މާލޭ ސިޓީ ކައުންސިލްގެ މެމްބަރު އިބްރާހިމް ޝުޖާއު ޑީއާރުޕީން މިއަދު ވަކިވެވަޑައިގެންފި އެވެ.
ޑީއާރުޕީގެ ކައުންސިލް މެމްބަރު ވިދާޅުވީ އޭނާ އެ ޕާޓީން ވަކިވެވަޑައިގަތް މައިގަނޑު ސަބަބަކީ ރައީސް މުހަންމަދު ވަހީދާ ގުޅިގެން މި އަހަރުގެ ރިޔާސީ އިންތިހާބުގައި ކުރިއަށް ދިއުމަށް ޑީއާރުޕީން ނިންމުމުން ކަމަށެވެ. އަދި އެއީ ބަލައިގަނެވޭ ކަމެއް ނޫން ކަމަށް ވެސް އޭނާ ވިދާޅުވި އެވެ.
"އަނެއްކާ މިއަދުގެ ކައުންސިލް ބައްދަލުވުމަށް އަޅުގަނޑަށް ދައުވަތު ވެސް ނުދެއްވާ. މައްސަލަ އަކީ ފަހަކަށް އައިސް ޑީއާރުޕީގެ ބައެއް ސިޔާސަތުތައް އަޅުގަނޑަށް ގަބޫލު ނުކުރެވުން. އެހެންވެ ޕާޓީގެ ދަފްތަރުން ވަކިކޮށްދިނުމަށް އެދި މިއަދު ވާނީ ސިޓީ ފޮނުވާފައި،" ޝުޖާއު ވިދާޅުވި އެވެ.
އެހެން ޕާޓީއަކާ ގުޅިވަޑައިގަންނަވާނަންތޯ ދެންނެވުމުން އޭނާ ވިދާޅުވީ މިވަގުތު އެކަހަލަ ވިސްނުމެއް ނެތް ކަމަށެވެ.
"އެކަމަކު އޭގެ މާނަ އަކީ އެހެން ޕާޓީ އަކާ ނުގުޅޭނަމެކޭ ވެސް ނޫން،" ޝުޖާއު ވިދާޅުވި އެވެ.
ޑީއާރުޕީގެ ލީޑަރު އަހުމަދު ތަސްމީން އަލީ ވިދާޅުވެފައި ވަނީ ރައީސް ވަހީދާ އެކު ކުރިއަށް ދިއުމަށް އެ ޕާޓީގެ ކައުންސިލުން ނިންމީ އެއީ ގައުމުގެ މުސްތަގުބަލަށް މިވަގުތު އެންމެ ރަނގަޅު ގޮތް ކަމަށް ވާތީ ކަމަށެވެ.