އެމެރިކާއިން އީރާނަށް އެއްވެސް ކަހަލަ އަސްކަރީ ހަމަލާއެއް ދީފިނަމަ، އެމެރިކާގެ އަސްކަރީ މަރުކަޒުތަކަށާއި މަތިންދާބޯޓު އުފުލާ މަނަވަރުތަކަށް "ވަގުތުން އަދި ހަރުކަށި" ރައްދެއް ދޭނެ ކަމުގެ އިންޒާރު އީރާނުން އަނެއްކާވެސް ދީފިއެވެ. އީރާނުން މި އިންޒާރު ތަކުރާރުކޮށް މިދިނީ، އީރާނުގެ ނިއުކްލިއާ މައްސަލައިގައި އައު އެއްބަސްވުމަކަށް އައުމަށް އޮތް ވަގުތު ކުޑަވަމުންދާ ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް ހަރުކަށި އިންޒާރުތަކެއް ދެއްވާފައިވާ ދަނޑިވަޅެއްގައެވެ. މީގެ އިތުރުން، ޔޫރަޕްގެ އިއްތިހާދު (އީޔޫ) އިން އީރާނުގެ ވަރުގަދަ އަސްކަރީ ބާރު ކަމަށްވާ ރިވޮލިއުޝަނަރީ ގާޑްސް (އައިއާރުޖީސީ) އަކީ "ޓެރަރިސްޓް" ޖަމާއަތެއްގެ ގޮތުގައި ކަނޑައަޅައި ބްލެކްލިސްޓް ކުރުމާ ގުޅިގެން މަސްރަހު ވަނީ އިތުރަށް ގޯސްވެފައެވެ. https://sun.mv/217174 އީރާނުގެ އަސްކަރީ ތަރުޖަމާނު ބްރިގޭޑިއާ ޖެނެރަލް މުހައްމަދު އަކްރަމީނިއާ ދައުލަތުގެ ޓީވީ މެދުވެރިކޮށް ވިދާޅުވީ، އެމެރިކާގެ މަތިންދާބޯޓު އުފުލާ މަނަވަރުތަކަކީ ފަސޭހައިން ހަމަލާދީ ހަލާކުކޮށްލެވިދާނެ ވަސީލަތްތަކެއް ކަމަށެވެ. "ގަލްފް ސަރަހައްދުގައި ހުރި އެމެރިކާގެ ގިނަ އަސްކަރީ މަރުކަޒުތަކަކީ އަޅުގަނޑުމެންގެ މެދު ރާސްތާގެ މިސައިލްތަކުގެ ރޭންޖުގެ ތެރޭގައި ހުރި ތަންތަން،" އޭނާ ވިދާޅުވިއެވެ. މި ނުރައްކާތެރި ހާލަތާ ގުޅިގެން އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވަނީ ސަރަހައްދީ ބޮޑު ހަނގުރާމައަކަށް މަގުފަހިވެދާނެ ކޮންމެ ކަމަކުން ދުރުހެލިވުމަށް ގޮވާލައްވާފައެވެ. ގުޓަރޭޒް ވިދާޅުވީ، ނިއުކްލިއާ ވާހަކަތަކުގެ ތެރެއިން ހައްލެއް ހޯދުމަކީ މުޅި ސަރަހައްދުގެ ސަލާމަތަށް މަޖުބޫރު ކަމެއް ކަމަށެވެ. ދޭދޭ ގައުމުތަކުގެ މެދުގައި މެދުވެރިއެއްގެ ދައުރު އަދާކުރާ ގަތަރުން ވެސް ވަނީ މިކަމުގެ ތެރެއަށް ވަދެފައެވެ. ގަތަރުގެ އަމީރު ޝެއިޚް ތަމީމް ބިން ހަމަދު އަލްޘާނީ އާއި އީރާނުގެ ރައީސް މަސްއޫދު ޕެޒެޝްކިއަން ފޯނުން ގުޅުއްވައި، މަސްރަހު ފިނިކުރުމަށާއި ސަރަހައްދީ ހަމަޖެހުން ގާއިމުކުރުމާ ގުޅޭގޮތުން މަޝްވަރާ ކުރައްވާފައިވާ ކަމަށް ގަތަރު ނިއުސް އެޖެންސީން ރިޕޯޓްކުރެއެވެ. މި ސިޔާސީ ކޮޅިގަނޑުގެ ސަބަބުން އީރާނުގެ އާންމު ރައްޔިތުންގެ މެދުގައި ވަނީ ބޮޑު ބިރުވެރިކަމެއް އުފެދިފައެވެ. ހަނގުރާމައެއްގެ ބިރާއި، ބައިނަލްއަގުވާމީ ދަތިކުރުމުގެ ފިޔަވަޅުތަކުގެ ސަބަބުން އީރާނުގެ ފައިސާގެ އަގުވެއްޓި، ތަކެތީގެ އަގު އުފުލި، ރައްޔިތުންގެ އާންމު ދިރިއުޅުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ. އެމެރިކާއިން ބުނަމުންދަނީ އީރާނުން ނިއުކްލިއާ ހަތިޔާރު އުފެއްދުން ހުއްޓުވުމަށް ކުރަންޖެހުނު ކޮންމެ ކަމެއް ކުރާނެ ކަމަށެވެ. ނަމަވެސް އީރާނުން އަބަދުވެސް ބުނަމުންދަނީ އެ ގައުމުގެ ނިއުކްލިއާ ޕްރޮގްރާމަކީ ސުލްހަވެރި ބޭނުންތަކަށް ކުރިއަށްގެންދާ މަޝްރޫއެއް ކަމަށެވެ.