ޒުވާނުންނަށް ފުރުސަތުތައް ހޯދައިދީ ޒުވާނުންނަކީ ރަގަޅު އަހުލާޤެއްގެ ވެރި ޒިންމާދާރު ބަޔަކަށް ހެދުމަށް މަސައްކަތް ކުރައްވާނެ ކަމަށް ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
އުމަރު އެގޮތަށް ވިދާޅުވީ "ބްލޫޒް ފޯ ޔޫތު"ގެ ނަމުގައި ފުރާވަރު ކުދިންނަށް ޚާއްސަކޮށްގެން މިއަދު ފެށި ހަތަރު ދުވަހުގެ ކޭމްޕް ފެށުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅު ދައްކަވަމުންނެވެ.
އުމަރު ވިދާޅުވީ ޒުވާނުންނަކީ ވަރަށް ވިސްނުން ތޫނު ބައެއްކަމަށާއި ޒުވާނުންގެ ކިބައިގައި ކަންކަން ރަގަޅުކުރުމުގެ ޤާބިލްކަން ހުރިކަމަށާއި ޒުވާނުންނަށް ފުރުސަތުތައް ހޯދައިދީ ޒުވާނުންނަކީ ރަގަޅު އަހުލާޤެއްގެ ވެރި ޒިންމާދާރު ބަޔަކަށް ހެދުމަށް މަސައްކަތް ކުރައްވަމުންގެންދަވާކަމަށް ވިދާޅުވިއެވެ.
އެގޮތުން ސްކޫލު ނިންމާ ކޮންމެ ކުއްޖަކުވެސް ޤައުމީ ޚިދުމަތުގައި 1 އަހަރު ނުވަތަ ދެ އަހަރުގެ މުއްދަތަށް މަސައްކަތްކުރަންޖެހޭ ގޮތް ހެދުމަށް މަސައްކަތްކުރައްވަމުންދާކަމަށް ވިދާޅުވިއެވެ.
މި ރަސްމިއްޔާތުގައި ވާހަކަފުޅުދައްކަވަމުން ކޮމިޝަނާ އޮފް ޕޮލިސް ހުސެއިން ވަހީދު ވިދާޅުވީ މި ކޭމްޕަކީ ވަރަށް މުހިއްމު މަޤުޞަދެއްގައި ވަރަށް ބޮޑު އަހަމިއްޔަތެއް ދެވިގެން ފުލުހުން ހިންގަންފެށި ކޭމްޕެއްކަމަށާއި މުޖުތަމަޢުގެ ސަލާމަތާއި ރައްކާތެރިކަން ޤާއިމްކޮށް ކުށުގެ ވެށިން ޒުވާނުންނާއި ފުރާވަރުގެ ކުދިން ދުރުކުރުވުމަކީ މި ކޭމްޕްގެ މަޤުޞަދެއްކަމަށެވެ.
އަދި ހަރުދަނާ ޒުވާން ޖީލެއް ބިނާކުރުމުގައި ފުރާވަރުގެ ކުދިންނާއި ޒުވާނުންގެ ދަޢުރު އިތުރުކުރަން ޖެހިފައިވާކަމަށާއި ފުލުހުން މިކަމަށް އިސްނަގައި އެއްބާރުލުން ދިނުމަށް ތައްޔާރަށް ތިބިކަމަށް ވިދާޅުވިއެވެ.
މި ރަސްމިއްޔާތުގައި މިނިސްޓަރ އޮފް ޔޫތު އެންޑް ސްޕޯޓްސް މުޙައްމަދު މަލީހް ޖަމާލު ދެއްކެވި ވާހަކަފުޅުގައި މި ކޭޕްމްގެ ސަބަބުން ޒުވާނުންނަށް ފުރުސަތުތަކެއް ލިބިގެންދާނެކަން ޔަޤީންކުރައްވާކަމަށާއި ޤައުމަށް ލިބޭނެ އެންމެ މުހިއްމުކަމަކީ ޒުވާނުން ހަރުދަނާ ޤާބިލް ބަޔަކަށް ހަދައި ޒުވާނުން ބާރުވެރިކުރުންކަމަށާއި ޒުވާނުން ބާރުވެރިކޮށް ޒިންމާދާރުކުރުވުމަށްޓަކައި ރަގަޅު ވަސީލަތާއި ހުނަރު ބޭނުންވާކަމަށް މިނިސްޓަރ ވިދާޅުވިއެވެ.
ކޮމިޝަނަރ އޮފް ޕޮލިސް ޙުސައިން ވަޙީދު އިސްނެންގެވުމުގެ ދަށުން ފުލުހުން ކުރިއަށްގެންދާ ބްލޫޒް ފޮރ ޔޫތު ކޭމްޕް މިއަދުން ފެށިގެން މި ޖެނުއަރީ މަހުގެ 9 ވަނަ ދުވަހުގެ ނިޔަލަށް ކުރިއަށްދާނެއެވެ. މި ކޭމްޕްގައި 15 އަހަރާއި 18 އަހަރާ ދެމެދުގެ 64 ކުދިން ބައިވެރިވެއެވެ.
ބްލޫޒް ފޮރ ޔޫތު ކޭމްޕް މިއަދު ފޭދޫ ފިނޮޅުގައި ފަށާފައިވާއިރު އައްޑޫ ސިޓީ އާއި ފުވައްމުލަކުގައި މި ކޭމްޕް ވަނީ ބާއްވާފައެވެ. އަދި އައްޑޫ ސިޓީ އާއި ފުވައްމުލަކުގައި މި ކޭމްޕްގެ ދެވަނަ ބުރެއް ފެށުމަށް ވަނީ ހަމަޖެހިފައެވެ.