ނިމިދިޔަ ލޯކަލް ކައުންސިލް އިންތިޚާބުގައި ދ. މީދޫ ކައުންސިލްގެ ރައީސް ހޮވުމަށް ނެގި ވޯޓާ ގުޅޭ ގޮތުން ހައިކޯޓަށް ހުށަހަޅައިފައިވާ މައްސަލައަށް، މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ކެންޑިޑޭޓް މުޙައްމަދު ޝާހިދުގެ ފަރާތުން ތަދައްޚުލްވާން އެދި މިއަދު ހުށަހަޅައިފިއެވެ. މި މަހުގެ ހަތަރު ވަނަ ދުވަހު ބޭއްވި ލޯކަލް ކައުންސިލް އިންތިޚާބުގައި އެންމެ މައްސަލަ ބޮޑުވި އެއް ދާއިރާއަކީ ދ. މީދޫ ދާއިރާގެ ވޯޓެވެ. އިލެކްޝަންސް ކޮމިޝަން (އީސީ)ން ފުރަތަމަ އާންމުކުރި ވަގުތީ ނަތީޖާ ދައްކާ ގޮތުން، އެ އިންތިޚާބުގައި ވެރިކަން ކުރާ ޕީއެންސީގެ ކެންޑިޑޭޓް ސުހާ އިބްރާހީމަށް 393 ވޯޓު ލިބުނުއިރު، އެމްޑީއޭގެ ކެންޑިޑޭޓް ޝާހިދަށް ލިބުނީ 392 ވޯޓެވެ. އެހެންނަމަވެސް، ލ. ފޮނަދޫގައި ބެހެއްޓި ވޯޓު ފޮށްޓަކަށް، ވޯޓުލުމުގެ ހައްގު ނެތް ފަރާތަކުން ވޯޓުލާފައިވާ މައްސަލައެއް ފާހަގަވެ، އެމްޑީއޭއިން އީސީއަށް މައްސަލަ ހުށަހެޅިއެވެ. އެ މައްސަލަ ބެލުމަށްފަހު އީސީގެ ކޮމްޕްލެއިންޓްސް ބިއުރޯގެ މެމްބަރުންގެ އިއްތިފާގުން ވަނީ، މައްސަލަ ޖެހުނު ވޯޓަކީ ސައްހަ ނޫން ވޯޓެއް ކަމަށް ކަނޑައަޅައި، ނަތީޖާއިން އެ ވޯޓު އުނިކުރުމަށް ނިންމާފައެވެ. އެ ކޮމިޝަނުން އަލުން ވޯޓު ގުނުމުން އެއް ވޯޓުގެ ތަފާތުން ކައުންސިލްގެ ރައީސްގެ ގޮނޑި ކާމިޔާބުކުރީ ޝާހިދެވެ. އެގޮތުން، ސުހާއަށް ލިބުނީ 391 ވޯޓު ކަމަށްވާއިރު، ޝާހިދަށް 392 ވޯޓު ލިބިފައިވާ ކަމަށް ރަސްމީ ނަތީޖާއިން ދައްކައެވެ. އެ ނަތީޖާއާ ގުޅޭ މައްސަލައެއް، ޕީއެންސީގެ ކެންޑިޑޭޓް ސުހާ ވަނީ ހައިކޯޓަށް ހުށަހަޅައިފައެވެ. އަދި އެ މައްސަލަ ވަނީ އެ ކޯޓުގައި ރެޖިސްޓާކޮށްފައެވެ. އެމްޑީއޭގެ ގާނޫނީ ވަކީލުންގެ ޓީމުން "ސަން"އަށް މައުލޫމާތު ދިން ގޮތުގައި، އެ މައްސަލައިގައި ޝާހިދުގެ މަސްލަހަތު އޮތުމުންނާއި، މައްސަލަ ނިމޭ ގޮތަކުން އޭނަގެ ހައްގެއް ގެއްލުމުގެ ފުރުސަތު އޮތުމުން، މައްސަލައަށް ތަދައްޚުލްވުމަށް އެދި މިއަދު ވަނީ ހައިކޯޓަށް ހުށަހަޅައިފައެވެ. އެ ހުށަހެޅުން ބަލައިގަތުމާ ގުޅޭ ގޮތުން މިހާތަނަށް ކޯޓުން ވަކި ގޮތެއް އަންގައިފައި ނުވާ ކަމަށް ވަކީލުންގެ ޓީމުން ވަނީ ބުނެފައެވެ. ދިވެހިރާއްޖޭގެ ގާނޫނުއަސާސީގެ 172 ވަނަ މާއްދާގެ (ހ) ގެ ދަށުން، އިންތިޚާބަކާ ގުޅޭގޮތުން ނުވަތަ އިންތިޚާބެއްގެ ނަތީޖާއަކާ ގުޅޭގޮތުން ޝަކުވާއެއް އޮތްނަމަ، އެ މައްސަލައެއް ކޯޓަށް ހުށަހެޅުމުގެ ފުރުޞަތު ކޮންމެ މީހަކަށްމެ ލިބިގެންވެއެވެ. އިންތިޚާބުތަކާބެހޭ ޢާއްމު ގާނޫނުގެ 64 ވަނަ މާއްދާގެ ދަށުން، އިންތިޚާބީ މައްސަލަތައް ބެލުމުގެ ފުރަތަމަ މަރްޙަލާގެ އިޚްތިޞާޞް ލިބިގެންވަނީ ދިވެހިރާއްޖޭގެ ހައިކޯޓަށެވެ. ހައިކޯޓުން ނިންމާ ނިންމުމެއް ސުޕްރީމް ކޯޓުގައި އިސްތިއުނާފު ކުރެވިދާނެއެވެ. އިންތިޚާބުތަކާބެހޭ ޢާންމު ގާނޫނުގެ 66 ވަނަ މާއްދާގެ ދަށުން، އިންތިޚާބީ މައްސަލައެއް ކޯޓަށް ހުށަހަޅަންވާނީ، އެ އިންތިޚާބެއްގެ ރަސްމީ ނަތީޖާ އިޢުލާންކުރާ ތާރީޚުން ފެށިގެން ގިނަވެގެން 14 ދުވަހުގެ ތެރޭގައެވެ.