ކުރީގެ ރައީސް އަދި އެމްޑީޕީގެ ރިޔާސީ ކެންޑިޑޭޓު މުހައްމަދު ނަޝީދާއި އަޅައިގަނެގެން ނޫޅޭ ކަމަށް ޖުމްހޫރީ ގުޅުމުގެ ރިޔާސީ ކެންޑިޑޭޓު ގާސިމް އިބްރާހިމަށް ތާއީދުކުރައްވާ އުމަރު ނަސީރު ވިދާޅުވެއްޖެ އެވެ.
ޖުމްހޫރީ ގުޅުމުން މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޕީޕީއެމް ޕްރައިމަރީގައި ވާދަކުރައްވާ ނާކާމިޔާބުވެވަޑައިގެންނެވި އުމަރު ނަސީރު ވިދާޅުވީ އޭނާގެ ކަންބޮޑުވެވަޑައިގަންނަވަނީ މަސްތުވާތަކެއްޗަށް ހިތްވަރުދޭ މީހަކު ރާއްޖޭގެ ރައީސުލްޖުމްހޫރިއްޔާކަމުގެ މަގާމަށް އައިސްދާނެތީ ކަމަށެވެ.
" އަޅުގަނޑުމެން 2006 ވަނަ އަހަރު ދައްކަމުން އައި ވާހަކަތައް ހަގީގަތެއްކަން ފަހުން އަޅުގަނޑުމެންނަށް އެނގުނު، 2008 ވަނަ އަހަރުގެ ފަހުކޮޅު، 2009 ، 2010 ، 2011 ، ގައި ވެސް އަޅުގަނޑުމެންނަށް އެކަން އެނގުނު، މުހައްމަދު ނަޝީދުގެ ފަރާތުން ވަރަށް ލާދީނީ ކަންކަން ފެންނަމުންދިޔަ އަދި މަސްތުވާތަކެއްޗަށް ހިތްވަރުދީ ވާހަކަ ދައްކަވަމުން ވެސް ގެންދިޔަ." އުމަރު ވިދާޅުވި އެވެ.
އުމަރު އިތުރަށް ވިދާޅުވީ ރައީސް ނަޝީދުގެ ތިން އަހަރު ދުވަހުގެ ވެރިކަމުގައި އެންމެ ފުރަތަމަ ފެނުނު މަންޒަރަކީ ކީރިތި ގުރުއާނާއި ބެހޭ މަރުކަޒު ބަންދުކުރަން އުޅުނު މަންޒަރު ކަމަށާއި އެކަމާއި ދެކޮޅަށް އިހްތިޖާޖުކޮށް މަސައްކަތްކުރި އެކަކީ އޭނާ ކަމަށެވެ.
އެއަށްފަހު ދެން ފެނުނީ ވަރަށް ފާޅުގައި ރާއްޖޭގައި ފައްޅިއެޅުން މަނާ ބިލު ތަސްދީގުނުކުރައްވާނެ ކަމަށް ރައީސް ނަޝީދު ވިދާޅުވެފައިވާތަން ކަމަށާއި އެ ބިލް ތަސްދީގު ނުކުރައްވާނެކަމަށް ރައީސް ނަޝީދު ވިދާޅުވި ވިދާޅުވުމުން ނަޝީދު އެހެން ދީންތައް މިގައުމަށް ގެންނަން މަސައްކަތްކުރާނެކަން ޔަގީންވި ކަމަށް އޭނާ ވިދާޅުވި އެވެ.
"ދެން ފެނުނީ އަރަބި އިސްލާމީ ތައުލީމް ކުޑަ ކުރުމަށްޓަކައި ބައެއް ފިޔަވަޅުތައް އަޅުއްވަމުން ގެންދެވި މަންޒަރު، ދެން އެއީ ވެރިކަމުގެ ތެރޭގައި، އަދި ބައިވަރު ކަންތައް ހިނގަމުންދިޔަ، ދާދި ފަހުން އަޅުގަނޑުމެންނަށް ފެނުނު ޑެންމާކުގައި ދެއްކެވި ވާހަކަފުޅުގައި ރަސޫލާގެ ހަދީޘްފުޅުތަކަށާއި ގުރުއާނަށް ޖޯކް ޖައްސަވާފައިވާ މަންޒަރު، އެހެންވީމަ މުހައްމަދު ނަޝީދަކީ ލާދީނީ މީހެއް ކަމާއިމެދަކު އަޅުގަނޑުމެންގެ ހިތުގައި އެއްވެސް ޝައްކެއް ނެތް." އުމަރު ވިދާޅުވި އެވެ.
ގާސިމް ބަނގުރަލާޢި އޫރު މަސް ވިއްކާ ކަމަށް ބުނެ ދެކެވޭ ވާހަކަތަކާއި ގުޅިގެން ނޫސްވެރިންގެ ބައްދަލުވުމުގައި މަދަނީ އިއްތިހާދުގެ ނައިބު ރައީސް އަބްދުﷲ މުހައްމަދު ވިދާޅުވީ އިސްލާމް ދީނުގައި ހަރާމާއި ހަލާލް ވަރަށް ސަރީހަ އިބާރާތުން ބަޔާންކޮށްފައިވާ ކަމަށާއި ދީނުގައި ހަރާން ކުރެއްވި ހުރިހާ ކަމަކީ މުސްލިމުން ދުރުވާން ޖެހޭ ކަމެއް ކަމަށެވެ.
