މިހާރުގެ ސުޕްރީމް ކޯޓުގެ ބެންޗް އޮއްވައި، 2013 ގެ ރިޔާސީ އިންތިހާބަށް ރައީސް މުހަންމަދު ނަޝީދު ކުރިމަތި ނުލެއްވޭނެ ކަމަށް އިދިކޮޅު ޕީޕީއެމްގެ އިންތިގާލީ ނާއިބު ރައީސް އުމަރު ނަސީރު ރޭ ވިދާޅުވެއްޖެ އެވެ.
ދިޓީވީގައި ވާހަކަ ދައްކަވަމުން އުމަރު ވިދާޅުވީ، ރައީސް ނަޝީދުގެ މައްޗަށް ވައްކަމުގެ މައްސަލައެއް ސާބިތުވެފައިވާ ކަމަށާއި އެހެންވެ ރައީސުލްޖުމްހޫރިއްޔާގެ މަގާމަށް ޝަރުތު ހަމަނުވާ ކަމަށެވެ. އޭނާ އެހެން ވިދާޅުވީ، ވެލާނާގެއިން ވައްކަންކުރި ކަމަށް އޭރުގެ ޖިނާއީ ކޯޓުން ރައީސް ނަޝީދުގެ މައްޗަށް ސާބިތުވެފައިވާތީ އެވެ. އަދި އެ މައްސަލާގައި ރައީސް ނަޝީދުގެ މައްޗަށް 2001 ވަނަ އަހަރު ދެ އަހަރާއި ހަ މަސް ދުވަހުގެ މުއްދަތަށް އަރުވާލުމުގެ ހުކުމެއް ވެސް އައިސްފައި ވެ އެވެ.
އުމަރު ވިދާޅުވީ، 2008 ގެ ރިޔާސީ އިންތިހާބަށް ރައީސް ނަޝީދު ކުރިމަތިލެއްވިއިރު، ރައީސުލްޖުމްހޫރިއްޔާ ކަމަށް އެ މަނިކުފާނު ޝަރުތު ހަމަވާ ކަމަށް ކަނޑައަޅާފައި ވަނީ އިންތިގާލީ ސުޕްރީމް ކޯޓުން ކަމަށެވެ. އަދި މިހާރު އޮތް ދާއިމީ ސުޕްރީމް ކޯޓަށް އަލުން އެ މައްސަލަ ހުށަހަޅައިފިނަމަ، އެ ކޯޓުން ނުވަތަ މިހާރުގެ ސުޕްރީމް ކޯޓުގެ ބެންޗުން މިހާރު އަމަލުކޮށްފައިވާ ގޮތަށް ބަލާނެ ކަމަށް އުމަރު ވިދާޅުވި އެވެ. އަދި އޭނާ ވިދާޅުވީ 2013 ގެ ރިޔާސީ އިންތިހާބާ ދިމާކޮށް، ރައީސުލްޖުމްހޫރިއްޔާ ކަމަށް، ރައީސް ނަޝީދުގެ ޝަރުތު ހަމަވޭތޯ ބަލަން ސުޕްރީމް ކޯޓަށް ހުށަހަޅާނެކަން "ޔަގީން" ކަމަށެވެ.
"މި [ސުޕްރީމް ކޯޓު] ބެންޗުން އަމަލުކޮށްފައި އޮތް ދެ މައްސަލައެއް. އެއީ އއ. ހިމަންދޫ ކައުންސިލަށް ކުރިމަތިލީ މީހެއް، ވައްކަމުގެ ކުށް ސާބިތުވި މައްސަލަ އާއި އއ. އުކުޅަހުގައި ވައްކަމުގެ ކުށް ސާބިތުވެގެން، ކައުންސިލަށް ކުރިމަތިލީ މީހެއްގެ މައްސަލަ. މި ދެ މައްސަލާގައި ވެސް ސުޕްރީމް ކޯޓުގެ ބެންޗުން ނިންމާފައި އޮތީ، ވައްކަމުގެ ކުށް ސާބިތުވެފައި ހުރި މީހަކަށް ވެއްޖިއްޔާމު، ޑިސްކޮލިފައިވާނެ. [އިންތިހާބަށް] ކުރިމައްޗެއް ނުލެވޭނެ،" އުމަރު ވިދާޅުވި އެވެ. "އެހެންވީމަ މުހަންމަދު ނަޝީދަށް ވަރަށް ސާފުކޮށް އެނގޭނެ، ސުޕްރީމް ކޯޓުގެ މި ހަތް ފަނޑިޔާރުން ތިއްބެވި ކަމަށް ވަންޏާ 2013 ވަނަ އަހަރު އޭނައަކަށް އަލުން ކުރިމައްޗެއް ނުލެވޭނެކަން."
އުމަރު ވިދާޅުވި ގޮތުގައި، ސަރުކާރުން، ސުޕްރީމް ކޯޓު "ފުނޑުފުނޑުކޮށްލަން" އުޅޭ އެއް ސަބަބަކީ އެއީ އެވެ.
އޭނާ ވިދާޅުވީ، ޝަރުއީ ދާއިރާ އަށް އަމާޒުކޮށް، "ނުފޫޒު" ފޯރުވަން ސަރުކާރުން އުޅޭ އަނެއް ސަބަބަކީ، ރައްޔިތުންގެ މަޖިލީހުގެ ހަތަރު މެމްބަރެއްގެ ގޮނޑި ގެއްލިދާނެތީ ކަމަށެވެ. އަދި ސަރުކާރުގެ އިސް ބައެއް ވެރިންގެ މައްޗަށް ކޮރަޕްޝަންގެ ތުހުމަތު ކުރެވޭއިރު، ކޯޓުތަކުގެ ތެރެއިން އޭގެ ގެއްލުން ވާނެ ކަމަށް އުމަރު ވިދާޅުވި އެވެ.
"މިނިވަން ޝަރުއީ ނިޒާމެއް ދިވެހިރާއްޖޭގައި އޮވެއްޖިއްޔާމު، މުހަންމަދު ނަޝީދަކަށް [ރިޔާސީ އިންތިހާބަށް] ކުރިމައްޗެއް ވެސް ނުލެވޭނެ. މި ސަރުކާރުގެ އެތައް ބަޔަކު ޖަލަށް ވެސް ދާން ޖެހޭނެ،" އުމަރު ވިދާޅުވި އެވެ. "އެހެންވީމަ އެބަޖެހޭ މުޅި ޖުޑީޝަރީ އެއްކޮށް ފުނޑުފުނޑުކޮށްލައިގެން ވެސް މި މީހުން މީގެއިން ސަލާމަތްވާން."