ދިވެހި ރައްޔިތުންގެ ޕާޓީ (ޑީއާރުޕީ) އާއި އަދާލަތު ޕާޓީގެ ވިސްނުން ވަރަށް ކައިރި ކަމަށާއި ދެ ޕާޓީން ވެސް މަސައްކަތްކުރަނީ ރާއްޖޭގައި އިސްލާމްދީން ކުރިއަރުވައި، 100 ޕަސެންޓް އިސްލާމީ ގައުމެއްގެ ގޮތުގައި ދެމެހެއްޓުމަށް ކަމަށް ޑީއާރުޕީގެ ޒައީމް އަދި ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެ އެވެ.
ޑީއާރުޕީގެ ހަ ވަނަ އަހަރީ ދުވަސް ފާހަގަ ކުރުމަށް، އެ ޕާޓީގެ ޒެޑް ފެކްޝަނުން މިރޭ އާޓިފިޝަލް ބީޗުގައި ބޭއްވި ޖަލްސާގައި ވާހަކަ ދައްކަވަމުން މައުމޫން ވިދާޅުވީ ޑީއާރުޕީ އެންމެ ބޮޑު އިސްކަމެއް ދެނީ އިސްލާމް ދީން ރައްކާތެރިކުރުމަށް ކަމަށާއި އަދާލާތު ޕާޓީގެ އަމާޒަކީ ވެސް އެއީ ކަމުން ދެ ޕާޓީގެ ވިސްނުން ވަރަށް ކައިރި ކަމަށެވެ. އަދި "އަޅުގަނޑުމެން އެންމެން ހެޔޮއެދޭ އަދާލަތު ޕާޓީ" މުޅިން އާ މަރުހަލާއަކާ ކުރިމަތިލާފައިވާކަން ފާހަގަ ކުރައްވައި، އެ ޕާޓީގެ ރައީސަށާއި ނައިބު ރައީސަށް އަދި އިސްވެރިންނަށް މައުމޫން މަރުހަބާ ވިދާޅުވި އެވެ.
މައުމޫން ވިދާޅުވީ ޑީއާރުޕީން އެދެނީ، އަދާލަތު ޕާޓީ ކުރިއަރައި ތަރައްގީވުމަށް ކަމަށެވެ.
މައުމޫން ވިދާޅުވީ ޑީއާރުޕީގެ އެންމެ އިސް މަސްއޫލިއްޔަތަކީ ރާއްޖޭގައި އޮތް އިސްލާމްދީނުގެ ވަހުދަތު ހިމާޔަތްކޮށް، ކުރިއެރުވުން ކަމަށެވެ. އަދި ރާއްޖޭގެ މިނިވަންކަމާއި އަގީދާ ވަރަށް ބޮޑަށް ގުޅިފައިވާ ކަމަށާއި ތާރީހު ވެދިޔަ ތަނުން ދަސްކޮށްދޭ ގޮތުގައި ރާއްޖޭގެ މިނިވަން މީގެ ކުރިން ގެއްލިފައިވަނީ ކޮންެމެވެސް ބަޔަކު ދިވެހިން ޣައިރު ދީނަށް އެނބުރުވުމަށް ނުވަތަ އެހެން ދީނަކަށް މަގު ފަހިކުރުމަށް މަސައްކަތްތަކެއް ކޮށްފައިވާތީ ކަމަށް ވިދާޅުވި އެވެ.
މައުމޫން ވިދާޅުވީ ރާއްޖެއަށް ސިޔާސީ މިނިވަންކަން ލިބިފައި ވީނަމަވެސް އެވަރުން އަދި ފުއްދާލެވެން ނެތް ކަމަށާއި ހަގީގީ މިނިވަން ކަމަކީ ފިކުރީ، އިގްތިސޯދީ އަދި ސަގާފީ މިނިވަންކަން ލިބިފައި ވުން ކަމަށެވެ.
"ރާއްޖެއަކީ ސިޔާސީ މިނިވަންކަން ލިބިފައިވާ ގައުމެއް ކަމަށް ބުނެ އިގްތިސޯދު އެހެން ބަޔަކާ ހަވާލުކުރަމަކީ އަދި މިނިވަންކަމެއް ނޫން. އަދި ސިޔާސީ މިނިވަންކަން ލިބިފައިވާ ކަމަށް ބުނެ، އަގީދާ އާއި ފިކުރު އެހެން ދީނަކަށް އަނބުރާލުމަކީ ކޮށްގެންވާނޭ ކަމެއް ނޫން،" މައުމޫން ވިދާޅުވި އެވެ.
ވޭތުވެ ދިޔަ އަހަރުތަކުގައި ރާއްޖޭގައި ޑިމޮކްރެޓިކް ވެއްޓެއް ގާއިމު ކުރުމަށް ވަރަށް ގިނަ މަސައްކަތްކުރައްވާފައި ވާނެކަން ފާހަގަ ކުރައްވަމުން މައުމޫން ވިދާޅުވީ މިހާރު އަނެއްކާ ވެސް ރާއްޖެއަށް ޑިމޮކްރެސީ އަނބުރާ ގެނުއުމަށް މަސައްކަތްތަކެއް ކުރަން ޖެހިފައިވާ ކަމަށެވެ. ހަގީގީ ޑިމޮކްރެޓިކް ވެއްޓެއްގައި ރައްޔިތުންނަކީ ބާރުވެރިބައެއް ކަމަށާއި ރައްޔިތުން އުޅެން ޖެހޭނީ އުފަލާއި ހިތްހަމަޖެހުމުގައި ނަމަވެސް، މިހާރު ކަންތައްތައް ވަމުން ދަނީ ދިމާ އިދިކޮޅަށް ކަމަށް މައުމޫން ވިދާޅުވި އެވެ. އަދި ރައްޔިތުންގެ ހައްގުތަކެއް ނިގުޅައިގަންނަމުން ދާއިރު، ރައްޔިތުން ބާރުވެރިކުރުމުގެ ނަމުގައި އިދިކޮޅަށް ކަންތައްތަކެއް ކުރަމުން އަންނަތަން ފެންނަމުންދާ ކަމަށް ވެސް ވިދާޅުވި އެވެ. އެހެން ކަމުން ރާއްޖެއަށް ޑިމޮކްރެސީ އަނބުރާ ގެނައުމަކީ ޑީއާރުޕީގެ އެންމެ އިސް އެއް މަސްއޫލިއްޔަތު ކަމަށް ވެސް އެމަނިކުފާނު ވިދާޅުވި އެވެ. އަދި ރާއްޖޭގައި އަމަން އަމާންކަން ދަމަހައްޓައި، ގާނޫނުގެ ވެރިކަމެއް ހިނގާ ތަނަކަށް ހެދުމަށް ޕާތީގެ މެމްބަރުން މަސައްކަތް ކޮށްދެވުމަށް ޕާޓީގެ ޒައީމް އިލްތިމާސް ކުރެއްވި އެވެ.
އަހަރީ ދުވަސް ފާހަގަ ކުރުމަށް ބޭއްވި މި ޖަލްސާގައި ޑީއާރުޕީގެ ޒެޑް ފެކްޝަނަށް ނިސްބަތްވާ ޕާޓީގެ އިސްވެރިންނާއި ގިނަ އަދަދެއްގެ މެމްބަރުން ބައިވެރިވި އެވެ.