ޑައިވްކުރަނިކޮށް ގެއްލުނު އިޓަލީގެ ފަސް ފަތުރުވެރިންގެ ތެރެއިން ނުފެނި ތިބި ހަތަރު މީހުން ހޯދުމުގެ ރެސްކިއު އޮޕަރޭޝަނެއްގައި އުޅެނިކޮށް މިއަދު މެންދުރުފަހު މަރުވި ސިފައިންގެ ޑައިވަރެއް ކަމަށްވާ މުޙައްމަދު މަހުދީގެ ޖަނާޒާ ރަސްމީ އިއްޒަތުގައި މިރޭ ބާއްވައި ވަޅުލައިފިއެވެ. މަހުދީގެ ކަށުނަމާދު އޮތީ މިރޭ 22:00 ޖެހިއިރު އިސްލާމީ މަރުކަޒުގައެވެ. މި ޖަނާޒާގައި ސިފައިންގެ އިސްވެރިންނާއި، ސިފައިންގެ ގިނަ އަދަދެއްގެ ބޭކަލުންނާއި، ސަރުކާރުގެ އިސް ބޭފުޅުންގެ އިތުރުން އާންމު ރައްޔިތުން ވަނީ ބައިވެރިވެފައެވެ. ޖަނާޒާގައި ބައިވެރިވެވަޑައިގެންނެވި ބޭފުޅުންގެ ތެރޭގައި ޚާރިޖީ ވަޒީރު އިރުތިޝާމް އާދަމާއި، އިޓަލީން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑެމިއާނޯ ފްރޭކޮވިޣް ހިމެނިވަޑައިގަންނަވައެވެ. https://x.com/sunbrk/status/2055697596061286737 އިސްލާމީ މަރުކަޒުގައި ކުރެވުނު ކަށުނަމާދަށްފަހު، މަހުދީގެ ހަށިގަނޑު ވަޅުލުމަށް ގެންދިޔައީ މައްޗަންގޮޅި އާސަހަރާއަށެވެ. ރަސްމީ އިއްޒަތުގައި ވަޅުލުމުގެ ކަންކަން ކުރިއަށްދިޔައިރު، އޭނާއަށް އެންމެ ފަހުގެ އިހުތިރާމް އަދާކުރުމަށްޓަކައި އާސަހަރާއަށް ރައީސް ޑރ. މުޙައްމަދު މުއިއްޒު ވެސް ވަޑައިގެންނެވިއެވެ. އަދި ގިނަ އަދަދެއްގެ މީހުން އެއްވެފައިވެއެވެ. މަހުދީގެ ވަކިވެދިއުމާ އެކު، ޖަނާޒާގެ ކުރިން އޭނާ ވަނީ "ސާޖަންޓް ފަސްޓް ކުލާސް" ގެ މަގާމަށް ޕްރޮމޯޓް ކޮށްފައެވެ. މި ހާދިސާއާ ގުޅޭގޮތުން ސަރުކާރުގެ ތަރުޖަމާނު މުޙައްމަދު ޙުސައިން ޝަރީފް (މުންދު) ބީބީސީއަށް ދެއްވި އިންޓަވިއުއެއްގައި ވިދާޅުވީ، މިއަދު ކުރިއަށްދިޔަ ރެސްކިއު އޮޕަރޭޝަނުގައި ޖުމްލަ އަށް ޑައިވަރުން މޫދަށް ފޭބި ކަމަށެވެ. ނަމަވެސް، ޑައިވަރުން މައްޗަށް އެރިއިރު އޭގެ ތެރޭގައި މަހުދީ ނެތްކަން ފާހަގަކުރެވުނު ކަމަށް އޭނާ ވިދާޅުވިއެވެ. https://sun.mv/222076 މަހުދީ ފެނިފައިވަނީ، އޭނާ މައްޗަށް ނޭރުމުން އެހެން ޑައިވަރުން ވަގުތުން އަލުން މޫދަށް ފައިބައި ހޯދި ހޯދުމުގެ ތެރޭގައެވެ. އޭނާ ފެނުނުއިރު އޮތީ ޚަބަރު ހުސްވެފައި ކަމަށް ތަރުޖަމާނު މަޢުލޫމާތު ދެއްވިއެވެ. https://sun.mv/222077 އެއާއެކު މެންދުރުފަހުގެ ވަގުތެއްގައި މަހުދީ މާލެ ގެނެސް، އޭޑީކޭ ހޮސްޕިޓަލަށް އަވަސް ފަރުވާއަށް ގެންދެވުނެވެ. ނަމަވެސް، ހޮސްޕިޓަލަށް ގެންދިޔަތާ އިރުކޮޅެއްގެ ތެރޭގައި އޭނާ ނިޔާވެފައިވާ ކަމަށް އެމްއެންޑީއެފުން ވަނީ ކަށަވަރުކޮށްދީފައެވެ.