ކައުންސިލް އިންތިހާބުގައި އިދިކޮޅު އެމްޑީޕީގެ ޓިކެޓްގައި ހުޅުމާލެ އުތުރު ދާއިރާއަށް ވާދަކުރައްވާ ފާތިމަތު ޒަހިއްޔާ (ޒާޔާ) މިދިޔަ އޮކްޓޯބަރު މަހު ފޭސްބުކްގައި ޖެހި ޕޯސްޓަކާ ގުޅިގެން މާދަމާ ފުލުހަށް ހާޒިރުވުމަށް އަންގައިފި އެވެ.
ތަފްސީލް - އެމްޑީޕީގެ ގައުމީ މަޖިލީހުގެ މެންބަރު ޒަހިއްޔާ ވަނީ ފުލުހުން އޭނާއަށް ފޮނުވި ޗިޓް އެކްސްގައި ޕޯސްޓްކޮށްފަ އެވެ. އޭގައިވާ ގޮތުން އޭނާ ފުލުހަށް ހާޒިރުވާން އަންގާފައިވަނީ މާދަމާ މެންދުރުފަހު 2 ޖަހާއިރެވެ.
 ޗިޓުން އެނގޭ ގޮތުގައި އޭނާ ހާޒިރުވުމަށް އެންގީ، މީގެ ގާތްގަނޑަކަށް ތިން މަސް ކުރިން، 4 އޮކްޓޯބަރުގައި އޭނާގެ ފޭސްބުކް އެކައުންޓުން ކުރި ޕޯސްޓެއްގައި ފުލުހުންނަށް އިންޒާރު ދީފައިވާ ކަމަށް ތުހުމަތުކުރާ މައްސަލާގަ އެވެ.
އެއީ ކޮން ޕޯސްޓެއްކަން ޗިޓުގައި ނެތް ނަމަވެސް އެ ދުވަހު ޒަހިއްޔާ ކުރި ޕޯސްޓްގައި ލިޔެފައިވަނީ "17 ނޮވެމްބަރަށް ތައްޔާރުވުމަށް ކަނޑޫދޫ މިރުހުން ސްޕްރޭ ތައްޔާރުކުރަން ފަށައިފިން. ހަމަ ޖެހީ، ހަމަ ޖެހީ،" މި ގޮތަށެވެ.
އެނގުން މުހިންމު - މި މައްސަލާގައި އޮކްޓޯބަރު މަހުގެ ތެރޭގައި ޒަހިއްޔާގެ ފޯނު ފުލުހުން ހިފެހެއްޓި އެވެ. ފޯނު ދޫކޮށްލީ ގާތްގަނޑަކަށް ހަފްތާއެއް ފަހުންނެވެ.