ރާއްޖެޓީވީގެ ނޫސްވެރިޔާ އަދި ސީއޯއޯ ހުސައިން ފިޔާޒު މޫސާގެ މައްޗަށް ކުށް ސާބިތުނުވާ ކަމަށް ކަނޑައަޅައިފިއެވެ.
ފިޔާޒުގެ މައްޗަށް ދައުވާ ކުރީ މިދިޔަ ނޮވެމްބަރު މަހުގެ ދެވަނަ ދުވަހު 19:45 އެހާކަށްހާއިރު، ފުލުހުންނާއި ސިފައިން ގުޅިގެން ހިންގި އޮޕަރޭޝަނެއްގައި އާއްމުންނަށް ނުވަދެވޭނެހެން މާފަންނޫ ސްޓޭޑިއަމް ސަރަހައްދު ބަންދުކުރުމާއި ގުޅިގެން އިސްކަންދަރުކޮށި ދޭއް ކައިރީގައި ތިބި މީހުން އެސަރަހައްދުން ދިއުމަށް ޕޮލިސް ކޯޕްރަލް މުހައްމަދު ސަހީން އެންގުމުން އެސަރަހައްދު ދޫކޮށް ގޮސްފައިނުވާތީއާއި، ފުލުހުންގެ ބެލުމުގެ ދަށަށް ގެންދަން އުޅުމުން ޕޮލިސް ކޯޕްރަލް ސާހީންގެ މޭމަތީގައި ޖަހާފައިވާ ކަމަށް ބުނެއެވެ.
އެ މައްސަލައާއި ގުޅިގެން ކުރިން ފިޔާޒުގެ މައްޗަށް އުފުލާފައިވަނީ ޖެހުމުގެ ދައުވާއެވެ. ނަމަވެސް ކޯޓުން ދައުވާއާއި މެދު ސުވާލު އުފެއްދުމުން އެ ދައުވާ ވަނީ ބަދަލުކޮށްފައެވެ. ފިޔާޒުވަނީ އެ ދައުވާއަށް އިންކާރުކޮށްފައެވެ.
ފިޔާޒުގެ މައްޗަށް ކޮށްފައިވާ ދައުވާއަކީ ޖުނަހު އެކެއްގެ ކުށެކެވެ. އެ މައްސަލަ ސާބިތުވި ނަމަ އެންމެ ކުޑަ އަދަބަކީ ނުވަ ދުވަހަށް ޖަލަށްލުމެވެ.
ފިޔާޒުގެ މައްޗަށް ކުށް ސާބިތު ނުވާ ކަމަށް ހުކުމްކޮށްފައިވަނީ އެކަށީގެންވާ ވަރަށް ހެކި ނެތުމުންނެވެ.