގޯސްވެފައިވާތީ ރައްކާތެރި ނޫން ކަމަށް ބުނެ، އުމްރާ ގުުރޫޕަކުން އެންމެ ފަހު ވަގުތު ފުރުން ކެންސަލްކޮށްފި އެވެ.
ވީ ކިހިނެއް؟ - އަލްއަބްރާރް ނަމުގައި ހިންގާ އުމްރާ ގުރޫޕަކުން އަޅުކަމަށް 110 މީހުން ގެންދިޔުމަށް ވަނީ ނިންމާފަ އެވެ. އެކަމަކު ފަހު ވަގުތު ކެންސަލް ކުރުމުން، އޭގެ ތެރެއިން ބައެއް މީހުން ރޭ ވަނީ އެ ގުރޫޕުގެ އޮފީސް ދޮށަށް އަޑުގަދަކޮށްފަ އެވެ.
ތަފްސީލް - އެއްވި މީހުން ބުނި ގޮތުގައި، ހަނގުރާމަ މަތިކޮށް އެ މީހުންގެ ފުރުން ކެންސަލް ކުރީ އެންމެ ފަހު ވަގުތެވެ. ގުރޫޕުން ކުއްލި ގޮތަކަށް ބޭއްވި ބައްދަލުވުމެއްގައި ނިންމީ، އެ މީހުން ބުނިގޮތުގައި މި މަހުގެ ފަހުކޮޅާ ހަމައަށް ދާއިރު ވެސް ހަނގުރާމައަށް ވާނެ ގޮތެއް ނޭނގޭތީ އުމްރާއަށް މީހުން ނުގެންދާށެވެ. އެކަމަކު ބައެއް މީހުން ތުހުމަތު ކުރާ ގޮތުގައި އުމްރާގެ އިންތިޒާމްތަކަކަށް ގުރޫޕުން ފައިސާ ދައްކާފައެއް ވެސް ނެތެވެ. ގުރޫޕުން އެކަން ދޮގު ކުރެ އެވެ
ރޭ އޮފީސް ދޮށަށް އެއްވެ، ހިތްހަމަނުޖެހުން ފާޅުކުރި މީހުން އެދުނީ އުމްރާއަށް ދިޔުމަށް އެ މީހުން ދެއްކި 45،000ރ. އަނބުރާ ދިނުމަށެވެ. އެކަމަކު ގުރޫޕުން ފައިސާ ދިނީ، ޓިކެޓަށްވާ 15،000ރ. ކެނޑުމަށް ފަހު އެވެ.
އަބްރާރު ގުރޫޕުން ބުނީ އުމްރާގެ އިންތިޒާމްތަކަށް އެ މީހުން ފައިސާ ދައްކާފައިވާ ކަމަށާއި އެހެންވެ މީހުންނަށް ރިފަންޑް ދީފައިވަނީ ވެސް ހެޔޮއެދޭ ފަރާތްތަކުން ދީފައިވާ ފައިސާއިންނެވެ.
އުމްރާއަށް ދިޔުމަށް ތައްޔާރަށް ތިބި ބަޔަކަށް އަޅުކަމަށް ފުރޭގޮތް ނުވުމުން އެ މައްސަލަ މިހާރު ދަނީ އިސްލާމިކް މިނިސްޓްރީން ބަލަމުންނެވެ. އެ މިނިސްޓްރީން ބުނެފައިވާ ގޮތުގައި އުމްރާއަށް މީހުން ނުގެންދެވޭހާ މަސްރަހު އަދި ގޯހެއް ނޫނެވެ.
އަބްރާރު ގުރޫޕުން އުމްރާއަށް ނުދެވުނު 28 މީހަކަށް، ހައްޖު ކޯޕަރޭޝަނުން ވަނީ އެހީވެފަ އެވެ.
އެ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް މިއަދު އެކްސްގައި ވިދާޅުވީ، އެތަނުގައި ޖާގަ އޮތް މިންވަރުން، 28 މީހުންނަށް ވިސާ ހަމަޖައްސައި، މައްކާ އާއި މަދީނާއިން އެކޮމޮޑޭޝަނާއި ކެއިންބުއިމާއި ދަތުރުފަތުރުގެ އިންތިޒާމްތައް ހަމަޖައްސާފައިވާ ކަމަށެވެ. އަދި މިއަދު ހެނދުނު އެ މީހުން އުމްރާގެ އަޅުކަމަށް ފުރާފައިވާ ކަމަށް ވިދާޅުވި އެވެ.