ތިލަދުންމަތި އުތުރުބުރީ އިހަވަންދޫގައި ޑޮކްޔާޑަކާއި ސްލިޕްވޭއެއް ތަރައްޤީކުރުމަށް އެމް.ޕީ.އެލް އާއި އިހަވަންދޫ ކައުންސިލްއާއެމެދު ފަހުމުނަމާއެއްގައި ސޮއިކޮށްފިއެވެ.
ރާއްޖޭގެ ތާރީޚުގައި އަލަށް ބަންކަރިންގެ ޚިދުމަތް އިއްޔެ ފަށާފައިވާއިރު، މި ޚިދުމަތް އިފްތިތާހުކޮށްދެއްވީ އެކަމަށް ޚާއްސަކޮށް ހޯރަފުށީގައި އިއްޔެ ހަވީރު ބޭއްވި ރަސްމިއްޔާތެއްގައި ރައްޔިތުންގެ މަޖިލީހުގައި ހއ. ތަމްސީލްކުރައްވާ ފަސް މެމްބަރުންނެވެ.
އެސްޓީއޯ އާއި އެމްޕީއެލް ގުޅިގެން ރާއްޖޭގައި ބަންކަރިންގެ ހިދުމަތް އަލަށް ފެށިގެންގެންދިޔައިރު، ހއ. އަތޮޅުގައި މިވަގުތު ތިއްބެވި އެމް.ޕީ.އެލްގެ ސީ.އީ.އޯ މުޙައްމަދު ވަޖީހް އިބްރާހިމް އަދި މެނޭޖްމަންޓްގެ ބައެއް ބޭފުޅުން ވަނީ މިއަދު އިހަވަންދޫއަށް ވަޑައިގެންފައެވެ.
މިދަތުރުގެ ތެރެއިން މިއަދު ހެނދުނު އެ ރަށު ކައުންސިލްއާއެކު ބޭއްވި ބައްދަލުވުމުގައި އުތުރުގެ މެރިޓައިމް ޚިދުމަތްތަކާ ގުޅޭ ގޮތުން މަޝްވަރާ ކުރެއްވިއެވެ. އަދި އިހަވަންދޫގައި ޑޮކްޔާޑަކާއި ސްލިޕްވޭއެއް ތަރައްޤީކުރުމަށް އެމް.ޕީ.އެލް އާއި އިހަވަންދޫ ކައުންސިލްއާއެމެދު ފަހުމުނަމާއެއްގައި މިއަދު ވަނީ ސޮއިކޮށްފައެވެ.
މީގެ އިތުރުން އެމްޕީއެލްގެ ފަރާތުން ވަނީ އިހަވަންދޫ ކައުންސިލުން އެދިގެން އެ ކައުންސިލަށް ކްރޭނެއް ހަދިޔާ ކޮށްފައެވެ. މިއީ KOBELCO ބްރޭންޑުގެ 25 ޓަނުގެ ކްރޭނެކެވެ.
ބަންކަރިންގެ ހިދުމަތް ފެށުމަށް ހޯރަފުށީގައި ބޭއްވި ރަސްމިއްޔާތުގައި ވާހަކަ ދައްކަވަމުން
އެމް.ޕީ.އެލްގެ ސީ.އީ.އޯ މުޙައްމަދު ވަޖީހް އިބްރާހިމް ވިދާޅުވީ، ރާއްޖޭގެ އިގްތިސާދު އެހެން މިސްރާބަކަށް ބަދަލު ކުރުމަށްޓަކައި ހަމައެކަނި ޓުއަރިޒަމާއި މަސްވެރިކަމަށް ބަރޯސާވެފައި އޮންނަ އޮތުން ބަދަލުކޮށް ރާއްޖޭގެ އިގްތިސާދު ހަރުދަނާ ކުރުމަށްޓަކައި ރައީސުލްޖުމްހޫރިއްޔާ ފެށްޓެވި މަސައްކަތްފުޅުގެ ތެރެއިން، އެންމެ މުހިންމު އެއް ކަމަކީ މެރިޓައިމްގެ ދާއިރާއިން ރާއްޖެއަށް ލިބެންހުރި ހުރިހާ ހިދުމަތްތަކެއް ފޯރުކޮށްދީ އެކަމުގެ މަންފާ ދިވެހި ގައުމަށް ހޯއްދަވާ ދެއްވުން ކަމަށެވެ.
