ޑީއާރުޕީގެ ޒައީމު މައުމޫން އަބްދުލްގައްޔޫމް އެ ޕާޓީގެ ލީޑަރު އަހުމަދު ތަސްމީން އަލީ އަށް ފޮނުއްވި 12 ސަފުހާގެ ސިޓީ އަށް ތަސްމީން ރައްދު ދެއްވައި، ޒައީމު މައުމޫނަށް ސިޓީއެއް ފޮނުއްވައިފި އެވެ.
ތަސްމީން މައުމޫނަށް ރައްދު ދެއްވައި މިއަދު އިރުއޮއްސުނުއިރު ފޮނުއްވި 15 ސަފުހާގެ ސިޓީގައި ވިދާޅުވެފައި ވަނީ، އޭނާ އަށް ރައީސްކަން ލިބިވަޑައިގަތަސް، އޭނާ މައުމޫނާ ދޭތެރޭ ކަންތައްތައް ކުރައްވާނީ ވަރަށް ރަނގަޅަށް ކަމަށާއި ފުރިހަމަ އިއްޒަތާއީ ގަދަރު ދެއްވާނެ ކަމަށެވެ.
".. މަނިކުފާނުނު ކޮންމެ ގޮތަކަށް ކަންތައް ކުރެއްވި ކަމުވައި ވިޔަސް 2013 ވަނަ އަހަރު ރިޔާސީ އިންތިހާބުގައި މާތްﷲގެ އިރާދަފުޅާ އެކު ޑީއާރްޕީގެ ކެންޑިޑޭޓުގެ ހައިސިއްޔަތުން އަޅުގަނޑަށް ކާމިޔާބު ވެއްޖެ ނަމަ، ދިވެހިރާއްޖޭގެ ޤާނޫނު އަސާސީ އާއި ޤާނޫނުތަކުގައި ވާގޮތުގެ މަތިން، އަދި ރާއްޖޭގެ ވެރިކަން 30 އަހަރު ދުވަހު ކުރައްވައި، ރާއްޖެ އަށް އެތައް ރޮނގަކުން ތަރައްގީ އާއި ކުރިއެރުން ހޯއްދަވައިދެއްވި ގައުމުގެ ލީޑަރެއްގެ ހައިސިއްޔަތުން މަނިކުފާނަށް އަރުވަން ޖެހޭ ފުރިހަމަ އިއްޒަތާއި ގަދަރާއި ރައްކައުތެރިކަން އެރުވުންމަތީ އަޅުގަނޑު ދެމިހުންނާނެ ކަމުގައި މިފުރުސަތުގައި ދަންނަވާލީ މެވެ،" ޒައީމަށް ފޮނުއްވި ސިޓީގައި ތަސްމީން ވިދާޅުވެފައިވެ އެވެ.
ނަމަވެސް، ތަސްމީން ވިދާޅުވީ، އެ ސިޓީފުޅުގައި، އޭނާ އާއި ޕާޓީގެ ކައުންސިލްގެ އިތުރުން ޑީއާރްޕީގެ ޕާލިމެންޓްރީ ގްރޫޕަށް "ބަދުނާމު ރައްދުވާ ގޮތަށް، ހަގީގަތާ ޚިލާފު ތުހުމަތުތަކެއް" ޒައީމް މައުމޫން ކުރައްވައިފައިވާ ކަމަށާއި އެކަމާ ވަރަށް ބޮޑަށް ހިތާމަކުރައްވާ ކަމަށެވެ.
އަދި ޑީއާރްޕީގެ ލީޑަރުގެ ހައިސިއްޔަރުން ތަސްމީން ޕާޓީ ހިންގަވާ ގޮތާމެދު ވަރަށް ގިނަ ބަޔަކު ހިތް ހަމަނުޖެހޭ ކަމަށް މައުމޫން ވިދާޅުވެފައިވާ ވާހަކަފުޅަށް ރައްދުދެއްވަމުން ތަސްމީން ވިދާޅުވެފައި ވަނީ، އެ "ގިނަ" ބަޔަކީ ޕާޓީގެ ތިން ވަނަ ގައުމީ ޖަލްސާގެ ތެރޭގައި ވެސް އޭނާއާ މެދު ޒާތީގޮތުން ހިތްހަމަނުޖެހިގެން، ޕްރައިމަރީއެއް ބޭއްވުމާ ބެހޭ މާއްދާއެއް ފާސްކުރުމަށް ޒައީމް މައުމޫނުގެ އާއިލާގެ ބޭފުޅުންނާ އެކު މަސައްކަތްކުރި ބައެއް ކަމަށެވެ.