"އަޅުގަނޑަކަށް ނުފެނޭ ގާސިމް އަތަށް ފުޅި ލައިގެން މަގުމަތީގައި ރާވިއްކަން އުޅޭތަނެއް، އަޅުގަނޑަކަށް ނުފެނޭ ގާސިމް މީޑިއާގައި ބުނާ ތަނެއް ބޯން ޖެހޭނެއޭ ބޮވެން ޖެހޭނެއޭ ބޯންވާނެއޭ ބުނާތަނެއް، ބުއި އެއްޗިއްސޭ ހަކުރު ގިނަވީމާ މިހެން ވަނީއޭ ފުށް ގިނަ ކުރަންޖެހޭނެއޭ، މިހެން ގާސިމް ވާހަކަ ދައްކާތަނެއް ނުފެނޭ، ހަމައެހެންމެ ގާސިމާއި މެދު ތުހުމަތުކޮށް ތެޔޮ ބިޑި ބޮއޭ ގަންޖާ ބޮއޭ މިކަހަލަ ވާހަކަދައްކާ އަޑެއް ވެސް ނީވޭ." ގާސިމް ވިދާޅުވި އެވެ.
ނަމަވެސް މިފަދަ ހުރިހާ ކަމެއް ފެނިފައިވަނީ ރައީސް ނަޝީދުގެ ފަރާތްޕުޅުން ކަމަށް ވެސް އަބްދުﷲ މުހައްމަދު ވިދާޅުވި އެވެ.
އުމަރު ވިދާޅުވީ ވޭތުވެދިޔަ ވިއްސަކަށް ތިރީހަކަށް ދުވަހުގެ ތެރޭގައި ކެމްޕެއިންގެ ހަރަކާތްތައް ކުރިއަށް ގެންދިޔަ ގޮތަށް ބަލާއިރު މިއަދުގެ ސިޔާސީ ހަގީގަތް ވަރަށް ސާފު ކަމަށާއި މިއަދުގެ ސިޔާސީ ހަގީގަތަކީ ރިޔާސީ އިންތިހާބުގައި ވާދަވެރިކަމާއިއެކީގައި ވާދަކުރައްވަނީ ގާސިމް އިބްރާހިމާއި ރައީސް ނަޝީދު ކަމަށެވެ.
އަދި ދެން ތިއްބެވި ކެންޑިޑޭޓުން ކަމަށްވާ ގައުމައިގެން ކުރިއަށް ކޯލިޝަންގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ ޑރ.މުހައްމަދު ވަހީދާއި ޕީޕީއެމްގެ ރިޔާސީ ކެންޑިޑޭޓު އަބްދުﷲ ޔާމީން އަބްދުލްގައްޔޫމް ތިއްބެވީ މާ ފަހަތުގައި ކަމަށާއި އެހެންކަމުން މުހައްމަދު ނަޝީދު އިންތިހާބުގައި ބަލިކުރުން އެއީ ދީނީ ގޮތުން ކޮންމެހެން ކުރަން ޖެހޭ ކަމެއް ކަމަށް އުމަރު ވިދާޅުވި އެވެ.
އެހެންކަމުން ވަގުތާއި ފައިސާ ބޭކާރު ނުކޮށް ޖުމްހޫރީ ގުޅުމާއި ގުޅިވަޑައިގަތުމަށް ދައުވަތުދެއްވާ ކަމަށާއި ޖުމްހޫރީ ގުޅުމުން ރައީސް ވަހީދަށާއި އަބްދުﷲ ޔާމީނަށް ވެސް މަރުހަބާ ދަންނަވަން ތައްޔާރަށް ތިއްބެވި ކަމަށް އުމަރު ވިދާޅުވި އެވެ.
"އެހެންކަމުން އަޅުގަނޑު އެދެނީ މުހައްމަދު ނަޝީދު އިންތިހާބުގައި ބަލިކުރުމަށްޓަކައި މިހާ ހިސާބަށް މި ރާއްޖޭގައި ކުރި ހުރިހާ ކަމެއް ކުރި އެންމެން މިތިބީ ޖުމްހޫރީ ކޯލިޝަންގައި މިހާރު، އެހެންވީމަ އަޅުގަނޑުމެންނާއިއެކު ވަޑައިގެންދެއްވާ އެމްޑީޕީ ބަލިކުރުމުގެ މަސައްކަތުގައި ބައިވެރިވެދެއްވުމަށް." އުމަރު ވިދާޅުވި އެވެ.
ރިޔާސީ އިންތިހާބުގައި ގާސިމް ދެވަނަ ބުރަށް ނުގޮސް ރައީސް ނަޝީދާއި ޔާމީން ދެވަނަ ބުރަށް ގޮސްފިނަމަ ޔާމީނަށް ތާއީދުކުރައްވާނަންތޯ ނޫސްވެރިޔަކު ސުވާލުކުރުމުން އުމަރު އެސުވާލަށް ސީދާ ޖަވާބެއް ނުދެއްވައެވެ. އޭނާ ވިދާޅުވީ ރައީސް ނަޝީދު އިންތިހާބުން ބަލިކުރެވޭނެ ހުރިހާ ފޯމިއުލާއެއް ބޭނުންކުރައްވާނެ ކަމަށާއި ދެވަނަ ބުރުގައި ހުރިހާ ޕާޓީއަކުން ވެސް ނިކުންނާނީ ރައީސް ނަޝީދާއި ދެކޮޅަށް ކަމަށެވެ.