މިދިޔަ އަހަރު ނިއު ރޭޑިއަންޓަށް ކުޅުނު މިޑްފީލްޑަރު އިސްމާއިލް އީސާ (މެސީ) އާއި ވެލެންސިއާގެ ގޯލްކީޕަރު މުހައްމަދު ފައިސަލް މި ސީޒަނުގައި އީގަލްސް އަށް ކުޅެން ސޮއިކޮށްފި އެވެ. އީގަލްސްގެ ޖެނެރަލް ސެކްރެޓަރީ މުފާވިޒް ހާޝިމް (މުފާ) ވިދާޅުވީ ދެ ކުޅުންތެރިން ވެސް ސޮއިކުރީ އެއް އަހަރަށް ކަމަށެވެ. އޭވައިއެލް އިން ވިދާލުމަށް ފަހު ވިކްޓަރީ އަށް ގިނަ ދުވަސްތަކެއް ވަންދެއް ކުޅުނު ފައިސަލް ވެލެންސިއާ އަށް ބަދަލުވީ މިދިޔަ އަހަރު އެވެ. އެކަމަކު އެ ކްލަބުން މިދިޔަ އަހަރު ބައެއް މަސް މަހު މުސާރަ ނުދޭތީ އެ މައްސަލަ އެފްއޭއެމް އަށް ހުށަހެޅުމަށް ފަހު ފައިސަލް ބުނެފައި ވަނީ މި އަހަރު ވެލެންސިއާ އަށް ކުޅެން ބޭނުންނުވާ ކަމަށެވެ. މިދިޔަ ސީޒަންގެ ޖޫން ޓްރާންސްފާ ބާޒާރުގައި މާޒިޔާ އިން ނިއު އަށް ބަދަލުވި މެސީ ނިއު އިން ދޫކޮށްލީ މި މަހުގެ 17 ވަނަ ދުވަހު އެވެ. އޭނާ ދޫކޮށްލި ސަބަބެއް ކްލަބުން ހާމަކޮށްފައެއް ނުވެ އެވެ. ވިކްޓަރީން ފާހަގަވުމަށް ފަހު ވީބީ އަށް ވެސް ކުޅުނު މެސީ އަކީ ގައުމީ ޓީމުގެ ވެސް މިޑްފީލްޑަރެކެވެ. އީގަލްސް އިން ވަނީ އާ ސީޒަނަށް ތައްޔާރުވުމަށް މީގެ ކުރިން މާޒިޔާގެ ފޯވާޑް އަހުމަދު ރަޝީދު (އައްމަޑޭ) އާއި ވީބީގެ ޑިފެންޑަރު ފައިރޫޒް އާދަމް ސަމީރު ވެސް ގެނެސްފަ އެވެ. މީގެ އިތުރުން މި އަހަރުގެ 21 އަހަރުން ދަށުގެ ޗެމްޕިއަންޝިޕް ކާމިޔާބުކުރި އީގަލްސްގެ ޒުވާން ޓީމުގެ ގިނަ ކުޅުންތެރިންތަކެއް ސީނިއާ ޓީމަށް ނަގާފައިވާ ކަމަށް އެ ކްލަބުން ބުނެ އެވެ. އީގަލްސްގެ ކޯޗަކަށް ހަމަޖައްސާފައިވަނީ، ކުރިން ވެސް އެ ޓީމަށް ކޯޗުކޮށްދިން އިހުސާން އަބްދުލްގަނީ (ސާންތީ) އެވެ.