ފުލުހުން ބަލަމުންދާ މައްސަލައަކާ ގުޅިގެން ޕީޕީއެމްގެ އިންތިގާލީ ނާއިބު ރައީސް އުމަރު ނަސީރު މިއަދު ފުލުހުންގެ އިދާރާއަށް ހާޒިރުކޮށްފިއެވެ.
އުމަރު ފުލުހުންގެ އިދާރާއަށް ހާޒިރުކޮށްފައިވަނީ، 23 ޑިސެމްބަރު އިއްތިހާދުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ސަރަހައްދުގައި ކުރި މުޒާހަރާތަކުގެ ތެރެއިން މި އަހަރުގެ ޖެނުއަރީ 23 ވަނަ ދުވަހުގެ ރޭގެ މުޒާހަރާގައި އޭނާ ދެއްކެވި ވާހަކަތަކަކާ ގުޅިގެން ކަމަށް އެނގިފައިވެއެވެ.
އުމަރު ވިދާޅުވީ، ޕޮލިހަށް މިއަދު ހާޒިރުކުރީ ވެރިކަންކުރާ ޕާޓީތަކުގެ މެދުގައި އޮތް ވާދަވެރިކަމެއްގެ ސަބަބުން ކަމަށް ގަބޫލުކުރައްވާ ކަމަށާއި ހަރުގަނޑު ބޭނުންކޮށްގެން ތަނަކަށް އަރާ ވާހަކަ އެރޭގެ މުޒާހަރާގައި ވިދާޅުވި ނަމަވެސް އެއީ ކޮންތަނެއް ކަމާއި ކޮން އިރަކު ކުރާނެ ކަމެއް ކަން ވިދާޅުނުވާތީ އުމަރުގެ މައްޗަށް ކުށް ސާބިތު ނުކުރެވޭނެ ކަމަށެވެ.
ކުރީގެ ރައީސް މުހައްމަދު ނަޝީދުގެ ވެރިކަމުގައި ވެސް މި މައްސަލާގައި އުމަރު ވަނީ ޕޮލިހަށް ހާޒިރުކޮށްފައެވެ.
ނަޝީދާ ދެކޮޅަށް އުމަރު ކުރިން ހުށަހަޅުއްވާފައިވާ މައްސަލަތަކެއްގެ ކޭސް ނަމްބަރު ފުލުހުން ބުނެ ނުދިނުމުން އެ ފަހަރު އުމަރު ވަނީ ހަނުހުރުމުގެ ހައްގު ބޭނުން ކުރައްވާފައެވެ.
އުމަރު މިއަދު ވިދާޅުވީ ނަޝީދާ ދެކޮޅަށް ހުށަހަޅުއްވާފައިވާ މައްސަލަ ބައްލަވާނެ ކަމަށް ފުލުހުން ބުނެފައިވާ ކަމަށާއި އެ މައްސަލަ އަލުން ހުށަހަޅުއްވާނެ ކަމަށެވެ.