ގައުމަށް ކޮށްދޭ މަސައްކަތުގެ ވަޒަންކުރުމުގެ ގޮތުން، އަންނަ އަހަރުން ފެށިގެން އިންޖިނޭރުންނަށް ގައުމީ އެވޯޑު ދިނުމަށް ރައީސް ޑރ. މުޙައްމަދު މުއިއްޒު ނިންމަވައިފިއެވެ. މީގެ ދެ މަހެއްހާ ދުވަސް ކުރިން އެމަނިކުފާނު ވަނީ، މިއަދަކީ "ދިވެހިރާއްޖޭގެ އިންޖިނޭރުންގެ ދުވަސް" ކަމުގައި ކަނޑައަޅުއްވާފައެވެ. އެއީ، މާލެއާއި ހުޅުމާލެއާއި ހުޅުލެ ގުޅައިލާ "ސިނަމާލެ" ބުރިޖު ހުޅުވި ދުވަހަކީ އޮގަސްޓް 30ކަމަށްވާތީ ކަމަށް އޭރު ރައީސް ވިދާޅުވިއެވެ. https://sun.mv/207331 މިއަދުގެ މުނާސަބަތުގައި ފޮނުއްވި ޚިތާބު ފައްޓަވަމުން އެމަނިކުފާނު ވަނީ، އިންޖިނޭރުން ކުރަމުންދާ މަސައްކަތަށް ޝުކުރު އަދާކުރައްވައިފައެވެ. ސިނަމާލެ ބުރިޖު ހުޅުވިތާ މިއަދަށް ހަތް އަހަރު ފުރޭއިރު، މި ބުރިޖުގެ ސަބަބުން ދިވެހީންގެ ދިރިއުޅުމަށާއި އިގްތިޞާދުގެ އިތުރަށް އިޖްތިމާޢީ ހުރިހާ ޚިދުމަތަކަށް ހެޔޮ ބަދަލުތަކެއް އައިސްފައިވާ ކަމަށް ރައީސް ވިދާޅުވިއެވެ. ރައީސް މުއިއްޒު: އެމަނިކުފާނު ވަނީ އަންނަ އަހަރުން ފެށިގެން އިންޖިނޭރުންނަށް ގައުމީ އެވޯޑު ދިނުމަށް ނިންމަވާފައި -- ފޮޓޯ: ރައީސް އޮފީސް އިތުރަށް ރައީސް ވިދާޅުވީ، މި ގައުމު އޮތީ އެކި ދާއިރާތަކުން ކަނޑައަޅާފައިވާ އަމާޒުތަކަށް ވާސިލުވުމަށް އިންޖިނޭރުންގެ އިލްމާއި ތަޖުރިބާއާއި އެހީތެރިކަމަށް ބޭނުންވެފައި ކަމަށެވެ. އެގޮތުން، އެ ފަރާތްތަކުގެ އެހީތެރިކަން ބޭނުންވެފައިވާ ކަންކަމުގެ ގޮތުން ރައީސް ފާހަގަކުރެއްވީ، 2040 ވަނަ އަހަރަށް ދާއިރު ތަރައްގީވެފައިވާ ގައުމަކަށް ރާއްޖެ ހެދުމަށް ކަނޑައަޅާފައިވާ ލަނޑުދަނޑިއާއި ޑިޖިޓަލް ރާއްޖެއަކަށް ހެދުމުގެ އަމާޒަށް ވާޞިލުވުމުގެ އިތުރަށް އިޢާދަކުރަނިވި ހަކަތައިގެ ރޮނގުން ކަނޑައަޅާފައިވާ އަމާޒަށް ވާޞިލުވުމުގައެވެ. އިންޖިނޭރުންގެ ދުވަސް މިއަދު ފާހަގަކުރަމުން އަންނައިރު، ރައީސް ވަނީ އަންނަ އަހަރުން ފެށިގެން އެދާއިރާގައި މަސައްކަތްކޮށް، ކުރަމުން އަންނަ މީހުންނަށް ގައުމީ އެވޯޑު ދިނުމަށް ނިންމަވާފައިވާ ކަމަށް ވިދާޅުވެފައެވެ. އޭގެއިތުރަށް، އިންޖިނޭރުންގެ ޢިލްމީ ދިރާސާތަކަށް ފުރުޞަތު ފަހިކޮށްދެއްވާނެ ކަމަށާއި އެކި ދާއިރާތަކުން އިންޖިނޭރުކަން ކިޔަވައިދީ، ތަމްރީނު ދިނުމަށް ސަރުކާރުންދޭ ސަމާލުކަން އިތުރު ކުރައްވާނެކަމުގެ ޔަގީންކަން ވެސް އެމަނިކުފާނު ދެއްވިއެވެ. މީހަކު މަގުމަތި ބަލަނީ: އިންޖިނޭރުންގެ އަގު ވަޒަންކުރުމަށް އަންނަ އަހަރުން ފެށިގެން ގައުމީ އެވޯޑު ދެނީ --- ސަން ފޮޓޯ/ މުހައްމަދު މުޒައްޔިން ނާޒިމް ރައީސްގެ ޚިޠާބު ނިންމަވާލެއްވީ، ދިވެހި ކާބަފައިންނަކީ މާޒީގައިވެސް ފަންނުވެރި ހުނަރުވެރި ފާޑުވެރި ބައެއް ކަމަށާއި އެ ދުވަހުއްސުރެ މިއަދާ ހަމަޔަށްވެސް ރާއްޖޭގެ ތަރައްގީ ނެގެހެއްޓުމުގައި ދިވެހި އިންޖިނޭރުން އަދާކުރެއްވި ގައުމީ ވާޖިބަށް ސާބަހާއި ތާރީފު ޙައްގުކަން ފާހަގަކުރައްވަމުންނެވެ. މީގެކުރިން ރައީސް އޮފީހުން ބުނީ، އިންޖިނޭރުންގެ ދުވަސް ފާހަގަކުރުމުގެ އެންމެހައި ކަންކަން ކުރިއަށް ގެންދާނީ، މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗަރުން ކަމަށެވެ. ސިނަމާލެ ބުރިޖަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ޗައިނާގެ ހިލޭ އެހީގެ ދަށުން ބިނާކުރި ބުރިޖެކެވެ. ބުރިޖުގެ މަސައްކަތް ނިންމާ، ރަސްމީކޮށް ބުރިޖު ހުޅުވީ 2018ވަނަ އަހަރުގެ އޯގަސްޓް 30 ވަނަ ދުވަހެވެ. އެ ބުރިޖުގެ މަސައްކަތް ހައުސިން މިނިސްޓްރީގެ ދަށުން ކުރިއަށް ގެންދިޔައިރު، އޭރުގެ ހައުސިން މިނިސްޓަރަކީ މިހާރުގެ ރައީސް މުއިއްޒެވެ.