ރައްޔިތުންގެ މަޖިލީހުގެ މިއަަހަރުގެ ފުރަތަމަ ދައުރުގެ ހާޒިރީން އެންމެ ފުލަށް ފުވައްމުލަކު މެދު ދާއިރާގެ މެމްބަރު ޝިފާގު މުފީދު ހިނގައްޖެ އެވެ. މާޗު 4 އިން މިދިޔަ ހޯމަ ދުވަހުގެ ނިޔަލަށް ބޭއްވި 24 ޖަލްސާގެ ތެރެއިން ޕީޕީއެމަށް ނިސްބަތްވާ ޝިފާގު ވަޑައިގެންނެވީ ނުވަ ޖަލްސާ އަކަށެވެ. އޭނާ 13 ޖަލްސާއަކަށް ސަލާމް ވިދާޅުވެފައިވާއިރު، ސަބަބެއް ބަޔާން ނުކުރައްވާ ވަޑައިނުގަންނަވާ ދެ ޖަލްސާއެއް ހިމެނެ އެވެ. ހާޒިރީ ރިޕޯޓުން ދައްކާ ގޮތުގައި ފުރަތަމަ ދައުރުގެ 24 ޖަލްސާއަށް 77 މެމްބަރުންގެ ތެރެއިން 21 މެމްބަރަކު ވަޑައިގެންނެވި އެވެ. އެ މެމްބަރުންނަކީ ކެންދޫ ދާއިރާގެ މެމްބަރު އަހްމަދު ތަސްމީނު އަލީ އާއި މިލަންދޫ ދާއިރާގެ މެމެބަރު އަލީ ރިޒާ އާއި ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދާއި ކުޅުދުއްފުށީ އުތުރު ދާއިރާގެ މެމްބަރު އަބްދުލް ޣަފޫރު މޫސާ އާއި ނޮޅިވަރަމް ދާއިރާގެ މެމްބަރު މުހައްމަދު ނަޝީދާއި ކެލާ ދާއިރާގެ މެމްބަރު ޑރ. އަބްދުﷲ މައުސޫމާއި ދިއްދޫ ދާއިރާގެ މެމްބަރު އަހްމަދު ސަމީރާއި އިހަވަންދޫ ދާއިރާގެ މެމްބަރު އަހްމަދު އަބްދުﷲ އާއި މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ އާއި މައްޗަންގޮޅީ ދެކުނު ދާއިރާގެ މެމްބަރު މުހައްމަދު ރަޝީދާއި މައްޗަންގޮޅީ އުތުރު ދާއިރާގެ މެމްބަރު މާރިޔާ އަހްމަދު ދީދީ އާއި ގުރައިދޫ ދާއިރާގެ މެމްބަރު އިބްރާހިމް ރިޒާ އާއި މަހިބަދޫ ދާއިރާގެ މެމްބަރު ރުގިއްޔާ މުހައްމަދާއި ނިލަންދޫ ދާއިރާގެ މެމްބަރު އަބްދުލްމުހްސިން ހަމީދާއި ކުޑަހުވަދޫ ދާއިރާގެ މެމްބަރު އަހްމަދު އާމިރާއި ވިލުފުށީ ދާއިރާގެ މެމްބަރު ރިޔާޒު ރަޝީދާއި މާވަށު ދާއިރާގެ މެމްބަރު އަބްދުލް އަޒީޒު ޖަމާލު އަބޫބަކުރާއި ދާންދޫ ދާއިރާގެ މެމްބަރު މުހައްމަދު ރިޔާޒާއި މަޑަވެލީ ދާއިރާގެ މެމްބަރު މުހައްމަދު ނާޒިމާއި ފަރެސް މާތޮޑާ ދާއިރާގެ މެމްބަރު އިބްރާހިމް މުއްތޮލިބާއި ފޭދޫ ދާއިރާގެ މެމްބަރު އަލްހާން ފަހްމީ އަދި ހިތަދޫ ދެކުނު ދާއިރާގެ މެމްބަރު ހަސަން ލަތީފެވެ. ވޭތުވެދިޔަ ދައުރުގައި މަޖިލީހުން ފާސްކޮށްފައިވަނީ ހަތް ބިލެކެވެ.