އަންނަ އެޕްރީލް 4، ގައި ބާއްވާ ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓުގައި ވޯޓުލުމަށް ރަޖިސްޓްރީ ކޮށްފައިވާ ފޮށީގެ މައުލޫމާތު ހިމެނޭ ރަޖިސްޓްރީ އާންމުކޮށް، ރަޖިސްޓްރީ ކޮށްފައިވާ ފޮށްޓާ ގުޅިގެން ޝަކުވާ ހުށަހެޅުމުގެ ފުރުސަތު އިލެކްޝަންސް ކޮމިޝަނުން ހުޅުވާލައިފި އެވެ.
އިލެކްޝަންސް ކޮމިޝަނުން ބުނީ ޝަކުވާ ހުށަހެޅުމުގެ ފުރުސަތު ހުޅުވާލީ މިއަދު ހެނދުނު 10:00 އިން ފެށިގެން މާދަމާގެ މެންދުރު 13:30 ގެ ނިޔަލަށް ކަމަށެވެ.
މި ރަޖިސްޓްރީ ކޮމިޝަނުގެ ވެބްސައިޓުން އާންމުކޮށް ފެންނަން ހުންނާނެ ކަމަށާއި ކޮމިޝަނުގެ އޮންލައިން ރަޖިސްޓްރީ ޕޯޓަލް މެދުވެރިކޮށް ވެސް ރަޖިސްޓްރީ ޗެކް ކުރެވޭނެ ކަމަށް އިލެކްޝަނުން ބުންޏެވެ.
މީގެއިތުރުން ރަޖިސްޓްރީއަށް ޝަކުވާ ހުށަހަޅަން ބޭނުންވާ ފަރާތްތަކުން، ޝަކުވާ ހުށަހަޅާނީ އޮންލައިންކޮށް އިލެކްޝަންގެ މައި ޕޯޓަލް މެދުވެރިކޮށެވެ.
މި މުއްދަތުގައި ޝަކުވާ ހުށަހަޅާނީ ވޯޓުލާން ރަޖިސްތްރީކޮށްފައިވާ ފޮށީގެ މައުލޫމާތާއި ގުޅިގެން އެކަނި ކަމަށް ވެސް އިލެކްޝަނުން ބުންޏެވެ.
ރިސޯޓުތަކާއި ސިނާއީ މަސައްކަތްކުރާ ތަންތަން އަދި ރާއްޖެއިން ބޭރުގައި ވޯޓުލުމަށްޓަކައި ވޯޓުފޮށި ބެހެއްޓުމަށް ހަމަޖެހިފައިވާ ވޯޓު ފޮށިތަކަށް ރަޖިސްޓްރީވެފައިވާ މީހުންގެ އަދަދު ކަނޑައެޅިފައިވާ އަދަދަށްވުރެ މަދުވުމުން އެ ހުރިހާ ތަނެއްގައި ވޯޓު ފޮށިތައް ނުބަހައްޓަން އިލެކްޝަނުން ވަނީ ނިންމައިފަ އެވެ.
އޭޕްރީލް 4، ގައި ބާއްވާ އިންތިހާބުގައި ޖުމްލަ 225 ދާއިރާއަކުން، ލޯކަލް ކައުންސިލްތަކާއި ޑަބްލިއުޑީސީއަށް މެންބަރުން އިންތިހާބުކުރާނެ އެވެ. އިންތިހާބުގައި ވޯޓުދިނުމުގެ ހައްގު ލިބިގެންވަނީ ޖުމްލަ 294،937 މީހުންނަށެވެ.