ވަޖީހު ވިދާޅުވީ މުޅި ދުނިނޭގެ ވިޔަފާރި މާކެޓަށް އިހަވަންދިއްޕޮޅު ހުޅުވާލައްވާނެ ކަމަށެވެ.
މިތާނގައި ބޮޑަށް ހިންގަމުންދާނީ އިންޓަރނޭޝަނަލް ވިޔަފާރި. ބަންކަރިންގެ ހިދުމަތް. ޖެޓީ ނުވަތަ ކީ ހޯލަކުން ނުވަތަ ޓާމިނަލަކުން ހަމަ އެގޮތައް ކޮންނެއިނާއާއި ޓާމިނަލް އޮޕަރޭޝަންސް. މެރިޔާ ވިޔަފާރިއަކީ މިއީ އިންޓަރނޭޝަނަލް ވިޔަފާރިއެއް. އެހެންވީމަ އަޅުގަނޑުމެން މިތާނގައި ދުނިޔޭގެ ވިޔަފާރި ކުރެވޭގޮތަށް ވިޔަފާރި ބޮޑު އޭރިއާއެއް މިތާނގައި އުފައްދާނަން: މުޙައްމަދު ވަޖީހް އިބްރާހިމް
ރާއްޖޭގައި ބަންކަރިން ޚިދުމަތް އަލަށް ފެށުން--- ފޮޓޯ: އެސްޓީއޯ
ބަންކަރިންގެ ހިދުމަތާއި އެކު، އެ ސަރަހައްދުގައި އިތުރު 14 ޚިދުމަތެއް ވެސް ފެށިގެން ދާނެއެވެ. އޭގެ ތެރޭގައި ބަންކަރިންގެ ޚިދުމަތް ހޯދާ ބޯޓުފަހަރަށް ބޭނުންވާނެ ޕައިލޮޓޭޖު ހިދުމަތާއި ޑޮކިން ހިދުމަތް އަދި ކްރޫއިން ބަދަލު ކުރުމާ ގުޅޭ ހިދުމަތްތަކުގެ އިތުރުން، ބޯޓުތަކަށް ބޭނުންވާ ފެން ފޯރުކޮށްދީ ކުނި އުކާލުމުގެ ހިދުމަތް ފޯރުކޮށްދިނުމަށްވެސް ވަނީ ފަށާފައެވެ.
މިއާއި އެކު އެ ސަރަހައްދުގެ ރައްޔިތުންނަށް ވަޒީފާގެ ފުރުސަތުތައް ވެސް ފަހިވެގެން ދާނެއެވެ. އަދި މިޚިދުމަތްތައް އެނގޭނެ ގޮތަށް "އުތުރު މެރިޓައިމް ސާވިސް" ގެ ނަމުގައި ވެބްސައިޓެއް ވަނީ ގާއިމްކޮށްފައެވެ.
ބަންކަރިންގެ ހިދުމަތް ފޯރުކޮށްދެނީ ހަކަތައިގެ ވިޔަފާރިކުރާ ދުނިޔޭގެ އެންމެ ބޮޑު އަމިއްލަ ކުންފުނި، ވިޓޯލްއާ ގުޅިގެންނެވެ.
މުސްތަގުބަލުގައި މި ޚިދުމަތް ފުޅާކޮށް، އެ ސަރަހައްދުގައި ސްޓޯރޭޖު ވެސް ގާއިމްކުރުމަށް ހަމަޖެހިފައިވާއިރު، ބަންކަރިން މަޝްރޫއުގެ ދެވަނަ ފޭސްގައި އޮއިލް ޓާމިނަލް އާއި އޮއިލް ޓޭންކުތައް ގާއިމްކުރުމުގެ މަސައްކަތް ފެށިގެންދާނެއެވެ.