ކުރީގެ ރައީސް ޔާމީންގެ މައްޗަށް ތުހުމަތުކުރެވުނު ވ. އާރަށުގެ މައްސަލާގައި އަލުން ބަލަން ނިންމި ދައުވާގައި، ދައުލަތުން ހުށަހަޅާ އާ ހެކިތައް ބަލައިގަތުމާ މެދު ގޮތެއް ނިންމުމަށް ސުޕްރީމް ކޯޓުގައި މި މަހުގެ 20 ވަނަ ދުވަހު އަޑުއެހުމެއް ބޭއްވުމަށް އެޖެންޑާ ކޮށްފިއެވެ.
އެނގިފައިވާ ގޮތުގައި މިމައްސަލަ ކުރިޔަށް ގެންދަނީ މުއިއްޒު ޝަރީއީ ދާއިރާއަށް އަތް ބާނުއްވާ, ޝަރުއީ މަރުހަލާގައި ހުރި ރައީސް ޔާމިންގެ މައްސަލަތައް އަވަސްކުރުމަށް މުއިއްޒު އަންގަވައިގެންނެވެ.
މި މައްސަލައަކީ ވ. އާރަށް ކުއްޔަށް ދޫކުރުމުގެ މުއާމަލާތުގައި އެއް މިލިއަން ޑޮލަރުގެ ރިޝްވަތު ބަލައިގަތުމާއި، އެ ފައިސާ ލޯންޑަރ ކުރެއްވި ކަމަށް ބުނެ ރައީސް ޔާމީންގެ މައްޗަށް އިއްވި 11 އަހަރުގެ ޖަލު ހުކުމް، ހައިކޯޓުން ބާތިލުކޮށް، އަލުން ބެލުމަށް އަމުރުކުރި މައްސަލައެކެވެ. އެހެންނަމަވެސް މައްސަލަ އަލުން ބަލާއިރު ދައުލަތުން ހުށަހަޅާ އާ ހެކިތައް ބަލައިނުގަނެވޭނެ ކަމަށް ހައިކޯޓުން ނިންމާފައިވުމާ ގުޅިގެން، ދައުލަތުން ވަނީ އެ ނިންމުން ސުޕްރީމް ކޯޓުގައި އިސްތިއުނާފުކޮށްފައެވެ.
މި މައްސަލަ ބައްލަވަނީ ފަނޑިޔާރު އައިޝާ ޝުޖޫން މުހައްމަދު، ފަނޑިޔާރު ޑރ. އަޒްމިރަލްދާ ޒާހިރު އަދި ފަނޑިޔާރު ޑރ. މުހައްމަދު އިބްރާހީމްގެ މައްޗަށް އެކުލެވޭ ބެންޗަކުންނެވެ. އަދި ސުޕްރީމް ކޯޓުން މި މައްސަލަ ނިމެންދެން، ކްރިމިނަލް ކޯޓުގައި ހިނގަމުންދާ މައިގަނޑު މައްސަލައިގެ ޝަރީއަތް މަޑުޖައްސާލުމަށް ވަނީ ނިންމާފައެވެ. މި ނިންމުމަށް ވާސިލުވީ ޔާމީންގެ ވަކީލުން މައްސަލައިގެ ޝަރީއަތް ކުރިއަށް ގެންދިއުމާމެދު ކަންބޮޑުވުން ފާޅުކުރެއްވުމާ ގުޅިގެންނެވެ.
މި މައްސަލައިގައި ޔާމީންގެ އިތުރުން ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެންބަރު ޔޫސުފް ނައީމްގެ މައްޗަށް ކުރެވުނު ހުކުމްވެސް ވަނީ ހައިކޯޓުން ބާތިލުކޮށްފައެވެ. އޭނާގެ މައްސަލަވެސް މިހާރު ވަނީ ސުޕްރީމް ކޯޓަށް ހުށަހެޅި، ތާވަލުކުރެވިފައެވެ. މި ދެމެދުގައި، ޔާމީންގެ ފަރާތުން ވަނީ ދައުވާތައް އަލުން މުރާޖަޢާކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ހުށަހަޅުއްވާފައެވެ.
މުއިއްޒު ވެރިކަމަށް ވަޑައިގެންނެވީ, ވެރިކަމަށް ވަޑައިގެންނެވުމުން, ރައީސް ޔާމިންގެ މައްޗަށް ނުހައްގުން ކުރަމުންދާ ހުރިހާ ޝަރީއަތެއް ހުއްޓުމަކަށް ގެނެސް އެމަނިކުފާ ސަލާމަތް ކުރާނެކަމުގެ ދޮގު ވައުދުވެ, ރައީސް ޔާމިންގެ ނަންޖެހި ހުސް ގޮނޑި ދައްކައިގެން މަކަރާއި ހީލަތުންނެވެ.