އަދި އުމަރު ނަސީރުގެ ފެކްޝަނުން ތަސްމީނާ ގުޅޭ ގޮތުން ދައްކަވައިފައިވާ ވާހަކަތަކަށް އިޝާރާތްކުރައްވަމުން ތަސްމީން ވިދާޅުވީ، މައުމޫނުގެ ސިޓީފުޅުގައިވާ "އެއްވެސް އަސްލެއް ނެތް ޝަކުވާތަކާއި ހަގީގަތާ ޚިލާފުތުހުމަތުތަކަކީ" ހަމަ އެބޭފުޅުން އެކި ޖަލްސާތަކުގައި ދައްކަވައިފައިވާ ވާހަކަތައް ކަމަށެވެ. އަދި އެބޭފުޅުން އެވާހަކަތައް ދެއްކެވީ ޒައީމް މައުމޫންގެ ރުހުން ލިބިގެން ކަމަށް ދެކެވޭ ވާހަކައަށް އިތުރު "ބާރެއް" ލިބިގެންގޮސްފައިވާ ކަމަށް ވެސް ތަސްމީން ވިދާޅުވެފައިވެ އެވެ.
"އެފަދަ ވާހަކަތަކަކީ، މަނިކުފާނުގެ ރުހުން ލިބިގެން މަނިކުފާނުގެ އިރުޝާދުގެ ދަށުން ދައްކަމުން ގެންދިޔަ ވާހަކަތަކެއް ކަމަށް ބުނެ ގިނަ ބަޔަކު އާއްމުކޮށް މި ދައްކާ ވާހަކަތަކަށް، މަނިކުފާނު ފޮނުއްވި ސިޓީގެ ސަބަބުން އިތުރު ބާރެއް ލިބިގެން ދިޔަކަން އެއީ އަޅުގަނޑު ނުހަނު ހިތާމަކުރާ ކަމެކެވެ،"
އަދި ޕާޓީގެ ކަންތައް ނިންމަވަނީ މަޝްވަރާގެ އުސޫލެއް ނެތި، ޚުދުމުޚްތާރު ގޮތަކަށް ކަމަށް ބުނާ ވާހަކައަށް ތަސްމީން ދެއްވި ރައްދުގައި ވިދާޅުވަނީ، މިހާތަނަށް ޕާޓީގެ ކޮންމެ ނިންމުމެއް ނިންމައިފައި ވަނީ ޕާޓީގެ ކައުންސިލުގެ އަޣުލަބިއްޔަތު ލިބިގެން ކަމަށެވެ.
ނަމަވެސް، ޕާޓީގެ ސިޔާސީ ޒައާމަތުގައި މައުމޫން ހުންނެވިއިރު ކަންތައްތައް ހިނގަމުންދިޔަ ގޮތާމެދު ވިސްނައިވަޑައިގަތުމަކީ މުހިންމު ކަމެއް ކަމަށް ފާހަގަކުރައްވަމުން ތަސްމީން ވިދާޅުވެފައި ވަނީ، 2008 ވަނަ އަހަރުގެ ރިޔާސީ އިންތިހާބުގެ ދެވަނަ ބުރުގައި އެއްވެސް ޕާޓީއަކާ އެކު ކޯލިޝަން ނުހެދުމުގެ ސިޔާސަތު ގެންގުޅުއްވީ ޚުދު މައުމޫނުގެ "އަމިއްލަފުޅު" ނިންމެވުމުގެ މަތިން ކަމަށާއި އެކަމަށް ކައުންސިލުން އެއްބަސްވެފައިނުވާ ކަމަށެވެ.
