ކަނޑުމަގުން ހަ ކިލޯއަށްވުރެ ގިނަ އަދަދެއްގެ މަސްތުވާތަކެތި ރާއްޖެ އެތެރެކުރިކަމުގެ ތުހުމަތުގައި ދެ ޒުވާނަކު ފުލުހުން ހައްޔަރުކޮށްފިއެވެ. ފުލުހުން ބުނީ މި ދެ މީހުން ހައްޔަރުކޮށްފައިވަނީ ރާއްޖެއަށް މަސްތުވާތަކެތި އެތެރެކޮށް، ބޭނުންކޮށް ގެންގުޅެ އަދި އެ ތަކެތި ވިއްކައި ވިޔަފާރިކުރާކަމުގެ ތުހުމަތުގައި ކަމަށެވެ. ފުލުހުން ބުނީ މި މައްސަލައާއި ގުޅިގެން ހައްޔަރުކޮށްފައި ވަނީ މއ. ތަރިޖެހިއާގެ އުމުރުން 25 އަހަރުގެ ޢިސްމާއީލް އަބާން ޢަބްދުﷲ އާއި ސ. މަރަދޫ، ރަތްމާގެ އުމުރުން 19 އަހަރުގެ އަޙްމަދު ދާން ފަރްހޫދު ކަމަށެވެ. މި ދެ މީހުން ހައްޔަރުކޮށްފައި ވަނީ މޯލްޑިވްސް ކަސްޓަމްސް ސާވިސްއާއި ޑްރަގް އެންފޯސްމަންޓް ގުޅިގެން ހިންގި އޮޕަރޭޝަންގައި މި މަހު ފަސް ވަނަ ދުވަހުކަމަށާއި ދެ މީހުން ހައްޔަރުކޮށް ބަލައިފާސްކުރިއިރު ހަ ކިލޯއަށް ވުރެ ގިނަ މަސްތުވާތަކެތި ފެނިފައިވާކަމަށް ފުލުހުން ވަނީ ބުނެފައެވެ. މި މައްސަލައާ ގުޅިގެން އެ ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ދެ މީހުން ވެސް ފަސް ދުވަހަށް ބަންދުކުރުމަށް ކްރިމިނަލް ކޯޓުން ވަނީ އަމުރުކޮށްފައެެވެ. ކޯޓު އަމުރުގައި ވަނީ އެ ދެމީހުންގެ އަތުން ފެނިފައިވާ މަސްތުވާތަކެތީގެ ޖުމްލަ ބަރުދަނުގައި 6.3 ކިލޯ ހުރިކަމަށް އައިއޯ ބުނެފައިވާކަމަށާއި އެ ތަކެއްޗާ އެންމެ ފުރަތަމަ ހަވާލުވެފައިވަނީ ފަރްހޫދު ކަމަށެވެ. އަދި ކޮންޓްރޯލް ޑެލިވަރީ އޮޕަރޭޝަންގެ ތެރެއިން އަބާން އަބްދުﷲ މަސްތުވާތަކެއްޗާއި ހަވާލުވެފައި ވާކަމަށާއި ނަމަވެސް އެއީ އޭނާގެ ތަކެތި ނޫންކަމަށް ބުނެ އެ ތުހުމަތުތަކަށް އޭނާގެ ފަރާތުން އިންކާރުކޮށްފައިވާކަމަށް ކޯޓުއަމުރުގައި ވަނީ ބުނެފައެވެ. އަދި އަބާން އަބްދުﷲގެ ހަށިގަނޑު ބަލައި ފާސްކުރިއިރު މަސްތުވާތަކެތި ކަމަށް ޝައްކުކުރެވޭ އެއްޗެއްހުރި 10 ސެލޯފިން ކޮތަޅު ފެނިފައިވާކަމަށާއި އެ އެއްޗިއްސަކީ އޭނާ ބޭނުންކުރަން ގެންގުޅުނު ތަކެތި ކަމަށް ބުނެފައިވާކަމަށް ވެސް ކޯޓު އަމުރުގައި ވަނީ ބުނެފައެވެ. ފުލުހުން ވަނީ މި މައްސަލަ ފުލުހުން ތަހުގީގު ކުރަމުން ގެންދާ ކަމަށް ބުނެފައެވެ.