އީރާނަށް އަމާޒުކޮށްދޭ ހަމަލާތަކުގައި އެމެރިކާގެ އަސްކަރީ މަރުކަޒުތައް ބޭނުންކުރުމުގެ ހުއްދަ ސްޕެއިނުން ނުދިނުމާ ގުޅިގެން، އެ ގައުމާ ދެކޮޅަށް ވިޔަފާރީގެ ދަތިކުރުމުގެ ފިޔަވަޅުތަކެއް އަޅާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް އިއްޔެ ދެއްވައިފި އެވެ.
ޖަރުމަނުގެ ޗާންސެލަރު ފްރީޑްރިކް މާޒްއާ އެކު ބޭއްވި ބައްދަލުވުމެއްގައި ވާހަކަދައްކަވަމުން ޓްރަމްޕް ވިދާޅުވީ، ސްޕެއިނާ އެކު އޮންނަ އިގްތިސާދީ ގުޅުންތައް ކަނޑާލުމާ މެދު ގޮތެއް ނިންމުމަށް އޮފިޝަލުންނަށް އަންގާފައިވާ ކަމަށެވެ. ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ ސްޕެއިނުން އަމަލުކުރަމުންދަނީ ވަރަށް ގޯސްކޮށް ކަމަށާއި، އެހެންކަމުން އެ ގައުމާ އެކު ކުރާ ހުރިހާ ވިޔަފާރިއެއް ހުއްޓާލައި އެއްވެސް ގުޅުމެއް ބާއްވަން ބޭނުން ނުވާ ކަމަށެވެ.
އީރާނަށް ހަމަލާދިނުމަށް ސްޕެއިނުގެ ދެކުނުގައި ހުންނަ ރޮޓާ އަދި މޮރޯން އެއާބޭސް ބޭނުންކުރުމުގެ ހުއްދަ އެ ގައުމުގެ ސަރުކާރުން ނުދިނުމުން، އެމެރިކާއިން މިހާރު ވަނީ ތެޔޮ އަޅާ ބޯޓުތައް ހިމެނޭހެން 15 މަތިންދާބޯޓެއް އެ ތަނުން ބަދަލުކޮށްފަ އެވެ.
މީގެ އިތުރުން، ނޭޓޯގެ މެންބަރު ގައުމުތަކުގެ ޖީޑީޕީގެ %5 ދިފާއީ ކަންކަމަށް ހޭދަކުރުމަށް އެމެރިކާއިން ކުރާ އިލްތިމާސަށް ސްޕެއިނުން އިޖާބަ ނުދޭތީ ވެސް ޓްރަމްޕް ވަނީ ފާޑުވިދާޅުވެފަ އެވެ.
ނަމަވެސް، ޖަރުމަނުގެ ޗާންސެލަރު މާޒް ވަނީ ވިޔަފާރީގެ މަޝްވަރާތަކުގައި ވަކި ގައުމަކަށް އަމާޒުކޮށް ފިޔަވަޅު އެޅުމާ ދެކޮޅު ހައްދަވާފަ އެވެ. އޭނާ ވިދާޅުވީ ސްޕެއިނަކީ ޔޫރަޕްގެ އިއްތިހާދުގެ މެންބަރަކަށް ވުމުން، އެމެރިކާއާ އެކު ޓެރިފްތަކާ ގުޅޭ ގޮތުން މަޝްވަރާކުރާނީ މުޅި އިއްތިހާދު ގުޅިގެން ކަމަށާއި ވަކި ގައުމަކާ މެދު ތަފާތުކޮށް ކަންތައް ނުކުރެވޭނެ ކަމަށެވެ.
ސްޕެއިނުގެ ސަރުކާރުން ބުނެފައިވަނީ ބައިނަލްއަގުވާމީ ގާނޫނުތަކާއި ޔޫރަޕްގެ އިއްތިހާދުގެ ވިޔަފާރީގެ އެއްބަސްވުންތަކަށް އެމެރިކާއިން އިހުތިރާމް ކުރަންޖެހޭނެ ކަމަށެވެ. އަދި އެމެރިކާއިން ފިޔަވަޅު އެޅި ނަމަވެސް، އޭގެ ސަބަބުން ކުރާނެ ނޭދެވޭ އަސަރުތައް ކުޑަކުރުމުގެ ގާބިލުކަން ސްޕެއިނަށް ލިބިގެންވާ ކަމަށް ވެސް ބުނެފައިވެ އެވެ.
މިފަދަ ނުތަނަވަސްކަމެއް އުފެދިފައިވީ ނަމަވެސް، 2025 ވަނަ އަހަރު އެމެރިކާއިން ސްޕެއިނާ އެކު ކުރި ވިޔަފާރިން 4.8 ބިލިއަން ޑޮލަރުގެ ފައިދާއެއް ހޯދާފައިވެ އެވެ.