މުލީގޭ ޙަސަން މަނިކުފާނު (ދޮންބަންޑާރައިން) ފިރިހެންމަތިފުށުން ސަރުކާރުގެ އެންމެމަތީ މަގާމެއްގައި މިވަގުތު ހުންނެވީ ޑރ. މުހައްމަދު ކިނާނަތުކަމަށް ދިވެހި ތާރީޚީ ޢިލްމްވެރިޔާ މުހައްމަދު ޝާތިރު ވަނީ ލިޔުއްވާފައެވެ.
މިދިއަހަރުގެ ހުރަވީ ދުވަހު ޝާތިރު ވަނީ އެކަން ފާހަގަކުރަށްވާފައެވެ. އަދި މިއަހަރުގެ ހުރަވީ ދުވަހު (މިއަދު) ސާތިރު ވަނީ އެކަމުގެ ހަނދާން އައު ކުރަށްވާފައެވެ.
ޑރ. މުހައްމަދު ކިނާނަތު މިވަގުތު ފުރުއްވަމުން ގެންދަވާ ސަރުކާރުގެ މަގާމަކީ ދާޚިލީ ވުޒާރާގެ ސްޓޭޓް ވަޒީރުކަމުގެ މަގާމެވެ. ކިނާނަތަކީ 17 ނޮވެމްބަރު 2023 ގައި އައު ސަރުކާރުގެ ދައުރު ފެށުމާއެކު، ރައީސް ޑރ. މުޙައްމަދު މުޢިއްޒު އެންމެ ފުރަތަމަ ޢައްޔަނުކުރެއްވި ސްޓޭޓް ވަޒީރުންގެ ތެރޭގައި ކިނާނަތު ހިމެނިވަޑައިގަންނަވައެވެ. މިގޮތުން ނޭޝަނަލް ސެންޓަރ ފޮރ އިންފޮރމޭޝަން ޓެކްނޮލޮޖީ ހިންގަވާ އިސް ބޭފުޅެއްގެ ގޮތުގައި ކިނާނަތު ސްޓޭޓް ވަޒީރުކަމަށް ޢައްޔަނުކުރަށްވާފައި ވަނީ 20 ނޮވެމްބަރު 2023 ގައެވެ.
''ދޮންބަންޑާރައިންގެ ފިރިހެންމަތިފުށުން ދައުލަތުގެ އެންމެމަތީ މަގާމެއްގައި މިހާރު ހުންނެވީ، އައްސުލްޠާނުލްޣާޒީ ޙަސަން ޢިއްޒުއްދީން (ދޮންބަންޑާރައިން)ގެ، އައްސުލްޠާން ޙަސަން ނޫރައްދީން 1ގެ، އައްސުލްޠާން މުޙައްމަދު މުޢީނުއްދީން 1ގެ، އައްސުލްޠާން މުޙައްމަދު ޢިމާދުއްދީން 4ގެ، އަލްއަމީރު ޙަސަން ޢިއްޒުއްދީން (ބޮޑުދޮށީމަނިއްޕުޅު)ގެ، މާންދޫގޭ ތުއްތުމަނިއްޕުޅުގެ، އަންނަބީލު ޢަބްދުލްވައްހާބު މަނިއްޕުޅުގެ، ޢަބްދުލްޙަމީދުގެ ދަރިކަލުން އޮނަރަބްލް ޑޮކްޓަރ މުޙައްމަދު ކިނާނަތު، މިނިސްޓަރ އޮފް ސްޓޭޓް ފޮރ ހޯމް ލޭންޑް ސެކިއުރިޓީ އެންޑް ޓެކްނޯލޮޖީ'' ސާތިރު ލިޔުއްވާފައިވެއެވެ.
ސާތިރު އިތުރަށް ލިޔުއްވާފައިވާ ގޮތުގައި ރައީސް ޑރ. މުޙައްމަދު މުޢިއްޒުގެ ކެބިނެޓްގައި ވެސް ދޮންބަންޑާރައިންގެ ދަރިކޮޅުން ވަޒީރަކު އެބަތިއްބެވިއެވެ. އެއީ ތިމާވެއްޓާބެހޭ ވަޒީރު ޠާރިޤު އިބްރާހީމް އާއި ދަތުރުފަތުރާބެހޭ ވަޒީރު މުހައްމަދު އަމީން ކަމަށް އޭނާ ލިޔުއްވާވެއެވެ.
''މިނިސްޓަރ އަމީންގެ މުނިކާފާފުޅު، ސުލްޠާން ޙަސަން ނޫރުއްދީން
މިނިސްޓަރ ޠާރިޤުގެ ހޫރުކާފާފުޅު، ސުލްޠާން ޙާޖީ އިމާދުއްދީން'' އޭނާ ލިޔުއްވާފަވެއެވެ.
މިއަދަކީ ހުރަވީ ދުވަހެވެ. ހުރަވީ ދުވަސް ކޮންމެ އަހަރަކުވެސް ފާހަގަކުރަނީ ހިޖުރީގޮތުން ޖުމާދުލްއާޚިރާ މަހުގެ 3 ވަނަ ދުވަހު، މުލީގެ ދޮން ޙަސަންމަނިކުފާނު، ނުވަތަ ދޮންބަންޑާރައިން ދިވެހިރާއްޖެ ހޮޅިންގެ އަތްދޮށުން މިނިވަންކޮށްދެއްވި ދުވަހާ ގުޅުވައިގެންނެވެ. އެއީ ހިޖުރީގޮތުން 1166 ވަނަ އަހަރުގެ ޖުމާދުލްއާޚިރާ މަހުގެ 3 ވަނަ ދުވަހެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi