މިހާރު ރާއްޖޭގައި އޮތީ އާއިލީ ވެރިކަމެއް ކަމަށާއި އެ ފަދަ ވެރިކަމެއް ދަމަހައްޓަން ބެރު ނުޖައްސަވާނެ ކަމަށް ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމް މިރޭ ވިދާޅުވެއްޖެ އެވެ. ޖުމްހޫރީ ޕާޓީގެ މައި ޖަގަހަ، ކުނޫޒުގައި އެމްޑީޕީއާ އެކު ބޭއްވި ޖަލްސާއެއްގައި ވާހަކަ ދައްކަވަމުން ގާސިމް ވިދާޅުވީ ރާއްޖޭގައި އޮންނަން ބޭނުންވަނީ ރައްޔިތުންގެ ވެރިކަމެއް ކަމަށާއި ބޭނުންވަނީ މިނިވަންކަމާއި އަދުލުވެރިކަމާއެކު ވެރިކަން ކޮށްދޭނެ މީހެއް ކަމަށެވެ. އަދި އެ ފަދަ ވެރިކަމެއް ކުރެވޭނީ އިންސާފާއި ލޯބިން ކަމަށް އޭނާ ވިދާޅުވި އެވެ. މިރޭގެ ޖަލްސާގައި ގާސިމް ވާހަކަދައްކަވަނީ.--ހަވީރު ފޮޓޯ: ނިޝާން އަލީ ރިޔާސީ އިންތިހާބުގައި ޕީޕީއެމާއެކު ކޯލިޝަން ހެދި ޖޭޕީގެ ލީޑަރު ވިދާޅުވީ މި ސަރުކާރުން ދައުވާ ކުރަމުން ގެންދަނީ ވެރިކަން ކާމިޔާބު ކޮށްދިނުމަށް އެންމެ ބޮޑަށް މަސައްކަތް ކުރި މީހުންގެ މައްޗަށް ކަމަށެވެ. ކުރީގެ ޑިފެންސް މިނިސްޓަރު މުހައްމަދު ނާޒިމަކީ އެފަދަ ބޭފުޅެއް ކަމަށާއި ކުރިއަށް އޮތްތަނުގައި އެހެން ބޭފުޅުންނާ މެދު ވެސް އެ ގޮތަށް އަމަލު ކުރައްވަފާނެ ކަމަށް އޭނާ ވިދާޅުވި އެވެ. "ނިކަން ބައްލަވާ އަޅުގަނޑުމެންނަށް ހެދި ގޮތް،" ގާސިމް ވިދާޅުވި އެވެ. "އަޅުގަނޑު މިއަދު ޕީޖީއަށް [ޕްރޮސެކިއުޓަ ޖެނެރަލް މުހުތާޒް މުހުސިން] ވެސް ދަންނަވާލަން، ތިބޭފުޅާއާ މެދު އަމަލު ކުރައްވާނީ ހަމަ މިހެންނޭ. އެންމެ ފަހު ވަގުތު ބޮލަށް ގުއި ލާނެ."މިރޭގެ ޖަލްސާގައި ގާސިމް (މ).--ހަވީރު ފޮޓޯ: ނިޝާން އަލީ ގާސިމް ވިދާޅުވީ އޭނާ އާއި ނާޒިމް ފަދަ ބޭފުޅުންނާ މެދު ޕީޕީއެމުން އަމަލު ކުރި ގޮތާމެދު ހައިރާންވެ ވަޑައިނުގަންނަވާ ކަމަށާއި އެކަމަކު އެއީ ދިވެހި ރައްޔިތުން އުއްމީދު ކުރިގޮތް ނޫން ކަމަށެވެ. އަދި ރައްޔިތުން ބޭނުންވަނީ އަނިޔާވެރިކަމުގެ ބަދަލުގައި ނިޔާ ކަމަށް ވެސް އޭނާ ވިދާޅުވި އެވެ.ގާސިމް ވަނީ ވީ އެންމެ އަވަހަކަށް، ނާޒިމް ދޫކޮށްލުމަށް ފުލުހުންނަށް ގޮވާލައްވާފަ އެވެ. އޭނާ ވިދާޅުވީ ފުލުހުންނަކީ ވަކި ބަޔަކު ތަޅު އަޅުވައިގެން، "ޖާނުން ބޮޑެތި މީހުން" އަންގާ ކަންތައްތައް ކުރަން ތިބޭ ބައެއް ނޫން ކަމަށެވެ. އަދި އެގޮތަށް އެކަން ވިޔަ ނުދޭނެ ކަމަށް ވެސް ގާސިމް ވިދާޅުވި އެވެ. ޖަލްސާގައި ގާސިމާއި ނަޝީދު އަދި ޖޭޕީގެ ޑެޕިއުޓީ ލީޑަރު އަމީން އިބްރާހީމް ބައިވެރިވެވަޑައިގަންނަވަނީ.--ހަވީރު ފޮޓޯ: ނިޝާން އަލީ އެމްޑީޕީގެ ލީޑަރު އަދި ކުރީގެ ރައީސް މުހައްމަދު ނަޝީދު ވެސް ބައިވެރިވެ ވަޑައިގެންނެވި އެ ޖަލްސާގައި ގާސިމް ވިދާޅުވި ގޮތުގައި ނަޝީދުގެ މައްޗަށް ސަރުކާރުން ކުރާ ޝަރީއަތުގައި އެއްވެސް ސައްހަކަމެއް ނެތެވެ. އަދި އެ މަނިކުފާނު 2013 ވަނަ އަހަރުގެ ރިޔާސީ އިންތިހާބުގައި ވެސް ވާދަކުރެއްވި ކަމަށާއި އޭރު ވެސް އެ މައްސަލަ އޮތް ގޮތަށް އޮތްކަން އޭނާ ފާހަގަކުރެއްވި އެވެ. "މިހާރު އޭގެ ފަހުން ކިތައް ދުވަސް މިވީ؟ ހުކުމް ކުރި ނަމަ އެ ނިމޭހާ ވެސް ދުވަސް ވެއްޖެ. އެކަމަކު މިއަދު ކުއްލިއަކަށް އެ މައްސަލަ ނެގި ނަމަވެސް ނަޝީދުގެ މައްޗަށް އަދަބެއް ކަނޑައަޅާކަށް ގާނޫނުލް އުގޫބާތުގައި ޖާގައެއް ނެތް،" ގާސިމް ވިދާޅުވި އެވެ. މިރޭގެ ޖަލްސާގައި އެމްޑީޕީގެ ބައެއް ބޭފުޅުން ބައިވެރިވެވަޑައިގަންނަވަނީ.--ހަވީރު ފޮޓޯ: ނިޝާން އަލީ ރައްޔިތުންނަށް އެއްވެސް ރައްކާތެރިކަމެއް މިހާރު ނެތް ކަން ފާހަގަ ކުރައްވައި އޭނާ ވިދާޅުވީ ސަރުކާރުން އަމަލު ކުރަމުންދާ ގޮތުން ގައުމު ނިކަމެތިވެދާނެ ކަމަށެވެ. އަދި ދައުލަތުން މީހުން "ފްރޭމް" ކުރާ ހިސާބަށް ދިޔުމަކީ ކަންބޮޑުވާން ޖެހޭ ކަމެއް ކަމަށް ވެސް ގާސިމް ވިދާޅުވި އެވެ.