ނައިބު ރައީސް އަލްއުސްތާޒު ހުސައިން މުހައްމަދު ލަތީފް، ''ހަށިހެޔޮ ރާއްޖެ" ޕްރޮގްރާމް އިފްތިތާހްކޮށްފި އެވެ.އެމަނިކުފާނު މި ޕްރޮގްރާމް އިފްތިތާހުކޮށްދެއްވީ އެކަމަށް ހާއްސަކޮށްގެން މިއަދު ހަވީރު ކުޅުދުއްފުށި ސިޓީގައި ކުރިއަށްގެންދިޔަ ރަސްމިއްޔާތެއްގަ އެވެ."ހަށިހެޔޮ ރާއްޖެ" އިފްތިތާޙުކުރުމުގެ ރަސްމިއްޔާތުގައި ވާހަކަފުޅުދައްކަވަމުން ނައިބު ރައީސް ވިދާޅުވީ ރައްޔިތުން ދުޅަހެޔޮ ސިއްހަތެއްގައި ދިރިއުޅުން ވޭތުކުރުމަކީ ރައީސް މުހައްމަދު މުއިއްޒު ވަރަށްވެސް އިސްކަމެއްދެއްވާ ކަމެއްކަމަށާއި، މިއަދު ފުރިހަމަވެގެން މިދިޔައީ އެމަނިކުފާނުގެ ވައުދުފުޅެއްކަމުގަ އެވެ.އަދި އާބާދީގެ ނިސްބަތުން އެރަށަކަށްބޭނުންވާ ކުޅިވަރުގެ ވަސީލަތްތައް ގާއިމުކޮށްދީ، ރައްޔިތުންނާހަމައަށް އެ ހިދުމަތްތައް، ރައީސްގެ ވައުދުފުޅާ އެއްގޮތަށް ފޯރުކޮށްދިނުމަށް ކަމާގުޅުން ހުރި ވުޒާރާތަކުން މަސައްކަތް ކުރައްވާނެކަމުގައިވެސް އެމަނިކުފާނު ވިދާޅުވި އެވެ.ނައިބު ރައީސްގެ ވާހަކަފުޅު ނިންމަވާލައްވަމުން، މިއަދު އިފްތިތާހުކުރެއްވި ޕްރޮގްރާމުން ލިބުނު ތަމްރީނުގެ ބޭނުން ހެޔޮގޮތުގައި ހިފައި، ޕްރޮގްރާމުން ލިބުނު މަޢުލޫމާތު ރައްޔިތުންނަށް އެންމެ ފުރިހަމަ ގޮތުގައި ފޯރުކޮށްދީ މި ޕްރޮގްރާމުން ތަމްރީނުވި ސްޕޯޓްސް ކައުންސިލަރުންނާއި އަދި ޔޫތު އެސޯސިއޭޓުން، ކުރަންޖެހޭ މަސައްކަތް ފުރިހަމަ ގޮތުގައި ކޮށްދޭނެ ކަމަށް ޔާގީން ކުރައްވާ ކަމުގައި ވިދާޅުވި އެވެ. އަދި މި ޕްރޮގްރާމަކީ މުޅި ރާއްޖެއަށް ފެތުރިގެން ދާނެ ޕްރޮގްރާމެއް ކަމަށާއި، މިއަދު ކުޅުއްދުއްފުށީގައި މި ކުރިއަށްދިޔައީ ފެށުމެއްކަމުގައިވެސް އެމަނިކުފާނު ފާހަގަކުރެއްވި އެވެ.