މި އަހަރު ބާއްވާ ވޯލްޑް ކަޕާ ދިމާކޮށް ރާއްޖޭގެ އެންމެ ބޮޑު ދުވަހު ނޫސް "ހަވީރު" އިން ނެރުނު ވޯލްޑް ކަޕް މެގަޒިން އައްޑޫން ވެސް ލިބޭނެ ކަމަށް އެ ނޫހުން ބުނެފި އެވެ.
އިއްޔެ ނެރުނު މި ގައިޑް އައްޑޫން ހޯދަން ވަރަށް ގިނަ ބަޔަކު މިހާރު ވެސް ރިކްއެސްޓް ކުރަމުން އަންނަ ކަމަށް ހަވީރުން ބުންޏެވެ.
"ހަވީރު" ގެ އޮފިޝަލަކު ވިދާޅުވީ މާލޭން ވެސް ގައިޑް ގަންނަން ލިބެން ހުރި އަގަށް ސެންޓޯ އަތުން ވެސް ގަންނަން ލިބޭނެ ކަމަށެވެ.
އަންނަ މަހު ފަށާ ދުނިޔޭގެ އެންމެ ބޮޑު ފުޓްބޯޅަ މުބާރާތާ ގުޅިގެން "ހަވީރު" އިން ނެރުނު ވޯލްޑް ކަޕް ގައިޑް އިއްޔެ ނެރެދެއްވީ ޔޫތު މިނިސްޓަރު މުހައްމަދު މަލީހް ޖަމާލެވެ.
މި ގައިޑްގައި މުބާރާތާ ގުޅޭ ގޮތުން ކިޔުންތެރިންނަށް ބޭނުންވާ ހުރިހާ މައުލޫމާތެއް ހިމަނާފައިވާ 208 ސަފުހާ ހިމެނެ އެވެ. އަގަކީ 95ރ. އެވެ.
ކޮންމެ ގައިޑަކާ އެކު އޭޓޫ ސައިޒުގެ ސްކޯ ޗާޓެއް ވެސް ހިލޭ ލިބޭނެ އެވެ.