ރައީސުލްޖުމްހޫރިއްޔާ ޑރ. މުޙައްމަދު މުއިއްޒާއި ވަކިވަކިން ބައްދަލުކޮށް ވާހަކަދައްކަން ބޭނުންވާ ފަރާތްތަކަށް ޚާއްސަކޮށްގެން ކުރިއަށްގެންދާ ޕްރޮގްރާމް ކައިރި މުސްތަޤްބަލެއްގައި ފަށާނެކަމަށް ރައީސުލްޖުމްހޫރިއްޔާގެ އޮފީހުގެ އިސްތަރުޖަމާނު މުޙައްމަދު ހުސައިން ޝަރީފު ވިދާޅުވެއްޖެއެވެ. މި ޕްރޮގްރާމަކީ ރައްޔިތުންނާ ވީހާވެސް ގާތުން މަސައްކަތް ކުރެއްވުމަށް ރައީސް ގެންގުޅުއްވާ ސިޔާސަތުގެ ދަށުން ކުރިއަށްގެންދާ ހަރަކާތެކެވެ.
ވަކިވަކިން ބައްދަލުކޮށް ވާހަކަދައްކަން ބޭނުންވާ ފަރާތްތަކަށް ޚާއްސަ ޕްރޮގްރާމެއް ފަށަން ނިންމަވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ފުރަތަމަ ހާމަކުރެއްވީ ޕީއެސްއެމް ނިއުސްގެ "ނޭޝަން ޗެޓް" ޕްރޮގްރާމްގެ ދެވަނަ އެޕިސޯޑުގައި ވާހަކަފުޅު ދައްކަވަމުންނެވެ. މިކަމާ ގުޅޭގޮތުން އިތުރު ތަފްސީލް ދެއްވަމުން ތަރުޖަމާނު ވިދާޅުވީ، މިހާރުވެސް ގިނަ އަދަދެއްގެ އާއްމުންނާއި ރައީސް ބައްދަލުކުރައްވަމުންދާ ކަމަށާއި، ނަމަވެސް އައު ޕްރޮގްރާމެއްގެ ބޭނުމަކީ މިހާރަށް ވުރެ ފުޅާ ފުރުސަތުތަކެއް އާއްމުންނަށް ހޯދާދިނުން ކަމަށެވެ.
ތަރުޖަމާނު ވިދާޅުވި ގޮތުގައި މި ބައްދަލުވުންތަކުގެ ފުރަތަމަ ދެލި ކޮޕީ މިހާރު ވަނީ އެކުލަވާލާފައެވެ. "މިހާރު ކުރިއަށް ދަނީ އެންމެ ފަހު މަރުހަލާގައި ފުރިހަމަކުރަންޖެހޭ ކަންތައްތައް،" ތަރުޖަމާނު ވިދާޅުވިއެވެ. ބައްދަލުވުންތައް ބާއްވާނެ އުސޫލު ކަނޑައެޅުމަށް ފަހު، އެކަމުގެ ތަފްސީލްތައް އާއްމުންނަށް އެނގޭނެހެން ވަރަށް އަވަހަށް އިޢުލާންކުރައްވާނެ ކަމަށްވެސް އޭނާ ވިދާޅުވިއެވެ.
މިހާރު އާއްމުކޮށް ރައީސާއި ބައްދަލުކުރުމުގެ ފުރުސަތު ލިބެނީ ރައީސް އޮފީހަށް ސިޓީ ހުށަހަޅައިގެންނާއި، އެކި ޖަލްސާތަކާއި ހަފްލާތަކުގެ ހާވާސާގައެވެ. ރާއްޖެއަކީ ޖަޒީރާ ގައުމަކަށް ވެފައި، އެކި ރަށްރަށުގައި ދިރިއުޅޭ ތަފާތު ފަންނުތަކުގެ މީހުންނަށް ރައީސާއި ބައްދަލުކުރުމުގައި ފަސޭހަ ފުރުސަތެއް ހޯދާދިނުމަކީ ސަރުކާރުގެ މުހިންމު އަމާޒެއްކަން ތަރުޖަމާނު ފާހަގަކުރެއްވިއެވެ.
ރައީސުލްޖުމްހޫރިއްޔާ ވިދާޅުވި ގޮތުގައި އެމަނިކުފާނު ގެންދަވަނީ ރަށްރަށަށް ވަޑައިގެން ރައްޔިތުންގެ ހާލަތު ބައްލަވަމުންނެވެ. އަދި ސީދާ ބައްދަލުނުކުރެވޭ ހާލަތްތަކުގައި، ރައީސް އޮފީހުގެ ވަޒީރުންގެ ފެންވަރުގެ ބޭފުޅުން މެދުވެރިކޮށް ރައްޔިތުންގެ ޝަކުވާތައް އޮޅުންފިލުއްވަމުން ގެންދަވާ ކަމަށްވެސް ވިދާޅުވިއެވެ.
މި އައު އިންތިޒާމުގެ ދަށުން، ކޮންމެ ހަފުތާއަކު އެއް ދުވަހު ނުވަތަ ދެ ދުވަހު، ކަނޑައެޅޭ ވަކި އުސޫލެއްގެ ތެރެއިން ރައްޔިތުންނާ ބައްދަލުކުރެއްވުމަށް ރައީސް ވަގުތު ހަމަޖައްސަވާނެއެވެ. މިއީ ރައްޔިތުންގެ އަޑު ސީދާ ރައީސަށް އިއްވުމަށް ހުޅުވާލެވޭ މުހިންމު ދޮރަކަށް ވެގެންދާނެއެވެ.