ސަރުކާރުން ބޭރުކުރާ ޓްރެޒަރީ ބިލް (ޓީބިލް) ތަކުގައި އިންވެސްޓްކުރުމަށް ބޭންކް އޮފް މޯލްޑިވްސް (ބީއެމްއެލް) ގެ ބޯޑުން ކަނޑައަޅާފައިވާ މިންގަނޑުތަކާ އެ ބޭންކުން އެއްވެސް ވަރަކަށް ހިލާފުވެފައި ނުވާނެ ކަމުގެ ޔަގީންކަން އެ ބޭންކުގެ ސީއީއޯ މުހައްމަދު ޝަރީފް ދެއްވައިފިއެވެ.
ބީއެމްއެލްގެ ބްރާންޗްތަކާއި އޭޓީއެމްގެ ވިއުގަ އިތުރަށް ފުޅާކުރުމުގެ މަސައްކަތްތަކާ ގުޅޭގޮތުން ރޭ ބޭއްވި ރަސްމިއްޔާތެއްގައި ވާހަކަދައްކަވަމުން ޝަރީފް ވިދާޅުވީ، ބީއެމްއެލުން ޓީބިލްގައި އިންވެސްޓްކުރަނީ ގަވައިދާ ހިލާފަށް ކަމަށް ބުނެ ބައެއް ފަރާތްތަކުން ދައްކަމުންދާ ވާހަކަތަކަކީ ހަގީގަތާ ހިލާފު ވާހަކަތަކެއް ކަމަށެވެ. އޭނާ ފާހަގަކުރެއްވި ގޮތުގައި، ދުނިޔޭގެ އެހެން ބޭންކުތަކެކޭވެސް އެއްފަދައިން ބީއެމްއެލުންވެސް އެ ބޭންކެއްގެ ބޭނުންނުކޮށް ހުންނަ އިތުރު ފައިސާ (އެކްސެސް ފަންޑު) އިންވެސްޓްކުރަނީ ރިސްކު ކުޑަ މާލީ ވަސީލަތްތަކަށެވެ.
ޝަރީފް ވިދާޅުވީ 2015 ވަނަ އަހަރުން ފެށިގެން 2025 ވަނަ އަހަރާ ހަމައަށް ބަލާއިރު، ބޭންކުގެ ކެޕިޓަލްގެ ނިސްބަތުން ސަރުކާރުގެ ޓީބިލާއި ބޮންޑަށް ކުރާ އިންވެސްޓްމަންޓްތައް ހުރީ އެއްވަރެއްގައި ހިފެހެއްޓިފައި ކަމަށެވެ.
ބޭންކުން އާންމުކޮށް ޓީބިލްގައި އިންވެސްޓްކުރަނީ އެއް އަހަރު ނުވަތަ އެއަށްވުރެ ކުރު މުއްދަތަކަށް ކަމަށްވާއިރު، ކޮންމެ އަހަރަކުވެސް މި ބިލްތައް 'ރޯލްއޯވާ' ނުވަތަ އާވަމުންދާނެ ކަމަށް ސީއީއޯ ވިދާޅުވިއެވެ. އެގޮތުން 2025 ވަނަ އަހަރު ނިމުނުއިރު ހުރި 10.8 ބިލިއަން ރުފިޔާގެ ޓީބިލަކީ މުޅިން އަލަށް ކުރި އިންވެސްޓްމަންޓެއް ނޫން ކަމަށާއި، އެއީ ކުރިންވެސް ހުރި އިންވެސްޓްމަންޓްތައް އާކުރުން ކަމަށް އޭނާ ތަފްސީލުކޮށްދެއްވިއެވެ.
މީގެ އިތުރުން، ބޭންކަށް ދިމާވެފައިވާ 'ނެޓް އޯޕަން ޕޮޒިޝަން' (އެންއޯފީ) ގެ މައްސަލަ ހައްލުކުރުމަށްޓަކައި، ސަރުކާރާއެކު މަޝްވަރާކޮށްގެން 192.8 މިލިއަން ޑޮލަރަށްވާ ރުފިޔާގެ ޓީބިލްތައް ޔޫއެސް ޑޮލަރުގެ ޓީބޮންޑަށް ބަދަލުކޮށްފައިވާ ކަމަށްވެސް ޝަރީފް ވިދާޅުވިއެވެ. މި ބަދަލުގެ ސަބަބުން ބޭންކުގެ މާލީ ހާލަތަށް ހެޔޮ ބަދަލުތަކެއް އަންނަމުންދާ ކަމަށް އޭނާ ފާހަގަކުރެއްވިއެވެ.
ސީއީއޯ އިތުރަށް ވިދާޅުވީ، ދައުލަތުން ބޭންކުގައި ބަހައްޓާފައިވާ ފިކްސް ޑިޕޮސިޓްތަކާ އަޅުވައި، ރައްކާތެރިކަމުގެ ފިޔަވަޅެއްގެ ގޮތުން 653 މިލިއަން ރުފިޔާގެ ޓީބިލަށް އިންވެސްޓްކޮށްފައިވާ ކަމަށެވެ. އަދި މި ހުރިހާ މުއާމަލާތްތަކެއްވެސް ހިނގަމުންދަނީ ބޭންކުގެ ހަރުދަނާ އުސޫލުތަކާއި ބޯޑުގެ ނިންމުންތަކާ އެއްގޮތަށް ކަމަށް އޭނާ ޔަގީންކޮށްދެއްވިއެވެ.