ކުރީގެ ސަރުކާރުން ގިނަ އަދަދަކަށް ފައިސާ ޗާޕުކުރުމާ ގުޅިގެން ބޭންކިން ނިޒާމުގައި އިތުރުވެފައި ހުރި ފައިސާ މަދުކުރަން އޯޕަން މާކެޓް އޮޕަރޭޝަނެއް އަންނަ ނޮވެމްބަރު މަހުގެ ތެރޭގައި ފަށާނެ ކަމަށް ގަވަރުނަރު އަހުމަދު މުނައްވަރު ވިދާޅުވެއްޖެ އެވެ.މީޑިއާތަކާ އެކު މިއަދު ބޭއްވި ބައްދަލުވުމުގައި ގަވަރުނަރު ވިދާޅުވީ އެކަމުގެ މަސައްކަތްތައް ކުރަން އެމްއެމްއޭގެ ބޯޑުން މިހާރު ފާސްކޮށްފައިވާ ކަމަށެވެ. އޭނާ ވިދާޅުވީ އޭގެ ބޭނުމަކީ އިގްތިސާދުގައި ދައުރުވާ "އެކްސެސް މަނީ" މަދުކުރުން ކަމަށެވެ."އޭގެ ވެސް ސަރުކާރަށް ދަތިތަކެއް ވާނެ. ޕްރެޝާއެއް އަންނާނެ އެބޭފުޅުންގެ ކޭޝް ފްލޯ މެނޭޖް ކުރުމުގައި. މޮނިޓަރީ ޕޮލިސީ ޓައިޓަން ކުރުމަށްޓަކައި އޯޕަން މާކެޓް އޮޕަރޭޝަނެއް ފަށަނީ. ހަ ބިލިއަން، ފަސް ބިލިއަން ރުފިޔާ މަޑު މަޑުން މި ހިފަހައްޓަނީ. އެއްފަހަރަކާ ނޫން،" އޭނާ ވިދާޅުވި އެވެ.ވޭތުވެދިޔަ ތިން އަހަރު ތެރޭގައި ދައުލަތުން 8.2 ބިލިއަން ރުފިޔާ ޗާޕްކޮށް، އިގްތިސާދުގައި ދައުރުކުރި އެވެ.ފައިސާ އިތުރަށް ޗާޕުކޮށްގެން ދައުލަތުގެ ހަރަދުތައް ހަމަޖެއްސުމުން އިގްތިސާދުގައި ދައުރުވާ ފައިސާ އިތުރުވެ އަދި ބޭރު ފައިސާ އަށް އޮންނަ ޑިމާންޑު އިތުރުވުމުން ރާއްޖޭގެ އެކްސްޗޭންޖް ރޭޓަށް ނޭދެވޭ އަސަރު ކުރެ އެވެ.މި ސަރުކާރު ވެރިކަމަށް އައުމާ އެކީ ރައީސް ޑރ. މުހައްމަދު މުއިއްޒު ވަނީ ފައިސާ ދެން ޗާޕް ނުކުރާނެކަން އިއުލާން ކުރައްވައިފަ އެވެ.