މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގެ ސަބަބުން، ދުނިޔޭގެ ވައިގެ ދަތުރުފަތުރަށް ދިމާވެފައިވާ ބުރޫއެރުންތަކާ ގުޅިގެން، ރާއްޖޭގައި ތާށިވެފައި ތިބި ފަތުރުވެރިން އެ މީހުންގެ ގައުމުތަކަށް އަނބުރާ ފޮނުވަން ފްލައިޓުތަކެއް ބާއްވަން ފަށައިފިއެވެ. ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ބުނީ ކަމާގުޅޭ ވުޒާރާތަކާއި ސިނާޢަތުގެ ބައިވެރިންނާ ގުޅިގެން ފިޔަވަޅުތަކެއް އަޅަން ފަށައިފައިވާކަމަށެވެ. އެގޮތުން ދަތުރުތައް މެދުކެނޑުމުގެ ސަބަބުން ފަތުރުވެރިންނަށާއި މި ދާއިރާގައި މަސައްކަތްކުރާ ފަރާތްތަކަށް ކުރިމަތިވަމުންދާ ދަތިތަކަށް ހައްލެއް ހޯދައިދިނުމަށްޓަކައި، އެ ކޯޕަރޭޝަނުން އިސްކަންދެނީ ފަތުރުވެރިންގެ ރައްކާތެރިކަން ކަށަވަރުކުރުމަށާއި ރާއްޖޭގެ ފަތުރުވެރިކަމަށް ކުރާ ނޭދެވޭ އަސަރު ކުޑަކުރުމަށް ކަމަށް ބުންޏެވެ. މިހާތަނަށް ކުރެވުނު މަސައްކަތްތަކުގެ ތެރެއިން، ވިޒިޓް މޯލްޑިވްސްގެ އެހީތެރިކަމާއެކު ޖަރުމަނުވިލާތާއި ފަރަންސޭސިވިލާތް ހިމެނޭހެން ޖުމްލަ އަށް ރިޕެޓްރިއޭޝަން ފްލައިޓް ބާއްވައިފައިވާ ކަމަށް ބުންޏެވެ. މީގެ އިތުރުން، ވެލާނާ އިންޓަރނޭޝަނަލް އެއާޕޯޓުގައި އެމްއޭސީއެލް އާއި މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގެ އެހީތެރިކަމާއެކު 'ހެލްޕް ޑެސްކް' އެއް ގާއިމުކުރެވިފައިވާ ކަމަށް ބުންޏެވެ. ނުފުރިފައި ތިބި ފަތުރުވެރިންތަކެއް ވީއައިއޭގެ ކުރީގެ ޑޮމެސްޓިކް ޓާމިނަލް ސަރަހައްދުގައި -- މި ހާލަތުން އަރައިގަތުމަށްޓަކައި، ވިޒިޓް މޯލްޑިވްސްއިން ދަނީ އެކި އެއާލައިންތަކާއެކު މަޝްވަރާކޮށް އިތުރު ފްލައިޓްތައް ބޭއްވޭނެ އިންތިޒާމުތައް ހަމަޖައްސަމުން ކަމަށާއި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދެމެހެއްޓުމަށްޓަކައި، ދަތުރުފަތުރަށް މާބޮޑު ބުރޫއެއް އަރާފައިނުވާ އިންޑިއާ، ޗައިނާ އަދި ރަޝިއާ ފަދަ މާކެޓުތަކަށް އަމާޒުކޮށްގެން ޚާއްޞަ ކެމްޕޭންތަކެއް ހިންގުމަށް މަސައްކަތް ފަށައިފައިވާކަމަށް ވެސް ބުންޏެވެ. މިގޮތުން ޓުއާ އޮޕަރޭޓަރުންނާއި އެޖެންޓުންނާ ގުޅިގެން ކުރިއަށްގެންދާ މި ހަރަކާތްތަކަކީ ފަތުރުވެރިކަމުގެ ދާއިރާއަށް ލިބޭ ގެއްލުން ކުޑަކުރުމަށް އެޅޭ މުހިންމު ފިޔަވަޅެއް ކަމަށް ބުންޏެވެ. ހަމައެއާއެކު، މި ހާލަތުން ލިބުނު ފިލާވަޅާއެކު މުސްތަގްބަލަށް ތައްޔާރުވާން ވިޒިޓް މޯލްޑިވްސްއިން ދަނީ ރާއްޖޭގެ ފަތުރުވެރިކަމަށް ޚާއްސަ 'ކްރައިސިސް ރެސްޕޮންސް ސްޓްރެޓެޖީ' އެއް އެކުލަވައިލަމުން ކަމަށް ވެސް ބުންޏެވެ. މި މަސައްކަތުގެ ދަށުން، ސިނާޢަތުގެ ބައިވެރިންނާ ބައްދަލުކޮށް، މަޢުލޫމާތު ހިއްސާކުރުމާއި ކުރިމަތިވެފައިވާ ގޮންޖެހުންތަކުން އަރައިގަތުމަށް އެޅިދާނެ ފިޔަވަޅުތަކާ ބެހޭގޮތުން މަޝްވަރާކުރުމަށް ވަނީ ނިންމާފައެވެ.