އިންފޮމޭޝަން ކޮމިޝަނަރުގެ އޮފީހުގެ އަޑުއެހުމަށް ހާޒިރުނުވުމުން ޖޫރިމަނާކުރީ، މުވައްޒަފެއްގެ އިހުމާލުން ކަމަށާއި އެ މުވައްޒަފާ ދޭތެރޭ ފިޔަވަޅު އަޅާފައިވާ ކަމަށް ހައުސިން މިނިސްޓްރީން މިއަދު ބުނެފި އެވެ.ހައުސިން މިނިސްޓްރީ ޖޫރިމަނާކުރުމަށް އައިކޮމްއިން ނިންމީ މައުލޫމާތެއް ހޯދުމަށް ހުށަހެޅި މައްސަލައެއްގައި އެ މައުލޫމާތު މިނިސްޓްރީން ނުދިނުމާ ގުޅިގެން އިންފޮމޭޝަން ކޮމިޝަނަރުގެ އޮފީހުން ބޭއްވި އަޑުއެހުމަށް މިނިސްޓްރީން ހާޒިރުނުވުމާ ގުޅިގެންނެވެ. މައުލޫމާތު ހޯދައި ލިބިގަތުމުގެ ގަވާއިދުގައި ބުނެފައިވަނީ މައުލޫމާތު ދިނުމާ ގުޅޭ މައްސަލައެއްގައި އައިކޮމްގެ އަޑުއެހުމަކަށް ހާޒިރުވާން އަންގައިފިނަަމަ މަގުބޫލު ސަބަބެެއް މެދުވެރިވާ ހާލަތުގައި ނޫނީ ހާޒިރުވުން ލާޒިމުވާނެ ކަމަށެވެ. އަދި މަގުބޫލު ސަބަބެއް އޮވެގެން ހާޒިރުނުވެވޭނަމަ ހާޒިރުވުމުގެ ވަގުތުގެ އެއް ގަޑިއިރުގެ ކުރިން ހާޒިރުވެވެން ނެތްކަމާއި ހާޒިރުނުވެވޭ ސަބަބު އައިކޮމްއަށް އަންގަންވާނެ ކަމަށެވެ. އައިކޮމްއިން ބުނި ގޮތުގައި އެ އޮފީހުން 350 ރުފިޔާއިން ހައުސިން މިނިސްޓްރީ ޖޫރިމަނާކުރީ މައުލޫމާތު ހޯދައި ލިބިގަތުމުގެ ގަވާއިދާ އެއްގޮތަށް މިނިސްޓްރީން އަމަލުކޮށްފައިނުވާތީ އެވެ. އެ މައްސަލައާ ގުޅުވައި މިއަދު ހައުސިން މިނިސްޓްރީން ނެރުނު ބަޔާނެއްގައި ބުނީ، މިނިސްޓްރީގެ ހުރިހާ ކަމެއް ހާމަކަން ބޮޑުގޮތެއްގައި ކުރިއަށް ގެންދިއުމަށްޓަކައި، މައުލޫމާތު ހޯދަން މިނިސްޓްރީއަށް ހުށަހަޅާ ހުށަހެޅުންތަކަށް ކަނޑައެޅިފައިވާ މުއްދަތުގައި މައުލޫމާތު ފޯރުކޮށްދިނުމަކީ ވަރަށް ބޮޑަށް އިސްކަންދޭ ކަމެއް ކަމަށެވެ.މިގޮތުން، އައިކޮމްއިން އެ މިނިސްޓްރީ ޖޫރިމަނާކުރީ މުވައްޒަފެއްގެ އިހުމާލުން ހިނގި ކަމެއްގެ ސަބަބުން ކަމަށާއި އެ މުވައްޒަފާ ދޭތެރޭ ސިވިލް ސާވިސް ގަވައިދުގައިވާ ގޮތަށް ފިޔަވަޅު އަޅާފައިވާ ކަމަށް މިނިސްޓްރީން ބުންޏެވެ.އެހެންވެ، މި ފަދަ މައްސަލަތައް ތަކުރާރު ވިޔަ ނުދިނުމަށްޓަކައި ކަމާ ގުޅޭ އުސޫލުތައް ހަރުދަނާކުރަން މަސައްކަތް ކުރަމުން އަންނަ ކަމަށް ހައުސިން މިނިސްޓްރީން ވަނީ ބުނެފައެވެ.