ކަރަންޓް ބިލްތަކަށް ދައްކަން ޖެހޭ ފައިސާ ނުދައްކައިގެން ގދ. ގައްދޫ ކައުންސިލް އިދާރާއިން މިއަދު ކަރަންޓް ކަނޑާލައިފި އެވެ.
ގައްދު ކައުންސިލް ރައީސް، މުހައްމަދު ރިޒާން މިއަދު ބައެއް މީޑިއާތަކަށް މައުލޫމާތުދެއްވަމުން ވިދާޅުވީ މިދިޔަ އަހަރުގެ 6 މަހަކާއި މި އަހަރުގެ 5 މަހެއްގެ ނުދެއްކި އޮތް ބިލްތަކަށް ޖުމުލަ 400000 ރުފިޔާއަށް އަރާ ކަމަށާއި އެހެންކަމުން މިއަދު ހެނދުނު ކަރަންޓު ކަނޑާލާފައިވާ ކަމަށެވެ.
އޭނާ ވިދާޅުވީ މީގެ ކުރިން 2010 ވަނަ އަހަރު ވެސް މި މައްސަލަ ދިމާވި ކަމަށާއި މިފަހަރު މި މައްސަލަ ދިމާވީ ކައުންސިލް އިދާރާއަށް ލިބެންޖެހޭ ފައިސާ ނުލިބުމުން، ކަމަށެވެ. އަދި ފައިސާ ހޯދުމަށް ފިނޭންސް މިނިސްޓްރީ އާއި އެލްޖީއޭ އާ ވެސް ވާހަކަދައްކަމުންދާ ކަމަށެވެ.
ކަރަންޓް ކަނޑާލުމުގެ ސަބަބުން ރައްޔިތުނަށް ދޭން ޖެހޭ ހިދުމަތްތައް ނުދެވި ރައްޔިތުން ޝަކުވާ ކުރަމުންދާ ކަމަށާއި އެ ރަށުގެ މަގުމަތީ ބައްތިތަކާއި މިސްކިތްތަކުގެ އިތުރުން އެ ރަށުގެ ބޯޅަ ދަނޑުގެ ވެސް ގިނަ ދުވަސްތަކެއްގެ ބިލްތަކެއް ނުދެއްކިފައިވާ ކަމަށް އެ ރަށު ކައުންސިލް އިދާރާ އިން ބުންޏެވެ.
ރިޒާން ވިދާޅުވީ ބިލްތަކަށް ފައިސާ ދެއްކުމުން ނޫނީ ކަރަންޓްގެ ހިދުމަތް ދޭން އިންޖީނުގެ އިން އެއްބަސް ނުވާ ކަމަށެވެ.