ޕީޕީއެމްގެ ރިޔާސީ ރޭހުގައި ވާދަ ކުރައްވާނެކަން އިއުލާނު ކުރައްވާފައިވާ އަބުދުﷲ ޔާމީންގެ ސިޔާސަތުތަކަށް އުމަރު ނަސީރު ފާޑު ވިދާޅުވެއްޖެއެވެ.
ޓީމު އުމަރތުން އާޓިފިޝަލް ބީޗުގައި ރޭ ބޭއްވި ބައްދަލުވުމުގައި ވާހަކަ ދައްކަވަމުން އުމަރު ވިދާޅުވީ 26000 ވަޒީފާ އިތުރު ކުރުމަށް ޔާމީން ގެންގުޅުއްވާ ސިޔާސަތަށް ތާއިދު ނުކުރައްވާ ކަމަށެވެ. އަދި ވަޒީފާ އިތުރު ކުރުމުގެ ސަބަބުން މިހާރު ހުރި މައްސަލަތައް އިތުރަށް ގޯސް ވެގެންދާނެ ކަމަށް ވެސް އުމަރު ވިދާޅުވިއެވެ.
އުމަރު ވިދާޅުވީ ރާއްޖޭގައި މިހާރު ވެސް ބިދޭސީންގެ އާބާދީ ބޮޑު ކަމަށާއި އަލަށް އުފައްދާ ވަޒީފާތަކުގެ ތެރެއިން 25000 ވަޒީފާ ނަގާނީ ބިދޭސީން ކަމަށެވެ. އުމަރު ވިދާޅުވީ ބިދޭސީން ކުޑަ އަގެއްގައި މަސައްކަތް ކޮށްދޭ އިރު ދިވެހިންނަށް ވުރެ ވަޒީފާ ދޭން ފަރާތްތަކުން ބިދޭސީންނަށް އިސްކަންދޭނެ ކަމަށް އުމަރު ވިދާޅުވިއެވެ. އަދި އެކަމުގެ ސަބަބުން ގަވައިދާ ހިލާފަށް އުޅޭ ބިދޭސީން އިތުރު ވެގެންދާނެ ކަމަށާއި ޒުވާނުން ވަޒީފާ ނެތި ތިބޭ މައްސަލައަށް ވެސް ހައްލު ނުލިބޭނެ ކަމަށް އުމަރު ވިދާޅުވިއެވެ.
ވަޒީފާތައް އިތުރު ކުރުމުގެ ބަދަލުގައި މިހާރު ކުރަން ޖެހޭ ކަމަކީ ޒުވާނުން މުދާވެރި ކުރުވުން ކަމަށާއި ޒުވާނުންނަށް ކުދި ވިޔަފާރިތައް ފަށައިގަނެ ކުރިއަށް ދިއުމަށް އެހީތެރިވެދިނުން ކަމަށް އުމަރު ވިދާޅުވިއެވެ.
އުމަރު ވިދާޅުވީ އޭނާގެ ބޭނުމަކީ ވެރިކަން ހޯދުނު ގޮތަކުން ހޯދުން ނޫން ކަމަށެވެ. ރޭގެ އެއްވުމުގައި އުމަރު ވިދާޅުވީ އޭނާއަށް ސަރުކާރުގެ މަގާމުތަކާއި މިނިސްޓަރުކަން ވެސް ލިބެން އޮތް ކަމަށެވެ. ނަމަވެސް އެހުރިހާ ކަމެއް ގުރުބާން ކުރެއްވީ ރައީސް މުހައްމަދު ނަޝީދަށް އަލުން ވެރިކަމަށް ވަޑައިގަތަ ނުދިނުމަށް ކަމަށާއި އެކަމައްޓަކާ ރިޔާސީ ޕްރައިމަރީ ދޫކޮށްލައްވަން ޖެހުނު ނަމަވެސް ތައްޔާރަށް ހުންނެވި ކަމަށް އުމަރު ވިދާޅުވިއެވެ.