ބައެއް މީހުންނަށް ދީނީ މެސެޖުތައް ލިބެން ބޭނުން ނުވާތީ މެސެޖް ފޮނުވާ ވެބްސައިޓްތައް ފޮލޯވެސް ނުކުރެއެވެ. އެކަމުން އެނގެނީ އެމީހުންނަށް ދީނީ މެސެޖްތައް ލިބެންވެސް ބޭނުން ނުވާކަމެވެ. އަނެއް ބައަކަށް މެސެޖްތައް ލިބުނަސް ބަލައިވެސް ނުލައެވެ. ފަހުން ކިޔާލަން ބާއްވައިގެން ހުއްޓައި ހަނދާން ނެތެނީއެވެ. ޑިލީޓްވެސް ވަނީއެވެ. އެހިސާބުން އެކަން ނިމުނީކަމަށް ޤަބޫލުކުރެވޭނަމަ އެއީ ވަރަށް ބޮޑު މޮޔަ ވިސްނުމެކެވެ.  
އިސްލާމް ދީނުގެ ނޫރު މީސްތަކުންނަށް ފޯރަނީ އެކިޒަމާނުގައި އެކިގޮތަށެވެ. ކުރީގެ ޒަމާންތަކުގައި ނަބީބޭކަލުންނާއި ރަސޫލްބޭކަލުން މެދުވެރިކުރައްވަވައެވެ. ރަސޫލް ޞައްލަﷲ ޢަލައިހި ވަސައްލަމަ އަށްފަހު ޤުރްއާނާއި ޙަދީޘްތަކުންނެވެ. އެކަން ފަސޭހަވަމުން އައިސް މިއަދު އަތުގައި އޮންނަ ފޯނު މެދުވެރިކޮށްވެސް އަންނަނީ ލިބެމުންނެވެ.  
ނޫޙުގެފާނު އެކަލޭގެފާނުގެ ޤައުމުގެ މީހުންނަށް ދީނަށް ގޮވާލެއްވުމުގައި 950 އަހަރު ދެމިހުންނެވިއެވެ. އީމާންވި މީހުންގެ ޢަދަދަކީ 11 އާއި 80 އާއި ދެމެދުގެ ޢަދަދެކެވެ. 
މިއަދު މީސްތަކުންނަށް ދީނުގެ ކަންކަން ކުރުމަށާއި ހެޔޮ އަމަލުކުރުން ގިނަކުރުމަށާއި ނަހީޚުރެއްވެވި ކަންކަން ނުކުރަން ގޮވާލައި ހަމައެކަނި ފޯނަށް ދުވާލަކު ކތައް މެސެޖު ލިބޭހެއްޔެވެ؟ އަހަރެއް ނިމިގެންދާއިރު ކިތައް ސަތޭކަ ނުވަތަ ކިތައް ހާސް މެސެޖު ލިބޭ ހެއްޔެވެ؟ ޢުމުރު ހުސްވެ މަރުވުމާއިހަމައަށްދާއިރު ކިތައް މިލިއަން މެސެޖު ލިބޭނެހެއްޔެވެ؟  
ސުވާލަކީ އެއިގެ ތެރެއިން ކިތައް މެސެޖަށް އަމަލުކުރިން ހެއްޔެވެ؟ އަޑުއަހާށެވެ! ކޮންމެ މީހަކު ނަރަކައަށް ވައްދަވާއިރު ދޮރުމަތިން މަލާއިކަތުން އެމީހަކާއި ސުވާލުކުރައްވަވާނެތެވެ! ތިއަބައިމީހުންނާއި ހަމައަށް ރަސޫލުބޭކަލަކު ހަމަ ވަޑައިނުގަންނަވަނީހެއްޔެވެ؟ އެމީހުން ދަންނަވާނެތެވެ! "ނޫނެކެވެ. ވަޑައިގެންނެވިއެވެ! އަހަރެމެން ބަސް ޤަބޫލުނުކުރީއެވެ."  
ކީރިތި ޤުރްއާނާއި ޙަދީޘްފުޅުތަކުގެ އިތުރުން މިއަދު ތިއަބައިމީހުންނަށް ލިބޭ މެސެޖުތައް ލިބުނުތޯ ސުވާލުނުކުރައްވަވާނެ ކަމަށް ހީކުރަނީހެއްޔެވެ؟ ހަމަހިލައި އެހެންނަކުން ނުވާނެއެވެ. ސުވާލުކުރައްވަވާނެތެވެ!  
ވީމާ މީސްތަކުން ނޫހުގެފާނުގެ ޤައުމުގެ މީހުންނަށްވުރެ މިއަދު މިވަނީ ޖާހިލުކަން ބޮޑުވެފައެވެ! ﷲ ތަޢާލާގެ ކޯފާ ނުއަންނާނެ ކަމަށް ހީކުރަނީ ހެއްޔެވެ؟ ހަމަހިލާ އެހެންނަކުން ނުވާނެއެވެ! ބަލިމަޑުކަމާއި ތަދުމަޑުކަންވެސް އަންނާނެއެވެ. އެހެން މުޞީބާތްތައްވެސް ދާނީ މެދުވެރިވަމުންނެވެ.  
ނޫޙުގެފާނުގެ ޤައުމުގެ މީހުންކަންކަން އެހިސާބަށް ދިއުމުން އެމީހުންނަށް އިތުރަށް ނަޞޭޙަތް ދެއްވެވުމުގެ ބޭނުންފުޅެއް ނެތް ޙާލަތަށް އެމީހުންގެ ކަންކަން ދިއުމުން ދެން ނޫޙުގެފާނަށް ﷲ އެކަން އެންގެވިގޮތާއި އެމީހުންނާއިމެދު ﷲ ތަޢާލާ ކަންކަން ނިންމެވި ގޮތް މިއޮތީ ފެންނާށެވެ! ޤުރާނުގައި އެހުރީ އެވާހަކަތައް ފެންނާށެވެ! މިއަދު އަހަރެމެންގެ މައްޗަށް ތަދުމަޑުކަމާއި ބަލިމަޑުކަމާއި މުޞީބާތްތައް ފޮނުއްވެވުމުން ބުނެވެން އޮތީ ކީކޭހެއްޔެވެ؟  
ވިސްނައިލާށެވެ! އަދިވެސް ވަގުތުއެބައޮތެވެ! ތައުބާވެ ﷲ ތަޢާލާގެ މަގަށް ރުޖޫޢަވާށެވެ! ސަލާމަތްކަން ހޯދުންވަނީ އެމީހެއްގެ އަތްމަތީގައެވެ.
 
- މުފްތީ މެންކުގެ ދަރުސަކުން