ނިއުމޯނިއާ ޖެހިގެން ހޮސްޕިޓަލުގައި އެޑުމިޓުކޮށްގެން ފަރުވާދެމުން އަންނަ އުމުރުން 85 އަހަަރުގެ މީހާގެ ކަންކަން އޭނާ ގެންދިޔަ ތަހީ ހައްޖު އެންޑް އުމްރާ ގުރޫޕުން ވަރަށް ރަނގަޅަށް ބަލަހައްޓަމުންދާކަަމަށް ޝަހީމު ވިދާޅުވި
އުމްރާއަށް ގޮސް ހުރި އުމުރުން ދުވަސްވީ ދިވެއްސަަކު ބަލިވެގެން ފަރުވާދޭންޖެހުމުން އޭނާގެ ކަންކަން އޭނާ ގެންދިޔަ ގުރޫޕުން ވަރަށް ރަނގަޅަށް ބަލަހައްޓަމުންދާކަން ފާހަގަކުރައްވައި އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ތާރީފު ކުރައްވައިފި އެވެ. 
ޑރ.ޝަހީމު މީޑިޔާތަކަށް މިއަދު ފޮނުއްވި މެސެޖެއްގައި ވިދާޅުވެފައިވަނީ އުމްރާގެ އަޅުކަން އަދާކުރަން ސައުދީއަށް ގޮސް ހުރި އުމުރުން 85 އަހަރުގެ ފިރިހެނަކަށް ނިއުމޯނިއާ ޖެހިގެން މައްކާގެ ނޫރު ހޮސްޕިޓަލުގައި ފަރުވާދެމުން އަންނަ ކަމަށެވެ.
އަދި މިނިސްޓަރު ވިދާޅުވީ އެމީހާ ސައުދީއަށް ގެންދިޔަ ގުރޫޕުން އޭނާއާމެދު ކަންކަން ކުރަމުން އަންނަނީ ވަރަށް ރަނގަޅަށް ކަމަށެވެ. 
އަދި މިހާރު އޭނާގެ އާއިލާ މީހަކު މައްކާގައި ނެތް ނަމަވެސް އޭނާގެ ދަރިޔަކު މާދަމާ މައްކާއަށް ދާނެކަމަށް މިނިސްޓަރު ވިދާޅުވި އެވެ. އަދި ގުރޫޕުގެ އިތުރަށް މާދަމާ މައްކާއަށް ދާ އޭނާގެ ދަރިފުޅާވެސް ވާހަކަދައްކަވާފައިވާކަަމަށް ޝަހީމު ވިދާޅުވި އެވެ. 
"މިރާ"އަށް މައުލޫމާތު ލިބިފައިވާ ގޮތުގައި 85 އަހަރުގެ އެ މީހާ މައްކާއަށް ދިޔައީ ތަހީ ހައްޖު އެންޑް އުމްރާ ގުރޫޕުގެ ހަވާލުގަ އެވެ. އިއްޔެ އޭނާ ހޮސްޕިޓަލުގައި އެޑުމިޓުކުރުމާއެކު އޭނާއަށް ނޫރު ހޮސްޕިޓަލުގައި ފަރުވާދެމުންދަނީ އެ ކުންފުނީގެ މެނޭޖިން ޑިރެކްޓާ ތަހިއްޔާ އަހްމަދު ޒުބައިރުގެ ދެމަފިރިކަނބަލުންގެ ބެއްލެވުމުގެ ދަށުންނެވެ. 
ތަހިއްޔާގެ ދެމަފިރިކަނބަލުން ގެންދަވަނީ ހޮސްޕިޓަލުގައި އެމީހާގެ ހާލު ވަރަށް ގާތުން ބައްލަވަމުންނެވެ. "މިރާ"އަށް މައުލޫމާތު ލިބިފައިވާ ގޮތުގައި މިހާރު އޭނާގެ ހާލުވެސް އަންނަނީ މަޑުމަޑުން ރަނގަޅުވަމުންނެވެ. އެގޮތުން ކުރިން އޮކްސިޖަން ގުޅާފައި އޮތުމަށްފަހު ހާލު ރަނގަޅުވުމުން އޮކްސިޖަން ކަނޑާލާފައިވެ އެވެ. 
އެންމެ ފަހުން "މިރާ"އަށް މައުލޫމާތު ލިބިފައިވާ ގޮތުގައި ބަލިމީހާގެ ފަސް ދަރިޔަކު މާދަމާ މައްކާއަށް ދިއުމަށް އަންނަނީ ތައްޔާރުވަމުންނެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