ކަރަންޓަށް ހޭދަކުރެވޭ މިންވަރާއިމެދު ސަމާލުވުމަށް ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ އިލްތިމާސްކުރައްވައިފިއެވެ.
ކަރަންޓު ބޭނުންކުރާ މިންވަރު މިދުވަސްވަރު 10 އިން ސައްތަ އިތުރުވެފައިވާކަން ފާހަގަކުރައްވައި ފަހުމީ އެކްސްގައި ކުރެއްވި ޓުވީޓެއްގައި ވިދާޅުވީ މިދުވަސްވަރަކީ ރާއްޖެއަށް އެންމެ ހޫނު ގަދަވާނެ ދުވަސްވަރުކަމަށް މޫސުމާބެހޭ ގައުމީ އިދާރާއިން ލަފާކޮށްފައިވާ ކަމުގައެވެ. އަދި ރޯދަމަހަކީ ކަރަންޓު ބޭނުންކުރާ ނިސްބަތް އާންމުކޮށް ބޮޑު މަހެއްކަންވެސް ފަހުމީ ފާހަގަކުރެއްވިއެވެ.
ތަފާސް ހިސާބުތަކުން ދައްކާގޮތުގައި އެވްރެޖް މަހެއްގައި ގްރޭޓާމާލެ ސަރަޙައްދުގައި 94 މެގަވޮޓާއި ހަމައަށް ކަރަންޓު ބޭނުން ކުރާ އިރު، އެ އަދަދު މިހާރު ވަނީ 104.7 މެގަވޮޓާއި ހަމައަށް މައްޗަށް ޖެހިފައެވެ.
ކަރަންޓުގެ ހަރަދު ކުޑަކުރެވޭނެ ގޮތްތަކާއި ގުޅޭގޮތުން ސްޓެލްކޯއިން މިފަހަކަށް އައިސް އަންނަނީ އާންމުން ހޭލުންތެރިކުރުވުމުގެ ގޮތުން ގިިނަ މަސައްކަތްތަކެއް ފަށާފައެވެ.