"ޖުމްހޫރީ ޕާޓީން އެކަމަށް ފުރުސަތު އޮތް ކަމަށް ލިބިވަޑައިގެންނެވި އިޝާރާތާމެދު ޑީއާރްޕީގެ ކައުންސިލާއި މަނިކުފާނު މަޝްވަރާ ނުކުރެއްވިތާ، ރަނިންމޭޓުގެ ހައިސިއްޔަތުން އަޅުގަނޑާވެސް މަޝްވަރާއެއް ކުރައްވައިފަނުވާކަން، މަނިކުފާނު ހަނދުމަފުޅު ހުންނާނެ އެވެ،" އެ ސިޓީގައި ވެއެވެ. އަދި ތިސްމީން ވިދާޅުވެފައި ވެއެވެ؛ "ކޯލިޝަން ހެދުމުގެ ފުރުސަތުގެ ބޭނުން ހިއްޕެވިނަމަ އަޅުގަނޑުމެންނަށް އެ އިންތިހާބު ކާމިޔާބު ކުރެވުނީސްކަމަށް އެތައް ބަޔަކު މިއަދު ގަބޫލުކުރާކަމީ މަނިކުފާނުގެ އެ ނިންމެވުމާމެދު މިއަދު އަޅުގަނޑުމެން އެންމެން ސުވާލުކުރާ ކަމެއް ކަމުގައި ދަންނަވަމެވެ،"
"ނަމަވެސް އެއިން އެއްވެސް ކަމަކަށް ހިތްބުރަކަމެއްނެތި، އަޅުގަނޑުވާނީ މަނިކުފާނުގެ އަރިހުގައި އިޚްލާސްތެރިކަމާއެކު ޚިދުމަތްކޮށްދީފަ،" ތަސްމީން ވިދާޅުވެފައި ވެއެވެ.
އަދި ރިޔާސީ އިންތިހާބުގައި ތަސްމީން ޚަރަދުކުރައްވައިފައިވަނީ 300،000ރ. ކަމަށް މައުމޫން ވިދާޅުވުމުން "ސިހުން" ލިބިފައިވާ ކަމަށް ތަސްމީން ވިދާޅުވެފައި ވެއެވެ. ތަސްމީން ވިދާޅުވީ، ޔުމްނާ މައުމޫނާއި އޭނާގެ ފިރިކަލުން ވަނީ އޭނާއާއި ކޮއްކޮ ނާޝިޒުގެ އަތުން ގިނަ އަދަދެއްގެ ފައިސާ ގެންދަވައިފަ ކަމަށާއި އެކަންތައް ސިޓީގައި ފާހަގަކުރައްވަން ޖެހުނީ މަޖުބޫރުވުމުން ކަމަށެވެ.
"އަޅުގަނޑު މެދުވެރިކުރައްވައިގެން ލިބުނީ އެންމެ ތިންލައްކަ ރުފިޔާކަމަށް ވިދާޅުވުމުން އެއީ އަޅުގަނޑަށް ސިހުން ލިބި، ރިޔާސީ އިންތިހާބަށް ޚަރަދުކުރުމަށް އަޅުގަނޑުގެ އަތުން ގެންދެވި ފައިސާއަށް ވީގޮތަަކީ ކޮބައިކަމާމެދު އަޅުގަނޑުގެ ހިތުގައި ވަރަށް ބޮޑެތި ސުވާލުތަކެއް މިއަދު އުފެދެން ދިމާވެއްޖެ އެވެ."
ރީޕާޓީން އެކަމަށް ފުރުސަތު އޮތް ކަމަށް ލިބިވަޑައިގެންނެވި އިޝާރާތާމެދު، ޑީއާރްޕީގެ ކައުންސިލާއި މަނިކުފާނު މަޝްވަރާ ނުކުރެއްވިތާ، ރަނިންމޭޓުގެ ހައިސިއްޔަތުން އަޅުގަނޑާވެސް، މަޝްވަރާވާފައިނުވާކަން މަނިކުފާނު ހަނދުމަފުޅު ހުންނާނެ،" ތަސްމީން ވިދާޅުވެފައި ވެއެވެ.
އަދި އެއީ އެ ރިޔާސީ އިންތިހާބު ޑީއާރްޕީއަށް ކާމިޔާބު ނުކުރެވުނު ސަބަބެއް ކަމަށް ދޭހަވާ ގޮތަށް ތަސްމީން ވަނީ ވާހަކަފުޅުދައްކަވައިފަ އެވެ.
[ތަފުސީލް އަންނަނީ]