މީހުން މެރުން ފަދަ ކުށްތައް ރާއްޖޭގައި އިތުރުވަމުންދަނީ ގާނޫނު ތަންފީޒު ނުކުރެވޭތީ ކަމަށް ގަބޫލުފުޅު ކުރައްވާ ކަމަށް ޕީޕީއެމްގެ އިންތިގާލީ ރައީސް މައުމޫނު އަބުދުލް ގައްޔޫމު ވިދާޅުވެއްޖެއެވެ.
އަފްރާޝީމު އަވަހާރަކޮށްލުމާއި ގުޅިގެން މިއަދު ޕީޕީއެމްގެ އޮފީހުގައި ނޫސްވެރިންނާއި ބައްދަލު ކުރައްވާ މައުމޫނު ވިދާޅުވީ ޑރ.އަފްރާޝިމަށް ދިން ހަމަލާއަކީ ރައްޔިތުންގެ މަޖިލީހާއި ޑިމޮކްރަސީ އަދި ޕީޕީއެމަށް ދިން ހަމަލާއެއް ކަމަށެވެ.
މައުމޫނު ވިދާޅުވީ އަފްރާޝީމަށް ދިން ހަމަލާއަކީ ރައްޔިތުން މަޖިލީހާއި، ޑިމޮކްރަސީ އަދި ޕީޕީއެމްއަށް އަމާޒުކޮށް ދީފައިވާ ވަރަށް ދަށު ދަރަޖައިގެ އިންސާނިއްޔަތާ ހިލާފު ފިޑި އަމަލެއް ކަމަށެވެ.
ކައުންސިލްގެ ކުއްލި ބައްދަލުވުމަކަށްފަހު ޕީޕީއެމް އޮފީހުގައި ނޫސްވެރިންނަށް މައުލޫމާތު ދެއްވަމުން ރައީސް މައުމޫނު ވިދާޅުވީ މިއަދަކީ ދިވެހި ގައުމަށް ވަރަށް ހިތާމަވެރި ދުވަހެއް ކަމަށާއި، ރޭގެ ހަމަލާގައި ގެއްލިގެން ގޮސްފައިވަނީ ރާއްޖެއަށް އަގުހުރި ހިދުމަތްތަކެއް ކުރައްވަމުން ގެންދެވި ދިވެހި ދަރިއެއް ކަމަށެވެ.
މި ކަމުގައި ޒިންމާވާ އެންމެހާ ފަރާތްތައް ވީ އެންމެ އަވަހަކަށް ގާނޫނުގެ ކުރިމަށްޗަށް ގެނައުމަށް ޕީޕީއެމްއިން ގޮވާލާ ކަމަށް ވެސް ރައީސް މައުމޫނު ވިދާޅުވިއެވެ. އަދި ރާއްޖޭގައި މިފަދަ ލާއިންސާނީ އަނިޔާތައް ދެމުން ގެންދާތި އެކަން ހުއްޓުވުމަށް ސަރުކާރުން މިހާރަށް ވުރެ ބޮޑަށް މަސައްކަތް ކޮށްދެއްވުމަށް ރައީސުލް ޖުމްހޫރިއްޔާ ޑރ. މުހަންމަދު ވަހީދު ހަސަން މަނިކަށް ގުޅުއްވާ އަމިއްލަ ފުޅަށް އެދިވަޑައި ގަންނަވާނެ ކަމަށް ވެސް ރައީސް މައުމޫނު ވިދާޅުވިއެވެ.