ރުމޭނިއާގައި މިހާރު ކުރިއަށްދާ 10 ވަނަ ވޯލްޑް އެކުއަޓިކްސް ޖޫނިއާ ސްވިމިން ޗެމްޕިއަންޝިޕްގައި ރާއްޖޭގެ ޖޫނިއާ ފެތުންތެރިންގެ ޓީމުން އިތުރު ގައުމީ ތިން ރިކޯޑެއް އައުކޮށްފިއެވެ. މުބާރާތުގައި ރާއްޖޭގެ ޖޫނިއާ ޓީމުން ވަނީ ފިރިހެނުންގެ ލޯންގް ކޯސް 200 މީޓަރު ބްރެސްޓްސްޓްރޯކް އިވެންޓާއި އަންހެނުންގެ ލޯންގްކޯސް 50 މީޓަރު ބްރެސްޓްސްޓްރޯކް އިވެންޓުގެ އިތުރުން އަންހެނުންގެ 200 މީޓަރު އިންޑިވިޖުއަލް މެޑްލޭ އިވެންޓުން ގައުމީ ރެކޯޑު އައުކޮށްފައެވެ. އެގޮތުން އިޒްޔާން ނާޒިމް ވަނީ ފިރިހެނުންގެ ލޯންގް ކޯސް 200 މީޓަރު ބްރެސްޓްސްޓްރޯކް އިވެންޓުގައި 02:45.21 އިން ރޭސް ފުރިހަމަކޮށްގެން ގައުމީ ރެކޯޑް އައުކޮށްފައެވެ. މި ރިކޯޑު ކުރިން އޮތީ އިފްޟާލް އިބްރާހިމް މަޙްފޫޡުގެ އަތުގައެވެ. އެއީ ފިލިޕީންސްގެ ނިއު ކްލާކް ސިޓީގައި މިދިޔަ އަހަރު ބޭއްވި 11 ވަނަ އޭޝިއަން އޭޖް ގްރޫޕް އެކުއަޓިކްސް ޗެމްޕިއަންޝިޕްގައި 02:45.81 އިން ރޭސް ނިންމައިގެންނެވެ. ދުނިޔޭގެ ޖޫނިއާ ފެތުމުގެ މުބާރާތުގައި ރާއްޖޭގެ އަމްނާ ތަޒްކިޔާ މިރުޞާދު ވަނީ އަންހެނުންގެ ލޯންގކޯސް 50 މީޓަރު ބެކްސްޓްރޯކް އިވެންޓުގައި 00:32.77 އިން ރޭސް ނިންމައިގެން ގައުމީ ރެކޯޑް އާކޮށްފައެވެ. މީގެކުރީން، މި ރެކޯޑް އޮންނަނީ ޢާއިޝަތު ޢުލްޔާ ޝާއިޤް އަތުގައެވެ. އެއީ، މިދިޔަ އަހަރު އޮސްޓްރޭލިއާގައި ކުރިއަށްދިޔަ ސްވިމިން ވެސްޓަން އޮސްޓްރޭލިއާ (އެސްޑަބްލިއުއޭ) ހެންކޮކް ޕްރޮސްޕެކްޓިން ސްޓޭޓް ޗެމްޕިއަންޝިޕްގައި 00:34.18 އިން ރޭސް ފުރިހަމަކޮށްގެންނެވެ. މީގެއިތުރުން، ރާއްޖޭގެ ޖޫނިއާ ސްވިމިން ޓީމުގައި ހިމެނޭ މިރާލް ޢައިން ލަތީފް ވަނީ އަންހެނުންގެ ލޯންގް ކޯސް 200 މީޓަރު އިންޑިވިޖުއަލް މެޑްލޭ އިވެންޓުގައި 02:42.46 އިން ރޭސް ނިންމައިގެން ގައުމީ ރެކޯޑް އައުކޮށްފައެވެ. މި އިވެންޓުގެ ރެކޯޑް އެންމެ ފަހުން އާކޮށްފައިވަނީ ވެސް މިރާލް އެވެ. އެއީ، ސިންގަޕޫރުގައި ކުރިއަށްދިޔަ 22 ވަނަ ވޯލްޑް އެކުއަޓިކްސް ޗެމްޕިއަންޝިޕްގައި 02:44.34 އިން ރޭސް ނިންމައިގެންނެވެ.