އިސްލާމްދީނަށާއި ދިވެހި ގައުމަށް ލޯބިކުރާ، ހަރުދަނާ، ހީވާގި ދަރީންތަކެއް ބިނާ ކުރެވޭނީ ތައުލީމާއި ތަރުބިއްޔަތަށް އަހައްމިއްޔަތުކަން ދީގެން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ދިރާސީ އާ އަހަރުގެ ކިޔެވުން މިއަދު ފެށުމާ ގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސް މުއިއްޒު ވަނީ، ތައުލީމީ ދާއިރާގެ އެންމެހާ ހިންގުންތެރީންނަށާއި ޓީޗަރުންނަށާއި، ބެލެނިވެރީންނާއި ދަރިވަރުންނަށް ކާމިޔާބީއަށް އެދިވަޑައިގެންފައެވެ.
ރައީސް މުއިއްޒުގެ މެސެޖުގައި ވިދާޅުވީ ތައުލީމު އުނގެނުމާއި އުނގަންނައި ދިނުމަކީ ވެސް ވަރަށް ބޮޑު ދީނީ އަދި ގައުމީ ޒިންމާއެއް ކަމަށެވެ. ދިވެހީން އެދޭ ފާގަތި ކުރިމަގު މި ގައުމަށް ހޯދައި ދެވޭނީ މި ޒިންމާ އަދާކުރުމުގައި އެންމެން އެއްބާރުލައި އިހްލާސްތެރިވީ މިންވަރަކުން ކަމަށެވެ.
މީގެ އިތުރުން އެމަނިކުފާނުގެ މެސެޖު ނިންމަވާލައްވަމުން ވަނީ ތައުލީމީ ނިޒާމު ހަރުދަނާކޮށް ކުރިއެރުވުމަށާއި ހެޔޮލަފާ، ތޫނުފިލި، އުޅުން ރީތި ދަރީންތަކެއް ދިވެހި ތައުލީމީ ހިޔާވަހިތަކުގައި ބޮޑެތި ކުރުމުގެ ހެޔޮ ތައުފީގު ދެއްވުން އެދި ކުރައްވާ ކަމަށް ވިދާޅުވެފައެވެ.
ރައީސް މުއިއްޒުގެ އިތުރުން ރައީސްގެ އަނބިކަނބަލުން ފަސްޓް ލޭޑީ ސާޖިދާ މުހައްމަދު ވެސް ވަނީ ދިރާސީ އާ އަހަރާ ގުޅިގެން ޕޯސްޓެއް ކުރައްވާފައެވެ. އެކަމާ ވިދާޅުވީ، ކޮންމެ ކިޔަވާ ކުއްޖަކަށް ވެސް މިއީ ފާގަތި، ބާއްޖަވެރި އަހަރަކަށް ވުން އެދި ހެޔޮ ދުއާ ކުރައްވާ ކަމަށެވެ. ހަަމައެއާއެކު އެކަމަނާ ވަނީ ދިރާސީ އާ އަހަރުގެ ހެޔޮ އެދުމާއި ތަހުނިޔާ ދަރިވަރުންނާއި ބެލެނިވެރިންނާއި ތައުލީމީ ދާއިރާގެ އެދުރުންނާއި ހިންގުންތެރިންނާއި އެހީތެރިންނަށް ވަނީ އަރިސްކުރައްވާފައެވެ.
މިއަހަރުގެ ދިރާސީ އާ އަހަރުގެ ކިޔެވުން މިއަދު ފަށާފައިވާ އިރު މިއީ ހަތަރު އަހަރަށް ފަހުް ޖެނުއަރީގައި ކިޔެވުން ފެށި ފުރަތަމަ އަހަރެވެ. މި ބަދަލު ގެނައުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ.