ހުޅުމާލޭގައި އަލަށް އިމާރާތްކުރާ ސްކޫލް 2015 ވަނަ އަހަރުގެ ދިރާސީ އާ އަހަރާއިއެކު ހުޅުވިގެންދާއިރު މި ސްކޫލަށް "ރެހެންދި ސްކޫލް" ކިޔުމަށް ނިންމައިފިއެވެ.
ރެހެންދި ސްކޫލްގެ ނަން ނިސްބަތްވަނީ ރާއްޖޭގައި ތިންފަހަރު ރަނިކަން ކުރެއްވި އަލްސުލްޠާނާ ޚަދީޖާ ރެހެންދި ކަނބައިދި ކިލެގެ ސިރީ ރާދަ އަބާރަނަ މަހާރެހެންދިއަށެވެ. އެކަމަނާވަނީ ތިން ފަހަރެއްގެ މަތިން 16 އަހަރު ރާއްޖޭގައި ރަނިކަން ކުރައްވާފައެވެ.
ހުޅުމާލޭގައި އަލަށް އިމާރާތްކުރާ ސްކޫލްގެ ނަމަކަށް ރެހެންދި ސްކޫލް ހަމަޖެހުމާއި ގުޅިގެން، މިއީ ދިވެހިރާއްޖޭއަށް ޚިދުމަތްކުރެއްވި އަންހެން ބޭކަނބަލެއްގެ ނަންފުޅު ރަމްޒުވާގޮތަށް ނަންކިއުނު ފުރުތަމަ ސްކޫލްއެވެ.
މި ސްކޫލްގައި 44 ކްލާސް ރޫމާއި، ހޯލަކާއި، ލެބްތަކާއި، ލައިބްރަރީގެ އިތުރުން ސްޓާފް ރޫމަކާއި އިދާރީ އޮފީހެއް ހިމެނެއެވެ.
މި ސްކޫލްގެ ކޮންޓްރެކްޓަރަކީ އަމީން ކޮންސްޓްރަކްޝަނެވެ. މި ސްކޫލް އިމާރާތްކުރަނީ ހުޅުމާލެ ޑިވެލޮޕްމަންޓް ކޯޕަރޭޝަންގެ ފަރާތުންނެވެ.
ހުޅުމާލޭގައި އަލަށް އިމާރާތްކުރާ ސްކޫލްގެ މަސައްކަތް ހިނގާ ގޮތް ބައްލަވާލެއްވުމަށް އެޑިއުކޭޝަން މިނިސްޓަރު ޑރ.އައިޝަތު ޝިހާމް ދާދި ފަހުން ވަނީ ހުޅުމާލެއަށް ވަޑައިގެންފައެވެ.